Otro Archives | Page 15 of 38

December 16, 2015

Lucha rekonosimentu Olímpiko Kòrsou den rekta final

WILLEMSTAD — 20 – 21 yanüari 2016 na Laussane – Suisa último tratamentu.

INISIO PA PROPIO REKONOSEMENTU OLIMPIKO PA PAIS KÒRSOU.

Federashon Deportivo i Olímpiko Kòrsou (FDOK) a drenta un periodo sumamente krusial i interesante pa Kòrsou komo pais i nos mundu deportivo en partikular. E pioneronan, esta Rein Persaud i Roy Bottse, a inisiá e asuntu aki na òktober 2008. Despues ku nan a entamá e proseso pa motivá e órgano deportivo mas altu na Kòrsou, e tempu ei CSF, pa kana e kaminda konforme reglanan stipulá, masha tantu a sosodé. Primeramente pa Kòrsou tin su propio organisashon Olímpiko i despues e deseo pa bai lucha pa logra propio rekonosementu olímpiko pa pais Kòrsou. E idea wòrdu lansá públikamente durante e kongreso nashonal di deporte, organisá pa diputado di deporte di e tempu ei sra. Alcala Walle den ITC dia 7 di mart 2009. Tambe a lanta den luna di mart 2009 komishon Begina ku mester a investigá e pasonan ku NAOC a realisá ku a kondusí na e karta/resolushon di 7 di mart 2009. E resultado di e komishon tabata nihil.

Manera ta konosí, e idea no a kai den bon tera den seno di NAOC, ku tabata e komité olímpiko di Antia Ulandes. NAOC a hasi tur esfuerso pa konvensé un ke otro, mustrando ku ya nan tin aprobashon kaba di Komité Olímpiko Internashonal, pa NAOC i su direktiva keda eksistí komo e representante di tur e islanan huntu, maske pueblo a ekspresá klaramente mediante un referèndem e deseo pa un kambio den struktura estatal, den kua Kòrsou (i St. Maarten) lo bira pais outónomo den reino entrante 10 -10 -10. Plannan di NAOC tabata pa sigui usa e bandera i himno di Antia. Ku otro palabra direktiva di NAOC ta kier a pone 10 -10 -10 un banda i dal bai manera nada no a kambia konstitushonal pa pais Kòrsou.

INISIO PA MANTENE ANTIA DEN DEPORTE I ALABES MANTENE NAOC.

Realidat históriko ta prueba ku na yüli 2007 NAOC a logra konvensé kasi tur federashon di Antia pa firma un resolushon ku nan ta skohe pa keda huntu den Antia pasombra “ non of the islands will become autonomous as described by the United Nations”. Esei ta informashon por eskrito ku direktiva di NAOC a informá Komité Olímpiko Internashonal (KOI). Te awe e (mal)informashon inkorekto – por eskrito-, ta e kuchú doloroso den e lomba di pais Kòrsou. Ku esei lo a logra tambe ku direktiva di Nederlands Antilliaans Olympisch Comite lo por a keda sinta, apesar ku Antia no ta eksistí mas despues di 10-10-10. KOI ku NO tabata sa mihó, na promé instante a primintí pa koperá, pa NAOC i su direktiva keda eksistí. Despues IOC a tuma nota ku e fli no ta subi na pais Kòrsou pasombra CSF a pone mundu deportivo internashonal kompleto na altura ku e teritorio deportivo di pais Kòrsou ta hurisdikshon di Curacaose Sport Federatie (CSF) i ku NAOC no tin ningun outoridat pa representá pais Kòrsou despues di 10 – 10 -10. Ademas CSF a informá na nivel internashonal ku CSF lo sigui duna kabalmente kontenido na e eskoho formal di pueblo di Kòrsou, esta ku Kòrsou ta bira un pais outónomo i lo tin su propio representashon deportivo, ku su propio bandera i himno.

Den reunion general di CSF fecha 1 aprel 2009, federashonnan miembro di CSF a lanta e komishon statutario “CNOC” konsistí di representashon di direktiva, Federashonnan: sr. Wilfrido Coffi i sr. Kenneth Pieter i konseheronan sr. Persaud i Bottse. A logra surpasá bastante opstákulo i konfrontashon ku peritonan di NAOC. No mester lubidá ku federashonnan di deporte di Antia ta tin bestür ku hopi be tabata similar ku e direktiva di federashonnan deporte di Kòrsou. Ku otro palabra federashon di Antia tabata den realidat hopi be federashon Kurasoleño. Esei hopi be tabata kompliká e desaroyo pasombra e federashonnan di Kòrsou tabata miembro di CSF. Kier men hopi bestür tabata landa den dos awa. Un temporada hopi ferfelu, i turbulento ku a krea basta were were. Banda di NAOC i CSF tambe ta tin direkshon di SEDREKO ku a profilá su mes komo un ferviente sostenedó di NAOC i ku su manera “apart” di atendé ku supsidio pa federashonnan di Kòrsou.

