Category: Otro

Posted on

Eksitoso kampionato habri di Federashon di Yudo

WILLEMSTAD — Djasabra ultimo Federashon di Yudo Kòrsou a organisá su kampionato habri. Un gran kantidat di hobenan yudoka a inskribí pa partisipá na e evento kua a tuma lugá na Sentro Rekreativo Sufisant. Miembronan di Janwe Judo Club, De Oleander, e klup di kas di Sufisant pero pa prome biaha tambe di MMA Caribbean a partisipá. E ultimo klup ta un organisashon nobo bou di guia di e dosente/entrenador Marcel Piepenbrink kua i a presentá ku 5 yudoka, kua Federashon di Yudo Kòrsou tatin e gran plaser di yama bon bini.

Den e kategoria di e muchanan mas chiki, esnan ka gana nan respektivo kategoria di peso i a bai kas ku medaya di oro tabata, Ken-Jay Phelipa di Janwe, Tahir Rosina tambe di Janwe, Dylan Benita di SRS, Jaer Thompson tambe di SRS, Janior Ilario di Janwe, Jayden Jansen di Janwe I por ultimo David de Wolf di Janwe. Serka e muchanan muhe mas hoben Javiene Narvaez Gonzalez di SRS a resultá kampeon.

Di e muchanan te 12 aña di e diferente pesonan a sali vensedor maksimo Reinaldito Casimiri di Sufisant, Raydienne Martina da Silva tambe di SRS, Emil Bakhuis di Janwe i Sharvin Pieter i Rigel van der Elst ambos di SRS. Serka e muchamuhenan den e edat en kestion Jearitee Melfor di SRS a gana oro. Bou di e hobennan tinedjèr Giordanny Samboe i Javy-Ray Ellis ambos di SRS a gana oro serka e maskulinonan i Sanoa Piepenbrink di MMA Caribbean a hiba un bataya fuerte serka e damitanan pa resultá vensedor maksimo.

Den e kategoria maskulino habri, Yvanleah Maria di Janwe a bai kas ku e medaya di oro. Federashon di yudo ta satisfecho ku e nivel tèkniko i kondishonal ku e atletanan a desplegá. Fin di siman benidero un selekshon di e yudokanan di FYK lo partisipá na e kampionato internashonal di Barbados.

Posted on

Sunscape: Kampeon Torneo di Bolas Criollas “We Believe”

WILLEMSTAD — Sunscape, a resulta Kampeon Komersial indiskuti di e grandioso Torneo di Bolas Criollas “We Believe” organisa pa nos amigunan di MCB Bolas Criollas.

E Torneo tabata tin partisipashon di 36 ekipo reparti den tres kategoria, Primeramente den kategoria Femenino tabata e ekipo di Destroyer Warriors a sali di e porta grandi i den e ultimo tirada ta gana di e ekipo di Las Hermanas pa asina Destroyer Warriors titular su mes Kampeon i Las Hermanas Sup-Kampeon, di tres lugar a sali e donjo nan di kas e ekipo di MCB.

Den kategoria Veterano tabata e ekipo forma pa e hungadornan di bario nan di penstraat, monte verde I bisendario ku Remy i Zempy na kabes a gana di e fuerte ekipo kampeon di anja pasa Destroyer pa asina e ekipo bow di nomber NOS NO titular nan mes Kampeon indiskuti Torneo We Believe den e kategoria Veterano mix lagando e ekipo di Destroyer komo Sub-kampeon i di tres lugar a sali e ekipo di mariepampoen Toy & Co ku ku Bacho na kabes.

Finalmente den kategoria komersial despues di un fuerte lucha e ekipo di Isla a keda kortiku saliendo na di tres lugar, i den final ta e kampeonan di anja pasa e ekipo di Sunscape a derota e fuerte ekipo di Building depot ku fasilidat pa asina ripiti nan titulo di anja pasa komo Kampeon komersial torneo We Believe lagando e ekipo di Building depot komo Sub-kampeon.

