Category: Otro

Posted on

Ekipo di sòftbòl forma i dirigí pa yunan di Kòrsou biba na Hulanda ta titulá kampion invikto

HULANDA — Djadumingu ultimo 20 di sèptèmber 2015 aya na Capelle aan de Ijssel, e ekipo di sòftbòl Eurostars derotando e ekipo di Storks for di Den Haag ku e skore di 20–0 a titulá kampion sin pèrdè ningun wega durante e temporada di sòftbòl 2015.

Eurostars dames 3 ta un ekipo kual a wòrdu lanta i forma pa yunan di Kòrsou biba den Rotterdam i bisindario i ta hungando bou di e organisashon di beisbòl i sòftbòl Eurostars na Capelle aan den Ijssel.

Nunka antes den historia dje organisashon di Eurostars un ekipo kual ta forma parti dje organisashon a yegá di titulá kampion invikto.

E ekipo aki ta wòrdu forma pa e siguiente hungadónan: Charlotte(Lotty)Padmore, Lucerita(Lucy )Hooi ex- Pichingolo, Lyandra(Lyan)Balentina, Radna Mambi, Ediliana(Edira) Muskus, Nica Lovera, Zahaira(Za)Padmore, Judeska(Deka)Alberto-Martis, Naity Jantji, Annahelis(Anna)Mitchell – Francisca, Shuhailys(Shuly)Hooi, Shermaline(Chuchi)Candelaria, Jessica (Jessy)Hazel i Meral Euser kual ta e úniko Hulandes den e ekipo.

E kuerpo tékniko ta konsistí di Aubrey Martina i su asistentenan Eugene (Pietje) Martina, Datchenko (Dash) Willems i Jaime Margaritha i e parti atministrativo ta den man di Astrid (Moe) Alexander.

Nos ekipo por a gosa di sosten di dos spònser kual nos ta gradisí inmensamente pa nan sosten.

Huntu ku fanátikonan, famia i spònser a selebrá e título den kantina di Eurostars ku músika di un DJ, Brassband i un grupo di tambú.

Posted on

Pachanga di domino dedika na Chin Martina

WILLEMSTAD — Esaki ta e gruponan di dominó ku a klasifiká pa e gran final di Pachanga di dominó: Karpinteria Fernando, Kibrahacha, Nos goso, UTS, Game Over, Juana, Stirla corner, Pega piedra, Tuturutu, Gainan di pariba.

Djadumingu; 27 di sèptèmber 2015 lo tin e gran final Pachanga di dominó dediká na Chin Martina na Barbuquet nr 6.

Pool ganadó; karpinteria Fernando, Kibrahacha, Nos goso, UTS, Game over, Juana, Stirla corner, Pega piedra, Tuturutu, Gainan di pariba.

Pool di konsuelo;Amarant, Palu blanku, Nos por, Videvi, Raspa bon, Schot special, Mampuritu, Mester por,Cardine rose, Extreme, The brothers.

Nos ta pidi tur ekipo pa tei trempan pasombra mitar un ta tira lòt, pa nos start nèt 1’or p.m. en punto.

Posted on

Atletanan di Buladó ta regresá di kompetensia internashonal ku 24 medaya i un meet record

WILLEMSTAD — Resien Buladó Swim Club a partisipá na e kompetensia internashonal ‘EU SWIIM’ kual ta un kompetensia ku ta tuma lugá na Europa pa 10 aña kaba pero e aña aki e organisashon a skohe pa tene na Orlando, Florida. E klup di natashon Buladó a partisipá ku 7 atleta di diferente kategoria di edat.

Head Coach di Buladó, sr. Antonio Nuñez i su coaching staff a prepará e atletanan aki dirigí pa e kompetensia ‘EU SWIIM’. E 7 atletanan aki a duna un bataya fuerte kontra di paisnan manera Bahamas, Estádos Unidos, Republika Cheko, Rusia, Egipto, Estonia,British Virgin Islands i Ecuador. E atletanan lokal ku a partisipá ta Shade Vermeulen, Shaquantaly Bomberg, Angel Priest, Kaelen Betrain, Dean Jansen, Samuel Oleana i Vince Treurniet. Den e kompetensia aki Shade Vernuellen a pone un record nobo den su kategoria. E team di Buladó a regresá Kòrsou ku un total di 24 medaya i un meet record.

Buladó kier a gradisí tur ku a kooperá pa por a hasi partisipashon na e kampionato internashonal aki posibel. RBC Bank, Insel Air i Curacao Tourism Board. Naturalmente tambe mayornan di nos atletanan. Buladó lo keda prepará su hóben atletanan pa kompetí no solamente lokal, pero tambe na nivel internashonal.