A BUSKA KONSEHO INTERNASHONAL

Na inisio di aña 2010 a kuminsá kana un trayektorio formal i kompliká. CSF, en partikular su komishon CNOC, ku a keda nombrá promé di aprel 2009 dor di reunion general yamá Curaçao Nationaal Olympisch Comité, a wanta duru, apesar di hopi atake personal. Un desaroyo importante tabata ku “CNOC” a logra haña konseho di e mundialmente famoso Instituto Asser pa derechi internashonal, situá na Den Haag – Hulanda. CNOC a konektá Curacaose Sport Federatie (awendia FDOK) ku profèser Blackshaw, un eksperto hurídiko den lei internashonal, spesialisá den deporte. Despues ku a analisá e dokumentonan, Blackshaw e yega na konklushon ku tin probabilidat pa Kòrsou yega na su propio komité olímpiko rekonosé pa IOC. Problema prinsipal pa Kòrsou ta regla 31.1 di “Charter” Olímpiko ku ta bisa ku pa KOI rekonosé un komité olímpiko e pais mester ta estado independiente rekonosé dor di komunidat internashonal. ( “ country” means independent state recognized by the international community) Riba konseho di “CNOC” a invitá professor Blackshaw pa bin splika hurídikamente kiko e ta pensa ta e chèns pa Kòrsou. Blackshaw a informá ku e ta premirá un proseso difísil i kompliká pero a duna di konosí ku e ta kere ku tin probabilidat. E pregunta sumamente krusial ta: kiko ta un estado independiente I kiko ta komunidat internashonal? Hecho ta ku NO tin ningun definishon formal eksistente ku ta duna direkshon pa un kontesta fiho. Ta netamente riba e falta di definishon klave riba kiko ta independensia i ki ora ta konsiderá un pais independiente, “CNOC” a konstruí e lucha ya konosí, pa pais Kòrsou haña rekonosementu olímpiko.

E regla ku awendia ta forma e opstákulo pa Kòrsou, a ser introdusí na 1996. Promé ku esei tur pais, teritorio òf parti di pais por a opta pa rekonosementu. P’esei Aruba tin su propio rekonosementu. E tempu ei esei tabata posibel. Pa motibunan di intento di gruponan separatista den vários pais, ku tabata trata uza rekonosementu olímpiko pa generá akseptashon polítiko, KOI a disidí adaptá e regla i a bin ku e formulashon manera e ta awor.

PREPARASHON PA UN LUCHA LARGU I KOMPLIKA KU YEN OPSTAKULO

Miéntras tantu mei mei di tur movishon intensivo ku tabata tumando lugá, inkluso kontra-akshon for di Kòrsou su suela mes, kontra interes nashonal…., “CNOC” a sòru pa presentá statutonan nobo pa CSOF ku ta kumpli ku e eksigensianan stipulá den e Charter Olímpiko i tambe pa mínima sinku federashon di Kòrsou a adaptá nan statuto na e konstitushon nobo di pais I di CSOF i entregá nan petishon pa afiliá na nan federashon internashonal. Konforme Charter Olímpiko mester tin por lo ménos sinku federashon di deportenan olímpiko afiliá serka nan federashon internashonal. Awe Kòrsou tin diesun federashon afiliá internashonal.

Mester rekonosé ku CSF huntu ku “CNOC” a logra haña sosten di gobièrnu, ku a sinta nèt promé ku 10-10-10. Bou di guia di Blackshaw a entregá na mart 2011, e petishon pa rekonosementu formal di CSOF na KOI. Un logro importante tabata ku den aña 2010 Parlamentu di Kòrsou a aprobá un moshon unánimamente pa sostené CSOF den e lucha pa logra rekonosimentu olímpiko.

Den yüli 2011 KOI a tuma e desishon na Durban, Sut Afrika, ku ta kanselá rekonosimentu di NAOC, pero ku lo no rekonosé ningun komité olímpiko riba un di e islanan di èks Antia, pasombra nan no ta kumpli ku regla 31.1. Esaki ta kuadra eksaktamente ku e forma i kontenido ku NAOC a informá KOI esta ku “non of the islands will become autonomous as described by the United Nations”! Despues ku a risibí e kontesta di KOI, direktiva di CSOF a trata di drenta den kontakto ku KOI pero no a risibí kontesta. A base di konseho di Blackshaw I “CNOC”, e komishon ku a keda lantá den seno di CSOF ku e tarea eksklusivo pa hasi tur posibel pa CSOF wòrdu rekonosé komo komité olímpiko di Kòrsou, direktiva di CSOF a apuntá e bufèt FRORIEP RENGLLIE na Lausanne – Suisa, pa prepará i entregá e kaso na CAS, ku ta e korte di arbitrahe pa deporte na Suisa, fundá pa KOI. E kaso a wòrdu prepará seriamente entre e abogadonan na Suisa i e komishon CNOC di FDOK. Trabou ekstraordinario a keda desplegá pa “CNOC” pa kumpli ku tur eksigensia i kubri ku tur ángulo i asina fortifiká nos posishon hurídiko.

VEREDIKTO: CAS NO TA OUTORISA PA DUNA VEREDIKTO DEN KASO DI KÒRSOU!!!!

Despues di a tuma kasi 9 luna, CAS a trata e kaso en ekstenso i entre otro a tene via video conference entre Lausanne – Kòrsou, ku tres tòp deportista di Kòrsou, bou di huramentu di sra. Liesbeth Hoefdraad, e tempu ei Presidente di nos Korte Superior! Nos atletanan a deklará firme ku nan ta atletanan di Kòrsou ku kier representá nan pais Kòrsou i ningun otro. CAS a duna di konosé ku e ta un kaso hopi kompliká mirando nos struktura konstitushonal.

