Otro Archives | Page 2 of 38

May 4, 2022May 13, 2022

Resultado Bola 8

WILLEMSTAD — Federashon Biyar Korsou wikent ultimo, dianan 30 di april y prome di mei , a organisa otro evento ku a konta ku partisipashon di 27 biyardista. E biaha tabata turno di e disiplina di bola 8 .

Bon partidonan , jena ku tirunan eksepshonal a keda presenta pa e fanatikonan ku tabata presente. Den e ultimo partidonan di e buelta di ganador , Gio Ariza a kai vensi kontra Gemajel Rol ku skor di 6 pa 5 y Fauzi Halaby ta gana Sybren Boekhoudt 6 pa 4.

Den e prome partido di semifinal Rol ta gana Halaby 6 pa 4 y pasa pa final. Den buelta di perdedor Fauzi Halabi ta bini duru bek y ta sali viktorioso kontra Boekhoudt ku skor di 6 pa 3 y pasa pa final. Den e partido final Halaby a bin pa tuma revancha kontra di Rol y ta duna tremendo partido y ta bai ku e titulo , skor final 7 pa 3.

E evento aki tabata patrosina pa Montana Bierhuis y House of Billiard Play. Aki ta sigi e resultadonan ofishal. Empata na puesto 5 Michael Arvelo y Gio Ariza , puesto 4 Jeffrey Nieuwenhuijzen , puesto 3 Sybren Boekhoudt , supkampion Gemajel Rol y kampion Fauzi Halaby . Pa e fin di luna aki Febiko tin programa e disiplina di bola.

April 25, 2022April 27, 2022

Miguel Ramos a domina torneo di ahedres sin mustra kompashon den su prome aña ofisial komo hubenil

WILLEMSTAD — Djadumingu 24 di aprel 2022, ‘Curacao Youth Chess Institute’ a organisá su torneo anual di ahedres e biaha aki pa e kategoria hubenil. E kategoria hubenil (óf U18) ta konsisti di hobenan ahedresista ku durante aña 2022 ta kumpli 18 aña di edat of menos.

E talento Miguel Ramos kende lo bai kumpli 13 aña den 2022 a demonstra su habilidatnan ku ela desaroya atraves di tempu i logra derota tur 5 kontrinkante ku ela enfrenta.

Miguel Ramos a kaba e torneo ku un skor perfekto ounke ta tin diferente ahedresista fuerte entre e 22 partisipantenan. Na di dos i di tres luga a termina Dylan Léañez i Dianthely Pourier tur dos ku kuater punto. Ta bon pa menshona ku Daniel Léañez tambe a skor 4 punto, pero e programa di pareo digital a indika ku basa riba punto di resistensia Daniel a keda na di kuater luga.

E hoben ahedresistanan a bataya fuerte durante weganan sumamente interesante i e skornan a resulta hopi perta, mirando ku e diferensia entre e puesto nr. 2 puesto i e finalista nr. 11 ta solamente 1 punto. E resultadonan final tabata lo siguiente.

Ganadónan di trofeo ‘Overall’:

Miguel Ramos 5 punto
Dylan Léañez 4 punto
Dianthely Pourier 4 punto

Ganadónan di medaya den kategorianan di edat:

U14 Miguel Ramos
U16 Dylan Léañez
U18 Gabrielle Winklaar

Curacao Youth Chess Institute ta satisfecho kon e torneo hubenil a kana i ta anima tur ahedresista hoben pa prepara pa e proksimo evento ku ta e torneo eskolar 5 di yuni binidero.

April 13, 2022April 13, 2022

Di 10 Edishon di Koningsspelen

WILLEMSTAD — Riba 29 di aprel próksimo nos ta selebrá e di 10 edishon di Koningsspelen huntu ku tur mucha di skol básiko na Kòrsou.

E tema di e aña aki ta SINTI BO FET.

Ku e tema aki nos ke reta tur alumno i dosente pa ta fet of aún mas fet den 2022.

E tema ta importante i sigur relevante den e temporada aki. Tambe e ta kuadra perfekto ku nos konsepto tradishonal di desayuno i moveshon.

E aña aki mas ku 50 skol básiko a inskribí pa partisipa na e fiesta mas dushi di aña: Koningsspelen òf manera nos a boutisé: Weganan di Rei!

E evento deportivo ta idea i inisiativa di e Komishon Nashonal di Inougurashon di Rei Willem Alexander. For di 2013 ta selebrá Weganan di Rei tur aña di nobo. Ku e fiesta aki nos ta spera di por kontribuí na un komunidat konektá, deportivo i salú.