Atletanan ku ke bira miembro di Buladó Swim Club por registrá via web: http://www.bulado.net òf e página riba Facebook di Buladó Swim Club.

Posted on

Kampeonato Femenino di Ahedres 2015

WILLEMSTAD — Fin di siman binidero Federashon di Ahedres Korsou (FEDAKO) ta organisá su grandioso kampeonato nashonal di ahedres pa nos ahedresistanan femenino na Kòrsou. Ta di 4 anya konsekutivo ku FEDAKO ta organisá e gran evento aki.

Manera tabata e kaso durante e añanan anterior e kampeonato femenino lo tuma lugá den e sala di konferensha di e spònser ku ta Lions Dive & Beach Resort na Bapor Kibra.

E kompetensia ta konsistí di 5 buèlta di kual 3 partido lo tuma lugá riba djasabra 26 di sèptèmber kuminsando 13:00 ’or i 2 partido riba djadumingu 27 di sèptèmber kuminsando 10:00 ‘or. Seremonia di premiashon i klousura lo tuma luga djadumingu 16:00 ‘or di atardi den mes sala di konferensha.

Partisipashon ta habri pa tur nos damanan ku konose o ta praktika e wega di mas bieu na mundu.  Lo tin premionan disponibel pa diferente kategoria di edat. Ademas e partisipantenan por akumulá punto pa por representá Kòrsou den eksterior.

Un invitashon ta bai na tur hende muhé pa usa e oportunidat aki pa reta i trata di kita e korona for di e e aktual kampeon Ailen Mena, kende ta den fuerte preparashon pa bai representa nos pais na e kampeonato mundial hubenil di ahedres ku lo tuma luga di 24 di oktober pa 6 di november proksimo na e peninsula Chalkidiki di Grecia.

Inskripshon pa ahedresistanan femenino menor di 21 aña ta kosta fl. 5 i miembronan di FEDAKO por partisipá grátis. Tin posibilidat pa inskribí riba e djasabra di e evento te ku 12 ‘or di merdia.

Pa mas inskribi of pa mas informashon riba e evento di e wikent aki por manda un mail na curacaochessfederation@gmail.com of yama Jimmy Izijk via 512 0007

Posted on

Kampionato di Bodybuilding & Fitness

WILLEMSTAD — Djasabra 19 di September e Kampionato di Bodybuilding & Fitness a tuma luga den Exhibition Hall di World Trade Center. 30 atleta a subi esenario pa mustra e resultado di trabou, dedikashon i disiplina di hopi luna.

Un evento ku a kuminsa 8:30pm i kaba 12or. Ku Giovanni Abath komo Meastro di Seremonia, Dj NATSUJ, 11 hurado, presensia di honorabel Sra. Minister Dick y un sala jen di fanatiko di e deporte i di atleta.

Manera hopi sa tabata tin e kompetensia di Mr. Olympia na Las Vegas ku hopi ta wak i sa bai tambe. Mester bisa si ku CBBFF tabata tin e honor di tin Mr. Jerry Wheeler, ku a keda sin bai Mr. Olympia, pa bin presensia e Kampionato di Korsou!

E inovashon di e direktiva actual pa ku e Kampionato di e an?a aki tabata e Mini EXPO, kaminda Kuster Trading, Sokudi, Powertec No-X-cuse, Princess Wilhelmina Fonds, Pitbull Sports, Perfect Body Fitness i Weight Training Coach.

Porta a habri for di 4pm pa por pasa na e booth nan pa han?a informashon ku por yuda bo ku bo “HEALTHY LIFESTYLE”, ku tabata e nomber di e EXPO.

E evento a kuminsa ku e presentashon di e atleta nan, sigi? pa Himno, algu?n palabra di presidente Aldemar Pieters (ku a presenta su miembro nan di direktiva ku tabata tin 3 ta kompeti e anochi i unu komo coach). Despues di esaki e kompetensia a ranka sali. Tabata tin un pauze 10:30pm ku a duna publiko e oportunidat pa pasa na e booth nan pa despue?s kontinua ku e kompetensia.