Despues ku partidonan a presentá nan punto di bista na Suisa, CAS a tuma masha hopi tempu i diferente biaha a posponé e veredikto, pa konkluí finalmente ku CAS no ta haña su mes outorisá pa duna veredikto den e kaso di pais Kòrsou. E argumentu ku CAS a usa ta ku pa CAS no ta kla kiko ta “certain cases” manera ta menshoná den regla 62.1. di e Charter Olímpiko. E regla ta bisa ku desishon di hunta ehekutivo di KOI ta final pero den “certain cases” por aserka CAS pa apelashon. CAS a laga sa ku e hues, un profesor Afrikano yamá MKembe, ku a formulá e regla 62.1, a fayesé i nan no tin ningun informashon ku por yuda pa disidí kiko ta “certain cases”. Ademas nan tarea no ta pa duna interpretashon na “certain cases”. Ta bon pa informá ku CAS ta ser finansiá dor di KOI mes, i ku lo mester ta imparsial. Mester mustra riba e realidat ku ta masha poko biaha den historia di CAS, ta tin kaso kontra KOI mes i CSOF a sinti ku CAS no ta loke ta ser pretendé. A proseso na CAS a kosta hopi sèn i CSOF a konkluí ku e aspekto ei lo ta loke KOI ta trata di logra, esta pa CSOF legumai e asuntu numa. KOI kosta loke kosta, kier evitá un derota hudisial pasombra segun nan tin algun otro pais ku ta wardando pa wak kon e kaso di CSOF lo kristalisá. Konseheronan den CNOC ta di opinion ku e kaso di Kòrsou ta úniko i ku esei no ta krea niun presedente.

A BAI KORTE DEN PROME INSTANSHA NA SUISSA

Despues CSOF a analisá e desishon di CAS a yega na konklushon ku KOI ta diskriminá CSOF, formalmente Kòrsou ku su pueblo en partikular su mundu deportivo i ku esei ta violashon fragante di nos derechinan komo pueblo. Den realidat esei ta e keho prinsipal kontra di KOI ku a wòrdu entregá na Korte den Promé Instansha den e “Kanton Vaud” na Suisa ku ta e distrikto den kua KOI ta establesé. Despues di e turno atministrativo a bini un tratamentu visual ku e abogadonan di CSOF, inkluso sr. Roy Bottse, kaminda a deliberá i presentá e posishon di CSOF dilanti. Komo prueba kon kompliká e kaso ta, por ilustrá e hecho ku universidatnan di Geneve, Paris i Strasbourg riba petishon, a ehekutá un investigashon pa duna opinion tokante e konstelashon estatal di Kòrsou. Remarkabel ta ku mester a konkluí ku tin un asina yamá ” descending opinion” ku kier men no ta tin un akuerdo komun.

Korte despues a disidí ku den òktober 2014 lo kontinuá i lo tende algun testigu, pa despues realisá e “pleidooi” final i despues duna veredikto.

DISPUESTO PA YEGA NA UN “SCHIKKING”

Den luna di ougùstùs 2014, un siman promé ku e parti final di e kaso KOI a aserká CSOF pa sinta na mesa pa wak si por yega na un areglo mutuo. Presidente nobo di CSOF sr. Jean Francisca i sr. Roy Bottse a bai Laussane den sèptèmber 2014 i despues di un reunion difísil a duna di konosé ku CSOF ta dispuesto pa koperá (schikking) basta KOI kumpli ku e kondishonnan palabrá. KOI a bai di akuerdo i partidonan a firma pa korte pa posponé e kaso pasombra nan ta trahando riba un asina yamá “schikking”, un areglo ameno. Aunke tur kos a ser klabá por eskrito, KOI no a kumpli ku nada ku a firma. Hasta por bisa ku KOI no a aktua na buena fe. Reunion General di CSOF ku konstantemente a wòrdu informá kon kos ta desaroyá, a diskutí riba loke ta pasando, pa despues unánimamente a tuma e desishon pa duna bestür instrukshon pa via e abogadonan informá korte ku CSOF ke kontinuá ku e kaso den korte.

Den e kaso diferente aspekto di lei internashonal ta hunga un ròl pa por husga ku KOI ta violando e derechi di CSOF / Kòrsou. Entre tantu ta importante pa sa si tin kualkier partido ku lo sufri daño si KOI rekonosé CSOF. KOI mester a demonstrá si tin partidonan komo tal. KOI a laga sa ku esei NO ta e kaso. Importantísimo pa e kaso ta ku sr. Ivar Asjes den su funshon komo Promé Minister a sòru pa Reino Hulandes manda un karta ofishal, firmá dor di Minister Timmermans ( Asuntonan Eksterior) pa korte na Suisa deklarando firme ku Reino Hulandes ta sostené e lucha di Kòrsou kompletamente i ta pidi KOI pa rekonosé CSOF.

SESHON FINAL TA KONTINUA DEN YANUARI 2016

Dia 20 i 21 di yanüari benidero representante di CSOF, den persona di sr. Jean Francisca, sr. Rein Persaud i sr. Roy Bottse , huntu ku e abogadonan internashonal lo tin a tarea históriko pa konvensé korte na Laussane ku Kòrsou ta un pais di bèrdat, un pais digno ku meresé rekonosementu olímpiko. Ademas, ku nos struktura konstitushonal tin tur aspekto pa konsiderá nos un estado òf pais independiente, ku Kòrsou ta ser akseptá total den nos region komo pais. Entre tantu Kòrsou ta miembro di Parlatino un organisashon di Parlamentonan di paisnan di Amérika Latino. Tambe lo enfatisá i prueba ku Kòrsou tin un struktura deportivo strukturá i serio, ku ta un di e eksigenshanan di Charter Olímpiko i regular ta produsí deportistanan di nivel regional, kontinental i asta mundial den diferente ramo di deporte.

Ku otro palabra KOI ni tampoko organisashonnan regional tin motibu bálido pa tene pais Kòrsou afó, pero pa akseptá pais Kòrsou komo un digno parti di mundu ku derechi pa representá su mes na tur plataforma internashonal inkluso ku su nòmber KÒRSOU i su bandera ta waya durante weganan regional, kontinental i olímpiko. T’esei te meta di e lucha di CSOF.