E ekipo di Bolas Criollas di MCB por mira patras riba un tremendo torneo organisa i prinsipalmente dedika na nos klientenan di SGR Groep.

Tabata siman tras di otro primeramente papa dios a duna e miembro nan e forsa necesario pa e grandioso trabow i tempo dedika na e ekiponan i nos amiguan di SGR groep enberdat tabata un aktividat nunka bisto grandioso, nos di MCB Bolas Criollas ta spera ku mas impresa sigi e pasonan aki i dedika un tiki tempu na nos hendenan ku desabilidat mental o fisiko durante un di nan aktividat en general.

I por ultimo e ekipo di MCB ta gradisi nan management ku a apoya e grandioso aktividat aki i manera semper nos di MCB ta vosivera pa duna bek na bo komunidat i prinsipalmente na institutonan.

Posted on

Kompetensha di Bodybuilding: Mr. Hercules & Most Beautiful Bodyshape

WILLEMSTAD — Djasabra ultimo 24 di november,tabata tin e lastu reunión di BBBC den Veneto Hotel (mini Goirgia Room) un sala jen jen di hende anthousiasma a bin tende e Ultimo desarojonan ku e Committee tin pa ofrece e anja aki na su atletanan y e fanatikada

Djabierne dia 4 Desember di 8or pa 12.30 or tabai tin e pesahe na Veneto Hotel den Mini Giorgio Room y djasabra dia  05 di desémber próksimo, B.B.B.C. ta presentá su di 27 anja di Hercules

E Presidente di BBBC Stanley Francisca a trese dilanti ku na anja 1988 BBBC a nase ,y e anja aki e ta hasi 27 anja konsekutivo di e kompetensha anual titulá

Mr. Herkules i Beautiful Bodyshape (pa damas), e entusiasmo ta grandi.

Boso bin presensia y apoyá nos atletanan lokaal y esnan international.

E Atletanan ta hasiendo nan lastu toke pa djasabra dia 5 december deleita e publiko un bon presentashon y e aña aki B.B.B.C. ta dediká e kompetensha y show na un di nos veteranonan ku a logra varios títulonan lokal i internashonal kual ta

Mr Hercules na 1992, Edward Otto

Pa korona e obra lo tey; e “IFBB Pro”Cedric Mc Millan ku ta kosechando hopi eksito actualmente riba nivel Profeshonal.

Posted on

Ludwenska Apostel: deportista di siman vòlibòl eksolar

WILLEMSTAD — E esensia di deporte ta pa un grupo di hende traha komo unu pa asina sali viktorioso. Den e kaso di kolegio Joseph Civillis A.G.O na Barber e ponensia aki sigur ta konta. Pa motibu ku tabata falta hungadó, e damita Ludwenska Apostel a tuma e kurashi di hunga huntu ku e ekipo maskulino pa asina duna e otro alumnonan tòg e oportunidat pa hunga.

Mas ku esaki e ta hasi su mihó posibel riba e vèlt di vòlibòl i tambe semper ta enkurashá su otro miembro di ekiponan i trankilisá nan ora poko nervio drenta nan. Na skol tambe e ta un alumno ehemplar ku ta presta bon i ta hasi e mihó uzo posibel di e posibilidat ku nan tin pa siña. Ludwenska Apostel nos ta orguyoso di bo.

Na Nòmber di ACU i FDDK Ludwenska risibí su regalito na man di Naisha Santiago.

Un ehèmpel pa hinter e pueblo di Kòrsou..no ta tur ora te abilidat ku bo tin ta konta sino e sakrifisio ku bo hasi pa asina no hasi solamente abo pero hinter un grupo di hende den e kaso ki ekipo mihó. Lèsnan ku no ta solamente importante pa deporte pero bida en general.