Resultado di kada kategoria:

WELTER WEIGHT CLASS up to including 75kg

Ganado Urlyson Janga
2nd (Di dos luga) Alfredo Garcia 3rd (di tres luga) Leonard Rosales 4th Aisheron Philips

LIGHT MIDDLE WEIGHT CLASS up to including 80kg

Ganado Jimson Janga
2nd Steven Maria
3rd Joseluis de Quintal

LIGHT HEAVY WEIGHT CLASS up to including 90kg

William Sanchez

MIDDLE HEAVY WEIGHT CLASS up to including 95kg

Regis Loo

HEAVY WEIGHT CLASS up to including 100kg

Jonathan “BigJohn” Janzen

SUPER HEAVY WEIGHT CLASS over 100kg

Marion Bentoera

BIKINI FITNESS up to 1.66cm

Ganado Deydania Mauricio Rodriguez
2nd Altagracia Martis
3rd Dinotra Andrade Costa

BIKINI FITNESS over 1.66cm

Ganado Marvia Laurence
2nd Chureska Janzen

MEN’S PHYSIQUE up to including 1.74cm

Ganado Dinyor Antonia
2nd Richny “Remi” Frans
3rd Zahir Hamud
4th Heinrich Wilson

MEN’S PHYSIQUE over 1.74cm

Ganado Mitchel Martina
2nd Guido SChorea
3rd Jaamie Whittle
4th Rolstan Engelhardt

OVERALL BIKINI
Deydania Mauricio Rodriguez

OVERALL MEN’S PHYSIQUE

Dinyor Antonia

OVERALL WINNER MEN & BEST POSER

Marion Bentoera

CBBFF ta kier a gradisi su sponsor nan:
Powertec-No-X-Cuse, WTC, Marriott Hotel, Weight Training Coach, Kusters Trading, UTS, Body Evolution, Bob Esprit Gym, Heart Beat & Wellness Center, Life Line Fitness, Willy’s Gym Center, Top Fit Gym, #SintiBoLiber i Celebrations. Masha danki mes pa bosnan sosten i kontribushon.

Posted on

Boluntariado pa Deporte

WILLEMSTAD — Pa yega na un plan di maneho pa Boluntarionan den deporte, direktiva di FDOK ta organisá un tayer spesial ku tema “Boluntariado pa Deporte”. Den e charla aki,lo amplia riba e tópiko pa promoshon, oumento i kordinashon di boluntario pa deporte na Kòrsou, i kreashon di un infrastruktura den atministrashon di FDOK pa registrashon di boluntario pa deporte, pa kontribuí den organisashon di un “database” di boluntario pa deporte.

Dia: djadumingu 27 di sèptèmber 2015

Ora: 15.00 pa 18.00 ‘or

Lugá: Teatro Luna Blou

Lo tin un orador speshal kual ta sra. Catherine Forde kual ta un BA, EMSM, di Trinidad & Tobago, konferensista renombrá den komunikashon, technologia, gerensia i atministrashon di deporte.

Si bo ta dispuesto na partisipána e charla aki riba loke bo tin na bo kurason riba tòpiko aki, bo ta kordialmente invitá na e charla aki den un ambiente ameno i konstruktivo pa inspirá envolvimentu di boluntarionan den deporte.

Registrashon adelantá pa e charla aki ta nesesario. Asina nos por sòru pa bo ta konfortabel pa bo por pone tur bo atenshon riba e tema interesante aki. Pues registrá mas pronto ku ta posibel na info@fdok.cw Bo presensia ta altamente apresiá.

Posted on

SMS Endurance Team ku tremendo selebrashon!

WILLEMSTAD — Wikènt tras di lomba SMS Endurance Team tabatin selebrashon di nan di 2 lustro ku un eksitoso kareda di BMX. Tabata The 4th SMS BMX Challenge ku a hiba di titulo “10 years making dirt look good”. Wer a koperá hopi bon, di moda ku tur kos por a kana manera planiá.

SMS Endurance Team a probechá di e oportunidat pa yama danki na nan spònser prinsipal ku ta SMS Attorneys at Law, presentando un plakat na representantte di e prestigioso bufete aki ku tabata señor Roy Bottse. Tambe a yama danki na fundadónan i coachnan di e tim ku ta srs Gerrit Scheper, Fred Scheper, Nelson Antonisia, Johnny Sprockel i sra Carina Hieroms.

A honra tambe e koredó ku a bai 10 aña kompletu ku e tim, ku ta Millard M.J. Petrona.

Na e okashon aki tambe SMS a presentá nan ünifòrm nobo.

Un inovashon tambe tabata e echo ku e kareda a kuminsá atardi i bai kaba anochi bou di lus.

Un públiko grandi a presentá pa apoyá e koredónan. A kore kategorianan di edat i tambe open class i performance Devo ku ta bula e “pro section”.