CSOF ta konfia ku pueblo di Kòrsou den su totalidat ta sostené e lucha aki i ku kada persona na su manera, lo sabi di manda vibrashon positivo riba e asuntu aki pa yega na un veredikto na fabor di nos dushi pais Kòrsou.

“CNOC” Curaçao Nationaal Olympisch Comité.
“CSOF” Curacaose Sport & Olimpische Federatie = “FDOK” Federashon di Deporte i Olímpiko Kòrsou
“CNOC” ta konsisti di: representante di FDOK i presidente sr. Rignaal Fransisca
representante di Federashonnan sr. Wilfrido Coffi i sr. Kenneth Pieter konseheronan sr. Rein Persaud i sr. Roy Bottse

December 15, 2015

Federashon Aquatiko Korsou: “Korsou, bo konose deporte aquatiko?”

WILLEMSTAD — Ya pa algun luna ta konosi ku Pisina di Sentro Deportivo Korsou a wordu sera dor di ku GGD a konstanta ku e awa di e pisina no tabata kumpli ku eksigensianan.

Sigun mi por a kompronde, ku algun mayor a entrega keho ku nan yunan tabata bira malu kada bes ku nan landa den e pisina. Naturalmente nos niun no ke pa nada pasa nos yunan ni yu di otro hende tampoko. Salu di nos muchanan ta semper na prome luga. A laga saka tur awa for di den e pisina pa yena awa limpi pero awor a resulta ku e pisina ta den un situashon deplorabel ku lo kosta hopi sen i tempo pa por drecha esaki bek. Tur dia, tur hende ta papia di e konsekuensia ku esaki tin pa dunamentu di les di landamentu. Tur minister i parlamentarionan ta komenta di e muchanan ku no por sinja landa. Naturalmente ta bini ku diferente solushon, por ehempel bai duna les den laman.

Pero Korsou bo ta konsiente di landado (ku por landa kaba) ku train tur dia den e pisina pa e por kompeti ku su kolega pa e hanja un medaya of pa e por forma parti di selekshon nashonal pa e por representa su pais?

Federashon Aquatiko Korsou tin komo meta traha riba desaroyo di deporte aquatiko i soru pa kompetensianan nashonal i internashonal den e ramo di deporte aki. E disiplinanan ku ta kai bou di deporte Aquatiko ta landamentu kompetitivo, landamentu sinkronisa, landamentu kompetitivo den laman, polo aquatiko i “diving”.

Na Korsou tin 6 club ku ta praktika e deporte aki: Bulado Swim Club, SITHOC zwemvereniging, Curacao Sharks Aquatics, Typhoon Swimming Club, Swordfish Aquatic Group i ORCA Swimming Club. En total nos tin mas ku 400 atleta ku ta praktika e deporte aki aktivo.

Durante di henter anja e klupnan ta train na pisina di SDK. Un training adekua pa un atleta ku ta train riba nivel haltu ta konsisti di por lo menos 7 pa 8 training pa siman, por lo menos 2 ora pa kada training. Esei ta nifika ku e atleta lo tin ku train 6 dia den siman di kwa 1 of 2 dia ta 5or di mainta. I manera mi a trese dilanti kaba ta 6 club ku un total di 400 atleta, pues saka bo som kwantu biaha nos ta hasi uso di SDK pa training.

Pa nos por kompeti internashonal, nos mester tene kompetensia na kas. Nos kompetensia mester wordu tene den un pisina ku ta kwadra ku e regla ku e federashon internashonal ta stipula. E federashon aki jama Fédération Internationale de Natation (FINA) i ku ta resida na Suesia. Aki na Korsou kompetensianan di Landamentu kompetitivo i landamentu sinkronisa ta tuma luga na SDK. Pa kada temporada di natashon nos tin 10 kompetensia di natashon kompetitivo i 9 kompetensia di landamentu sinkronisa. Aki tambe por hasi un konteo kwantu biaha pa luna nos ta hasi uso di pisina di SDK pa kada temporada di natashon ku ta konsisti di 10 luna pa aña.

E disiplina ku aktualmente nos ta mas desaroya den dje i den kwa Korsou ta kompeti ku eksito den nos region i tambe mundial ta landamentu kompetitivo. Tur aña nos ta partisipa na Carifta, CISC i CCCAN, tresiendo basta medaya Korsou.

Den Karibe i Las Americas, Korsou ta konosi pa e hecho ku nos tin bon prospektonan den e deporte i nos ta demostra komo pais ku nos ta trahando riba desaroyo di e deporte aquatiko. Esei a keda demostra tambe na October ora Union Americana de la Natacion (UANA) mester a skohe 14 pais di las Americas pa traha riba plan di maneho. Korsou a forma parti di e 14 paisnan aki.

Lastu lunanan nos a mira kon landamentu sinkronisa ta desaroyando, ku a duna nos un prome luga na kompetensia di CCCAN, Kompetensia di Centro American I del Caribe. Fin di November FINA a laga un di su fasilitadornan mundialmente konosi bini Korsou pa asina duna un training intensivo di 8 dia na nos entrenadornan, ofisialnan i atletanan di landamentu sinkronisa.

KORSOU, bo tabata sa ku nos ta asina bon mira den e deporte aquatiko????

NO??? Porta Federashon Aquatiko Korsou no ta sali hopi dilanti, porta nos no ta asina agresivo den e parti di publisidat. Pero kada bes ku nos jega kas ku medaya, nos ta hanja e atenshon di prensa, atenshon di mandatarionan, atenshon di pueblo i nos ta apresia esaki inmensamente.