 

Posted on

FINA Synchronize Swimming Clinic Curacao 2015

WILLEMSTAD — Manera boso sa mundo di natashon ta pasando den un temporada hopi difisil. Ya pa varios siman nos  federashon no por a tene kompetensia. Mester a para tur aktividat por lo menos te ku Januari otro
anja sperando ku pa e temporada ei nos por sigi. Apesar di e situashon aki, Federashon Aquatiko Korsou ke komparti un nota hopi positivo ku prensa i ku
Korsou.
Tur anja Federacion Internationale de Natacion (FINA) ta yuda nan miembronan finansieramente pa organisa klinika ku fasilitadornan international pa asina traha riba desaroyo di entrenador, huesnan i atletanan ront mundu.
E anja aki FINA a pone fondonan disponibel pa Korsou a traha riba un klinika pa landamentu sikronisa.
E klinika aki lo tuma luga for di dia 29 di november te ku dia 6 di desember. Mirando ku SDK ta sera i aktualmente tur di training di natashon ta tuma luga na Pisina Benny Leito, federashon a hanje ta buska otro lokalidat pa organisa e training aki. Esaki lo tuma luga na Hilton Hotel.
Posted on

Kampionato Internashonal TK-5 Curaçao 2015

WILLEMSTAD — Dianan pa e kampionato internashonal di taekwondo titulá TK-5 Curaçao 2015 ta aserkando. Diferente paisnan lo bin Curaçao pa asina hiba un bataya pa mira ken lo bai ta e kampion di TK-5 Curaçao 2015.

TK 5 ta un kompetensia internashonal ku paisnan ta kompetiendo kontra otro den forma di ekipo kontra ekipo. E kompetensia aki ta wòrdu tene bou di e hóben nan ku ta wòrdu kategorisá komo senior. Senior ta hóbennan di 18 aña pa ariba. Nos aki na Curaçao a disidí pa tene e kompetensia aki bou di e atletanan ku ta wòrdu kategorisá komo infantil. Infantil ta e atletanan di 9 pa 11 aña. Esaki a hasi e kompetensia TK 5 Curaçao bira hopi mas interesante pa diferente pais debí ku nan no tin e tipo di kompetensia nan aki bou e atletanan ku ta wòrdu kategorisá komo infantil.

E aña aki nos a haña petishon di e paisnan pa nos organisá e kompetensia aki bou di e kategoria di junior tambe.  Despues di a sinta den nos propio seno i evaluá e petishon, nos a yega na e disishon pa organisá e kompetensia di TK 5 Curaçao 2015 pa e kategorianan di infantil i junior manera e pais nan a pidi. Pero esei a pone ku nos por a tuma solamente 2 pais so mas huntu ku Curaçao debí ku sino e programa di dia lo bira muchu largu.

Kada pais lo bini ku nan 5 mihó atletanan (infantil i junior) pa mira si nan por logra sali kampion e aña aki. Na aña 2014 Curaçao a sa di Sali kampion.

E atletanan infantil di Curaçao ku ta bou di e entrenamentu di Gilson Lourens  i e atletanan junior ku ta bou di entrenamentu di Audy Muller ta trahando hopi duru pa nan por logra e promé lugá kontra di e paisnan ku ta bini e aña aki. Aruba i Sürnam a manda mensahe bon kla ku kada unu ta trahando hopi duru.

E team di infantil di Curaçao ta konsistí di, Earthson Thode, Rahim Antonio, Nasser Lahham, Yizar Anthony, Reangel de Windt  i Loverson Plaisimond i e taem di junior konsistí di Samuel St. Aubin, Juan Felipe Diaz, Yael Wolf, Theodore Heiliger i Jeancloude Crispulo

E team infantil di Aruba ta konsistí di Damon Delamore, Joshua Klaber, Jahmani Eisden i Rasheed Lowe I e junior ta konsistí di Hakeem Lowe, Zahyon Klaber, Jourde Klaber, Justin Arrindell I Jayvan Jansen 

E team di Sürnam tambe lo bini tánkatan pa buska e titulo di kampion.

Nos kier a pidi e pueblo di Curaçao pa bin apoyá nos atletanan di 9 pa 11 i 15 pa 17 aña. E apoyo ta hopi importante pa nos atletanan.