Koredónan ku a sali number un den nan kategoria ta: Zion Koeyers, Shahir Boelijn, Verónica Manzano, Clifford Soerka, Jean-Carlo Adriana, Ty-reese Eustatius, Karen Sommer, Qyhaila Perez, Shurendrick Sebastiana, Jozua Martina, Chariph Langguth, Jeremy Kirindongo, Reugently Paulina, Daniel Paz, Goshue Keep, Millard M.J. Petrona i Lainbert Merselina.

Den e kategorianan di open class Daniel Paz i O’Brian Valorian a bai ku e promé premionan, mientras ku den Performance Devo e koredó Lainbert Merselina a bria.

E anochi aki tambe por a kompeti pa un “Team Cup” ku a bai pa Generation Next.

Durante di kareda SMS Endurance Team a hasi hopi koredó kontentu, rifando premionan valioso i tambe 2 baiskel, kortesia di Dasia.

SMS Endurance Team kier a yama danki na prensa deportivo ku a yuda promové e kareda, spònsernan di e kareda ku ta SMS Attorneys at Law, Refineria di Kòrsou, Asogas, Dasia, CWM, Aannemersbedrijf Antonisia, Majous Interiors, tur team, tur mayor, tur koredó i pueblo di Kòrsou en general. Danki na bosnan ku SMS por mira atras riba un kareda super eksitoso!

Posted on

Yudoka Reginald De Windt Ta Gana Medaya Di Bròns Na Bolivia

BOLIVIA — Fin di siman pasa, na Santa Cruz, Bolivia e yudoka Reginald de Windt, a gana medaya di bròns na e kampionato Sur Amerikano pa seniornan. E kampionato kua a wòrdu organisá bou di ouspisio di e Konfederashon Pan-Amerikano di Yudo (PJC) por a konta ku presensia di yudoka for di mayoria pais suramerikano. De Windt a sa di konkistá e di tres lugá den e kategoria te ku 100 kilogram dor di gana di e, faborito lokal Boliviano den e pelea pa medaya di bròns ku e skor di ipòn.

Posted on

Kon nos por mehorá deporte na Kòrsou?

WILLEMSTAD — Pa yega na su plan di maneho stratégiko 2017-2020 pa deporte, direktiva di FDOK a organisá diferente seshon speshal kaminda kada grupo di interes por a kontribuí ku ideanan inovativo na e retonan ku e sektor di deporte ta enfrentá.

19 di sèptember, di 10.00 pa 13.00 ‘or
na FDOK, Roodeweg
e delaster oportunidat pa bin duna bo opinion.

Kisas bo no a alkansá un di e seshonnan spesifikamente pa bo grupo di interes. P’esei FDOK ta organisá un enkuentro final kaminda tur hende ta bonbiní.

Si bo ta dispuesto na dialogá tokante loke bo tin na bo kurason riba nos retonan, bo ta kordialmente invitá na un seshon habrí den un ambiente ameno i konstruktivo pa inspirá envolvimentu máksimo di tur e personanan presente.

Registrashon adelantá na e seshon aki ta nesesario.

Posted on

Evento di ahedres Chit Chat Chess a resulta un gran eksito

WILLEMSTAD — Djasabra 5 di september ultimo a tuma luga un evento masha interesante di ahedres den teras di e kafetaria Chit Chat Cafe.

E ahedresisita bake Ursus van Bemmelen a enfrenta no menos ku 19 fanatiko di tur edat simultaniamente kendenan a pone e eksperto soda bastante durante kasi tres ora largu.

Tambe durante e evento un kantidat di ahedresista hoben te ku edat di 12 anya por a trata di skor kontra e kampeon nashonal Maestro di FIDE Fabio Mensing kende tabata tuma solamente 1 minut pa pensa henter un wega.

E hungadornan ku a logra gana o tabla kontra Ursus van Bemmelen of Fabio Mensing lo a risibi premio di e cafetaria ku a auspisia hinter e evento.

Di e 19 ahedresistanan ku a enfrenta Ursus van Bemmelen solamente Piet Simonis a logra gana su wega i un premio, mientras Fabio Mensing a gana 22 di su 24 weganan ku ela hunga. E damitanan Aarona Koenraad i Daniela Wanga tabata esnan ku a logra gana un premio.

E evento tabata bon bishita i grandi i chiki por a disfruta di e dushi ambiente i weganan, kual ta indikativo ku e evento aki sigur ta bal un ripitishon.

Facebook Twitter Instagram Youtube
© 2025 Deporte Awe. Tur derechi reservá. Diseñá pa E² Media