PERO TOG AWE A LUBIDA RIBA NOS.

Nos a buska solushon pa nos trainingnan por a sigi i nos a uni i reparti kada tempu ku tabata tin disponibel na otro pisina pa asina no demotiva nos muchanan.

Pero e parti principal ku ta tene kompetensia a wordu paralisa.

Nos a buska kompetensianan serka di Korsou pa asina alomenos e atletanan ku mester pone tempu pa por representa Korsou na Mart proksimo por mantene nan posishon. Pero kiko ta pasa ku e atleta prospekto ku su mayor no ta dispone di e fondunan pa manda su yu Aruba, Sto. Domingo, Surnam of Merka? Ta nifika ku na Mart e tin ku keda kas? Ta nifika ku na Mart Korsou tin algun medaya menos? Ta nifika ku Korsou no ta bai tin un selekshon? Ta nifika ku Korsou nos a kai atras atrobe!!

Nos a papia ku GGD pa kompronde kiko ta pasando, nos a papia ku FDDK pa jega na solushon, nos a puntra na parlamentu unda nos tin ku bai, kiko nos tin ku hasi, kiko ta bai sosode. Pero ketu bai nos ta den skuridat.

Korsou, kiko ta bai pasa ku e deporte Aquatiko?

Asina aki nos ta kibra sonjo di un grupo di hoben??

KORSOU, TA LUBIDA BO A LUBIDA RIBA NOS??

December 9, 2015December 9, 2015

US Virgin Islands tambe ta kai kontra Korsou den Cazova U-21

BARBADOS — E selekshon maskulino junior di Korsou ayera merdia atrobe a registra un viktoria di 3-0, e biaha aki tabata e seksteto di Isla Virgenes ku mester a soporta un Korsou hopi agresivo den atake. Valeriano, Kleinmoedig I Eisden respalda pa nan kompañeronan di ekipo no a laga ningun duda ku nan a bai Barbados ku intenshon serio. E selekshon di Korsou ta gana e partido ku e setnan konvinsente di 25-18,25-16,25-16

Nos selekshon su proksimo partido ta djawebs dia 10 di December kontra Guadalup pa 14:00 pm, dado kaso nan gana ta nifika ku nan ta pasa pa e buelta di semifinal djasabra 12 di december.

USVI ta logra derota nos selekshon femenino 3-1

Nos selekshon femenino ayera si a kai frente e ekipo di Islas Virgenes.ku skor di 3-1. (19-25,18-25,25-22.18-25)

Nos ekipo apesar di e derota a hunga bon volibol, ku bon blokeo pero desafortunadamente nos defensa na e momentonan klave no por a bin kla ku e atake di USVI.

Nos selekshon tin awor un derota kontra un viktoria I awe merdia nan lo mester enfrenta Guadalup . Un viktoria pa nos muchanan kombina ku un derota pa USVI kontra Martinique ta pone ku nos lo por klasifika prome den nos pul.Pero tur esakinan ta depende di e partidonan di awe.

December 8, 2015December 8, 2015

Resultado di Kampionato di Mr Hercules & Miss Body & Bikini Fitness 2015

WILLEMSTAD — Djasabra ultimo 05 di desember 2015 tabata tin e kampionato di Bodybuilding Titula:Mr Hercules &Miss Body &BikinFitness den International School.

Dedika na Edward Otto.

Un sala yen di hende entusiasma a bin presensiá e kompetensha ku tabata un eksito rotundo.Best of the Best Bodybuilding Committee por mira atras un bon kompetensha i un bon show riba nivel

Giovanni Abat a jama tur atleta riba esenario pa honor na nos himno di Kòrsou,despues e presidente di B.B.B.C. Señor Stanley Francisca a habri e show i yama tur presentenan un bon bini i duna un splikashon kòrtiku relashona ku e kompetensha ku tabatin, partisipashon di atletanan di Aruba,Bonaire I Korsou .

Despues a pasa palabra pa e Presidente di CBBFF Sr Aldimar Pieter kende a tira un speech kortiku relashona ku planesnan pa Futuro,despues maestro di seremonia señor Abat a kontinua ku e Kampionato di bodybuilding

Resultado di e kompetensha ta lo siguiente :

Rookie class :

1)Shaun Marlin(Diamond Gym)

Light weight :

1)Troilan Grotestam (Top Fit)

L-Middle weight class :

1) Alfredo Garcia(Gym Center)

Heavy weight class :

1) William Sanches (Gym Center)

2) Regis Loo(Bob Esprit Gym)

3) Jako van der Velde(First Class)

Men’s Physique up to– 1.78

1)Robin Berggraaf (Perfect Body Image)

2)Nathanierl Nicia(Diamond Gym)

3)Tahir Maria….(Heart Beat)

Men’s Physique over+ 1.78

1)Jaamie White (Body’s Evolution)

2) Surandy Isenia (Heart Beat)

3) Rashan Angela.(Diamond Gym)

BodyFitness pa Damas :

1)Nihailet Toppenberg (Monster Factory)

Bikini Fitness pa Damas:-166

1) Andrea Vasques (Aruba)

2) Zurisadai Wanga (Heart Beat)

3)Veronique van Hutten ( Body’s Evolution)

Bikini Fitness pa Damas:+166

1) Nayli Carolina Leidens(Life Line Fitness)

2) Danchanice Sophia(Bonaire)

3)Chureska Jansen) (Life Line Fitness)