E kampionato lo tuma lugá na International school, dia 28 di novèmber  2015 di 4or pa 9or p.m. 

Karchinan ta optenibel, 5278018, 5127374, 6717225 i tambe serka e skolnan di Taekwondo aki na Curaçao

Posted on

Randhy Cuevas ta gradisi tur patrosinador ku a hasi su partisipashon na e di 28 edishon di e kareda rondó di e isla di St Maarten posibel

WILLEMSTAD — Mi kier a gradisí Insel Air ku tabata e motor importante pa e soño di mi persona Randhy Cuevas kristalisá i bira realidat.??Si Insel Air no a fasilitá nos ku ticket nan, kaminda ku ta taks so nos mester paga, nos lo tabata tin un gastu di banda 5.000.00 florin na pasashi so sin konta hotèl i gastu nan di vehíkulo pa transportá nos di un sitio na otro i nos lo no a yega St. Maarten. Ta un kareda ku 10 persona ta kore mas o ménos 3 km kada un, i 3 persona na kabes.

Pues ta un biahe ku por sali asta 10.000 florin pa e grupo si Insel Air no a fasilitá nos e ticket nan.

Hañando e parti di ticket a motivá mi pa sigui pusha i organisá subimentu di Christoffel anochi i korementu di baiskel riba un Djadumingu, pa kua tur dos a resultá den un pèrdida. Esaki no a demotivá mi.

Mi a sigui pusha kòrtando mi nanishi daña mi kara i a haña yudansa di un organisashon ku mi no por menta su nòmber.??Pero nan a saka un man nèt den mi mester. Danki na un banko offshore ku no ke su nòmber sali. danki na Porto Médiko i Servisio di Edukashon Hogar i Salu ku a kontribuí ku e granito ku nan tabata por.  I asina mi lucha a sigui, aserkando Sra Antonia di radio MAS ku a duna nos un apoyo promoviendo mi subimentu di seru anochi, huntu ku Z 86 i korant Amigoe ku tambe a hasi su máksimo pa yuda mi ku e fundraising ei ku a bini apénas 3 persona.??Pa kua mi a hiba pèrdida na lugá di ganashi, debí na propaganda ku ma paga pa promové esaki i mester a paga e guia nan si ku a bini.

A move tur mainta i atardi poniendo bòrchi kantu di kaminda, parti flyer i na final 3 persona so a bini.

Limpiando boluntario na diferente sitio for di mi 15 aña te awe.??Subi seru pa fondo pa diferente instansia poniendo mi bida na peliger i ora mi bùrt yega asina aki ta paga mi?

A ni sèn mi a pidi.??Ma pone un aktividat ku ta e preis ei mi sa kobra pa subi anochi den mi trabou normal.??I niun hende no a bin.

Mi ta trese tur e historia aki pa mustra dikon, ku hopi honor i rèspèt e team a karga e nòmber di Insel Air Cocktail Team, pasombra sin Insel Air hamas nos lo a yega St. Maarten i pió ainda  gana.

Pues pueblo di Kòrsou e hòmber aki ku a kaba di subi Christoffel 12 bia riba un dia pa haña fondo pa kumpra bus pa transportá hende nan den ròlstul, a pasa trabou i pasa den hopi stress, pa por a logra e biahe aki paso nos no ta sostené nos mes hende nan manera ami si ta hasi.

Mi mester a ekspresá mi mes, i libra e peso aki for di mi kurpa ku kada bes di nobo ta pasa no ku mi so, sino ku hopi mas ekipo i??individual nan ku ta bai afó pa kore pa nan bandera.

P’esei for di profundidat di mi kurason, mi ke yama danki na primeramente Dios ku a proveé Insel Air, Porto Médiko i Servisio di Edukashon Hogar i Salu, e banko offshore i e otro organisashon, ku nan por a yuda redusí e gastu nan i ku nos a gana e di 28 edishon di e kareda rondó di e isla di St Maarten.  Un danki di Kurason!