Overall Winner Bikini Fitness a resulta: Andrea Vasques di Aruba,y Men’sPhysique a resulta: Jaamie White. Y Overall winner Mr Hercules 2015 a Resulta: William Sanchez

Durante di e kompetensha ; B.B.B.C. a jama un danki na e sponsornan principal esnan ku a hinka nan konfiansa den e evenemento aki kual ta La Jesma Café,Kuster Trading, Refineria Isla,De Ron Machine Shop,Dusron Bouwbedrijf,Building Depo,Sahara Casino,ACU,Prime Filters,

BBBC a jama Edward Otto riba “stage”pa kontinua ku e Homenage,tabata momentonan di emoshon ora ku Presidente di BBBC a anunsia Otto su Hazana kual ela kosecha ,después a entrega Edward su plaka di rekonosimiento na nomber di BBBC ,Otto a risibi palabranan di Graditut di parti di e Committee ku a dune e honor pa loke Edward a logra den anja nan ‘

90 te ku 2010 Despues e Publiko a gosa di un tremendo Show di e Guestposers Mr Hollands 2013,2014 Grego Francisca y e Homber Grandi direktamente for di South Carolina Mr Cedric McMillan kual a laga e públiko gosa un bol.

E atrakshon di e anochi tabata inolvidabel ora ku e Marion a subi riba ensenario buta tur e presentenan ariba abou , hopi bon presentashon, e publiko a gosa, i e tambe a gosa un bol ,porsierto tremendo show.

Overall Winner Mr Hercules a resulta : Desmond Patterson(Sint Maarten) I Best poser a resulta Regis Loo,di (BobEsprit ),

Miss Beautiful Body Fitness a resulta :Jennifer Pieters. (Heart Beat)y Miss Beautiful Bikini Fitness a Resulta: Adriana Herrera (Heart Beat)

Men’s Physique -1.78 a resulta:Ruvelio Josephia. Y Men’s Physique +1.78 a resulta :quido Scorea.

B.B.B.C( Best of the Best Bodybuilding Committee) ta yama un danki na tur su sponsernan,muy especial Kusters Trading , Refineria Isla,La Jesma Café, De Ron Machine Shop, Dusron Bouwbedrijf NV ,Sahara Casino , Ambtenaren Credit Union,Building Depo , ,i tur e Gymnan ku tabata tin partisipante,Aruba, Bonaire, ku a yuda pa e kompetensha por a bira un eksito i ta desea tur Partisipantenan, Coach, Miembronan di hurado ,Prensa, CBBFF,Sponsernan, pueblo di Korsow en general un felis pasku i alabes un prospero anja 2015.

December 8, 2015December 8, 2015

Korsou ta habri 10th Cazova Championships ku dos viktoria

BARBADOS — E selekshon maskulino junior di Korsou a inisia impreshonante den e di “10th Cazova Championships den Wildey Gymnasium ganando di Aruba den 3 set (25-19,25-21,25-14).

Aruba no por a resisti e poder di blokeo i atake di e ekipo di Korsou. Ambos ekipo a defende bon pero Korsou su atake tabata demolador ku prinsipalmente Valeriano i Kleinmoedig kastigando e defensa Arubano.

Korsou tabatin 34 remate kompara ku 24 di e ekipo Arubano. Den blokeo atrobe Korsou tabata superior ku 7 kontra 1. Den servisio Korsou a skor 8 “ace”kontra 3 di Aruba.

E coach ganado di Korsou Maverick Alexander despues di e partido a komenta ku su ekipo a hunga un gran partido.”E kos aki ta tremendo. Ta un ambiente nobo pami muchanan, pero nan a hanja nan kaminda pa tog gana e partido den gran forma.E viktoria aki ta pone ku nan ta hanja mas konfiansa ku mira riba e sobra partidonan ku falta.

Robles De Medina, e coach di Aruba a indika ku nervio a kaba ku su ekipo prinsipalmente despues ku nan tabata dilanti den e markador den e prome dos setnan.’Pero nos lo ta bek den bataya” ,asina ela termina bisando.

Nos proksimo kompromiso ta awe merdia 12or , ora ku nos topa ku e ekipo di US Virgin Island.

Korsou ta derota e aktual kampeon Martinique ku skor di 3-1

Nos damita ayera tampoko a keda tras despues di a mira nos ekipo maskulino derota Aruba ku skor di 3-0, nan a sa di den otro gran partido di derota e aktual kampeon U20 femenino Martinique ku skor di 3-0 (25-23,23-25,25-16,25-14)

E selekshon di Korsou a hunga un tremeno partido, ku hopi trankilidat,bon defensa i atakenan aserta. Nos armadornan di wega Godfried i Jamaloodin

a destaka enormemente abastesiendo e atakantenan ku e balanan korekto i na midi.

Ku e viktoria aki e selekshon di Korsou awor ta prepara pa awe tardi 16:00pm nan tambe enfrenta US Virgin Islands.

December 7, 2015December 7, 2015

Yudokanan eksitoso na “15th International Barbados Judo Tournament”

WILLEMSTAD — Despues di un periodo di lunas di entrenamiento entensivo ku a kulminá den e kampionato habri organisá pa Federashon di Yudo Korsou djasabra 28 november na Sufisant, djasabra ultimo, selekshon di yudo lokal a partisipá na e di diessinku International Barbados Judo Tournament. Dos yudoka femenina i 5 maskulino a batayá kontra di otro atleta for di paisnan di Karibe. Al final mester a konkluí ke ekipo tabata sumamente eksitoso. Ivanleah Maria di Janwe Judo Club a gana 2 medaya di oro, Jurvenier Rijnschot un do oro i un di plata. E yudokanan David de Wolf, Juriensca Euloteria, Sharvin Pieter , Zuwena Valks i Reginald de Windt tur 5 tambe a gana medalla di oro. Djaluna awor, 9:00 di anochi riba vuelo di Inselair e equipo lo regregresá Korsou.

December 4, 2015

Selekshonnan Maskulino i Femenino U-21 di volibol den e di “10th Caribbean Zonal Volleyball Junior Championship”

WILLEMSTAD — Federashon di vòlibòl Kòrsou ta partisipá ku ayera nochi 21:00 pm su dos selekshonnan di junior tantu maskulino komo femenino lo biaha via Trinidad & Tobago pa Georgetown, Barbados kaminda nan lo mester bai kompetí den e di “10th Caribbean Zonal Volleyball Junior Championship”, ku ta un kompetensia pa hungadónan den e kategoria di U-21.

E torneo aki ta wòrdu tene kada dos aña, inisialmente e torneo mester a tuma lugá den luna di yüli. Enbista ku Barbados tabatin difikultat pa por a organisá esaki den luna di yüli a akordá ku lo schuif e torneo pa mas den kabamentu di aña.

E kompetensia manera ariba menshoná ta tuma lugá na Georgetown , Barbados i ta programa pa inisiá dia 6 di Dezèmber i lo dura te ku 14 di dezèmber 2015. E partidonan lo wòrdu hunga den Wildey Gymnasium Garfield Sobers Sports Complex na Wildey, St. Micheal.

E delegashon lo hospeda na Sunbay Hotel, Maxwell Coast Road, Christ Church.

E selekshon maskulino den e último torneo na 2013 a terminá na di 2 lugá tras di e selekshon di Martinique.

E paisnan ku lo kompetí ta den maskulino ta : US Virgin Island, Guadaloupe, Aruba, Barbados, Trinidad and Tobago, Martinique, Haiti i Kòrsou.

Den e sekshon femenino: Martinique, US Virgin Island, Barbados, Trinidad and Tobago, Haiti i Kòrsou.

E delegashon ku a biaha ayera nochi ta konsistí di:

Selekshon femenino:

Pharayne Martina, Maxime Jamaloodin, Sharneska Esclodina, Giany Hooi, Milangela Maduro, Dangela Maduro, Anais Conradus, Marviany Godfried, Djureeny Peternella, Natiouska Geerman, Sha- Ony Obispa.

Head coach: Arthwin Luis

Ass. Coach: Roselyn Mariana

Selekshon maskulino:

Xavern Ellis, Earlyson Martha, Davenson Prosper, Brayton Kleinmoedig, Gedeon Bentura, Marlison Kleinmoedig, Shuruendy Valeriano, Gidonis Eisden, Jonathan Jacobus, Ravner Schoop, Bertwin Luis.

Head Coach: Maverick Alexander

Lider di delegashon: Edsel Cominencia

Arbitronan: Eckersly Servanie, Urly Cornelia.

Federashon di vòlibòl Kòrsou ta deseá e selekshonnan tur klase di éksito den nan kompromisonan na Barbados.

December 2, 2015December 2, 2015

Korsou ku partisipashon na Kampionato Mundial di Peso

WILLEMSTAD — Entre 19-29 November ultimo, a tuma luga e kampeonato Mundial di Peso IWF. Esaki a tuma luga na Houston ,Texas.

Curacao Weightlifting Federation a asisti na e kampeonato importante aki ku un atleta, sr. Hayrich Juliana. Kende a partisipa den e kategoria di 94 Kgs.

Apesar di e kontra tempu ku pa motibunan imprevisto di no por a konta ku asistensha di e coach, henter e delegashon a sa di keda di focus i ku judansa grandi di e lider di e team sr.Ivan de Windt, asisti pa Harvey Newton di Merka i Hugo Themen di Aruba, Hayrich a logra di subi plataforma den gran forma.

E atleta Hayrich Juliana a logra di kibra su record personal den Snatch ku 125 Kgs, pero lamentabelmente a faya den Clean& Jerk 158 Kgs. Aun asi, e atleta a logra ku e proposio di pone un biaha mas nomber di Korsou riba mapa internashonal na nivel mundial.

Durante di e temporada ku e delegashon tabata na Houston, mientras e atleta tabata konsentra riba plataforma di entrenamento, miembronan di direktiva a logra reuni ku diferente representantenan di otro pais ku kulminashon ku un reunion sumente fruktifero ku e presidente di IWF, sr. Tamas Ajan.

Durante e reunion aki, miembronan di direktiva a logra konvense e presidente Ajan, ku aunque e federashon peso di korsou tin e desbentaha di no por konta ku diferente aspektonan ku normalmente un pais ku su Noc ta keda rekonose, pa tog juda e organisashon representando e deporte di peso na korsou i asina logra hanja e confirmashon di por risibi diferente judansa entre otro juda kubri gastunan pa un entrenado kualifika, materialnan etc.

Aparte di esaki tambe a hanja konfirmashon di ku Curacao Weightlifting Federation lo por hanja e oportunidad na manda un coach nivel nashonal bai afo pa un temporada basta largu i akinan profundisa mas riba e tarea di un entrenador.

Huntu ku tur esakinan, tambe diferente petishon a drenta pa Curacao Weightlifting Federation hasi lo maksimo pa traha riba e proyekto pa Korsou bira un di e paisnan kaminda diferente di e federashonnan di otro pais por bini Korsou pa aki sigi nan entrenamento, rumbo pa weganan Olimpiko 2016.

Curacao Weightlifting Federation lo sumamente satisfecho kon e biahe a desaroya, kon henter e delegashon a profila i kada unu a demostra di ta un bon embahador i promoshona no solamente e atleta, pero Korsou tambe.