Posted on

HENNY METRY HUNGADÓ DI A?A 2015

WILLEMSTAD — Federashon di Tènis di Mesa Kòrsou a saka djabièrne ultimo su hungadó di aña 2015. E hungadó aki a resultá Henny Metry ku durante 2015 tabata e hungadó ku tabata mas konsistente a base di bon resultado.

T’asina ku ta determina e hungadó di aña a base di ranking. Esun ku resulta na final di aña ku mas punto ta wòrdu deklará komo tal. Riba kalendario di federashon tin un kantidat di torneo ku ta valido pa ranking. E sistema di puntuashon ta  wòrdu stipula den un reglamentu di ranking.

A partisipa durante 2015 33 hungadó na torneonan ku ta valido pa ranking i e top 3 di aña aki a resultá komo tal:

  1. Henny Metry         ku 120 pto
  2. Sigmar Carmelia   ku 117 pto
  3. Jaysron Mathilda   ku 105 pto

Aña pasá tabata Dimitri Leon ku a resultá e hungadó di aña i Henny Metry a keda na segundo luga.

Posted on

Kampionato habri di Yudo: Federashon di Yudo Kòrsou Open

WILLEMSTAD — Djasabra próksimo di 28 di novèmber, Federashon di Yudo Kòrsou lo organisá e kampionato Habri “Federashon di Yudo Kòrsou Open”. Kompetensia lo start 10 or di mainta i lo kontinuá te mas o ménos 1’or di atardi. Entrada ta grátis, i e kampionato lo tuma lugá na sentro rekreativo Sufisant (antes klup di Shell).

Posted on

DEVON MEILINK KAMPIÓN DI KÒRSOU DEN TÈNIS DI MESA 2015

WILLEMSTAD — Den un sala Irene Moreno  na Muizenberg ku basta publiko, Devon Meilink ta kue e titulo di kampión di Kòrsou, derotando Jaysron Mathilda konvisentemente ku skore di 4-0.

Devon Meilink ku e aña aki a hunga su prome aña den nos federashon, ta un hungadó ku ta hunga un wega diferente na mayoria di nos hungadonan den A-klas. Ku su dos diferente tipo di rubber, kaminda un ta un material ku ta kibra velosidad di e bala, ta hasi su wega hopi efektivo kontra su kontrikantenan ku tin ambos rubber ku velosidat.  Ban mira kon e hungadonan ta bai akopla na wega i sigur esaki lo bai hasi un proksimo biaha e trabou di Devon mas difisil. Despues ku na Òktober ey e ku su ekipo Perfect Bartenders ya a bira kampion di ekipo e la sa di kue 2 titulo mas . Ademas di a bira kampión di Kòrsou den Kabayero  individual djabièrne ey, tambe huntu ku su kompañero di ekipo Michael Dalnoot nan a sa di kue e titulo di Kabayero dòbel derotando e duo di Dimitri Leon i Ronaldi Vos.

Ata aki e resultadonan: 

FINALISTANAN PA DJABIERNE DI E DIFERENTE KATEGORIANAN
Kategoria skore
U11 Yazir Anthony Ronnelly Vos 3-1
U15 Jean Claude Hoek Nasir Ignacio 3-2
U18 Riordan Ilario Christian Lee Marten 3-1
kabayero enkel Devon Meilink Jaysron Mathilda 4-0
Master Ronaldi Vos Raymond Begina 3-0
Damas dòbel Daniella / Cyrella Geraldine / Jenny 3-0
Damas enkel Mary Ann Macleod Cyrella Rosalia 3-0
Kabayero dòbel Devon / Michael Dimitri / Ronaldi 3-1
Dòbel Miksto Jaysron / Mary Ann Ronaldi / Ronnelly 3-0

 

Facebook Twitter Instagram Youtube
© 2024 Deporte Awe. Tur derechi reservá. Diseñá pa E² Media