Curacao Weightlifting Federation tin retonan sumamente grandi su dilanti pa 2016 i despues di evaluashon interno lo bai reuni ku e diferente partidonan pa asina jega na un totalidad.

Un danki ta bai na tur ku a duna sosten, pa CWF logra hasi e biahe aki , na FDOK kende a pone parti di e fondonan di supsidio nesesario pa kubri gastunan di Biahe, FDDK ku Refineria Isla ku a juda kubri gastunan di Uniform, famianan, konosinan tur ku a duna sosten .

December 2, 2015December 2, 2015

Kompetensia di Biyar: Schotborgh Cup

WILLEMSTAD — Pa di tres anja konsekutivo ku Dutch Caribbean Billiard Union huntu ku MacPool Promotions i ouspisia pa e federashonnan di biyar di Bonaire y Korsou, ta organisa e prestigioso evento “Schotborgh Cup “. E evento ku ta dedika na memoria di e ilustre maestro di biyar yiu di Korsou y rekonose internashonal , Eddy Schotborgh (q.e.p.d) ,lo tuma lugar e fin di siman aki di 4 te ku 6 na Poolarena riba Gosieweg.

Un sistema di wega uniko y ku partisipashon di e mihor hungadornan rankea di e dos islanan . Bonaire ku lo ta dirigi pa Sr. Junior de Lanoi ta bini ku e kampion Milton “Tom” Anthony, e talentoso hoben Janiro Chatlein, e veteran Charlton Thomas, Gregory Frans y e konosido gran deportista Constantino”Patun” Saragoza.

E ekipo di Korsou dirigi pa Sr. Sybren Boekhoudt ta forma pa e kampion Bryan Farah, e no 1 aktualmente Jeffrey Nieuwenhuijzen, e no 2 di ranking Roukos Tannouri , e veteran Michael Arvelo y Salim “Machine Gun” Kuzi.Durante di tres dia lo tin bataja fuerte entre e dos selekshonan, na e momentunan aki Bonaire ta ariba dos – sero.

Na 2013 y 2014 nan a bai ku e viktoria ku skor respektivamente di 11-6 y 11-9. Pues e anja aki Korsou lo bini pa trata di kue nan prome viktoria. Bon pa menshona ku 70 porshentu di e reglanan actual di pool mundial ta bini di man di Eddy Schotborgh y tambe e mesa ku lo hunga ariba ta disenja pa e personahe aki ku a risibi homenahe y rekonosimentu di parti di World Pool Billiard Association pa su trabounan ku ela hasi pa engrandese e deporte di pool mundialmente.

Schotborgh Cup ta kuminsa diabierne awor ku apertura mitar di ocho y e prome partido lo inisia ochor en punto , diasabra ta kuminsa pa 19.00 y diadomingu 14.00 .DCBU kier a gradisi tur nan sponsor y kolaboradornan , Curacao Howard Johnson Plaza Hotel ,kaminda deportistanan ta sinti nan mes na kas, De Jongh Sporthuis, MacPool Promotions y Federashon Biyar Korsou. Poolarena ta keda schuin enfrente di Las Vegas Shopping Center, banda kaminda antes tabata Bright Impex. Un y tur ta kordialmente bonbini pa bin apoya nos biyardistanan.

December 2, 2015December 2, 2015

Kampionato Internashonal di Taekwondo TK5 Curaçao 2015

WILLEMSTAD — Djasabra último olympia Taekwondo Association a organisá e kampionato internashonal di Taekwondo titulá TK5 Curaçao 2015 kaminda a partisipá Aruba, Curacao i Surinam. Tur pais tabata tin 5 atleta infantil i 5 atleta junior. E kampionato a bai den e sistema si tagteam kaminda tur pais a bini ku nan mihó atletanan pa kompetí kontra di otro. Mester bisa ku tabata tin peleanan hopi interesante i fuerte. Di tur e peleanan ku tabata tin e team di Aruba a sa di Sali na promé lugá, Curacao a sa di Sali na di dos lugá i Sürnam na di 3 lugá. Un pabien spesial ta bai pa e entrenadó di OTA kual ta Gilson Lourens i tambe Audy Muller ku ta di e skol Gold Medal. E team di infantil di Curaçao a konsistí di, Earthson Thode, Rahim Antonio, Nasser Lahham, Yizar Anthony, Reangel de Windt i Loverson Plaisimond i e team di junior a konsistí di Samuel St. Aubin, Juan Felipe Diaz, Yael Wolf, Theodore Heiliger i Jeancloude Crispulo

E team infantil di Aruba a konsistí di Damon Delamore, Joshua Klaber, Jahmani Eisden i Rasheed Lowe I e junior a konsistí di Hakeem Lowe, Zahyon Klaber, Jourde Klaber, Justin Arrindell I Jayvan Jansen

E team di Surnam a konsistí di Faiz Gummels, Arieen Menso, Rivano Mac-Donald, Jayron Vriesde i Said Djemani i e team di junior a konsistí di Samaki Pinas, Germar Altmann, Ryan Jaggoe, Jair Jaigroep.

E direktiva di Olympia Taekwondo Assocation ta masha kontentu ku e manera ku e aktividat a kana i tambe kier a yama e pueblo di Curaçao masha danki pa a sostené e atletanan Curaçao.

Olympia Taekwondo assocation ta trahando masha duru mes pa por logra sera fondonan di manera ku por sigui traha riba desaroyonan general pa tur su atletanan. Keda pendiente pa mas di Olympia Taekwondo Association.