Manera a menshoná anteriormente, desayuno i aktividatnan deportivo ta partinan tradishonal na nos Weganan di Rei. Tur skol ku ta partisipá ta liber pa duna kontenido na e dia deportivo aki manera nan ta desea. Di e forma aki nos ke inspirá i konsientisá tur mucha, inkluso mayornan, ku un bon desayuno i deporte ta importante pa nos salú.

Pa tene nos “desayuno royal” mas balansá i variá posibel nos a opta pa kombiná produktonan salú i tambe dushi. E intenshon ta pa nos muchanan tin sufisiente energia pa e parti deportivo di e dia aki. Meskos ku añanan anterior nos lo ofresé tur alumno ku ta partisipá un desayuno GRATIS, e donashon aki ta sosode bou di guia di Fundashon Fudsek i Mavis Albertina. Tur skol ku ta partisipá na Weganan di Rei lo risibí tambe un pakete spesial ku artikulonan deportivo pa huza durante di ‘gymles’ i hungamentu pafo.

Weganan di Rei 2022 ta posibel danki na nos spònsernan: Reda Sosial, Sektor di Kultura i Deporte, Afas Software, Curaçao Ports Authority, Curoil, Corendon Mangrove Beach Resorts i Vertegenwoordiging van Nederland op Curaçao. Nos ta sumamente agradesido pa kada un su aporte i koperashon.

Skol Básiko ta hunga un ròl importante den e desaroyo físiko i deportivo di kada mucha. Dia 29 di aprel pròksimo mas ku 14.000 mucha di skol básiko, huntu ku nan maestronan, lo partisipá na e fiesta úniko aki. Ban hasi Weganan di Rei 2022 un selebrashon inolvidabel pa nos muchanan di Kòrsou.

Mavis Albertina kordinadó Koningspelen Caribisch deel van het Koninkrijk der Nederlanden https://www.facebook.com/CaribischKoninkrijk/.

April 11, 2022

Jie-Peng Wu a resulta sorpresa grandi durante torneo infantil ku skor perfekto

WILLEMSTAD — Djadumingu 10 di aprel 2022, ‘Curacao Youth Chess Institute’ a organisá su torneo anual di ahedres pa e kategoria infantil na e skol Frater Aurelio den Pietermaai. E kategoria infantil (óf U12) ta konsisti di e grupo hoben di ahedresistanan ku riba 1 di yanüari 2022 ta tin 11 aña di edat of menos.

Jie-Peng Wu kende luna di mart ultimo a gana e torneo di Nobato di ahedres, a bin determiná pa mustra esnan ku mas eksperensia ku e no a bin djis pa dibertí.

Jie-Peng a logra gana tur su sinku weganan, inkluso den buelta number kuater kontra e talentoso Björn Elisa. Na momentu ku e dos hungadornan Björn i Jie-Peng a topa otro, nan tabata komparti e prome puesto huntu ku 3 punto kada un.

Un otro prospekto nobo ku a logra finalisa den e tres prome puestonan ta e damita Liana Pieter kende sigur nos lo tende hopi mas di dje den futuro.

E tenshon i tambe e emoshonan tabata hopi haltu durante e kompetensia ku diferente wega hopi interesante kual a produsí e siguiente resultadonan.

Ganadónan di trofeo ‘Overall’:

1. Jie-Peng Wu 5 punto
2. Liana Pieter 3.5 punto
3. David Augusta 3 punto

Björn Elisa tambe a score 3 punto, pero e programa di pareo digital a indiká ku basa riba punto di resistensia David Augusta ta keda na di tres luga.

Ganadónan di medaya den kategorianan di edat:

U8 Joël Karjopawiro

U10 Dylan Andrew

U12 Jie-Peng Wu

E damita ku a presta miho den e grupo femenino i ku tambe a risibí un medaya di estímulo tabata Liana Pieter ku 4 punto.

Curacao Youth Chess Institute ta felisitá tur partisipante i spesialmente e ganadónan ku a logra gana premio i ta invitá tur ahedresista hoben pa bin partsipá na e siguiente kompetensia kual ta un torneo hubenil (U18) riba 24 di aprel 2022 proksimo.

March 28, 2022

Eksitoso Interkambio Deportivo Entre Boneiru i Kòrsou den Waterpolo na Kòrsou

WILLEMSTAD — Despues ku tres siman pasa Kòrsou a interkambiá na Boneiru ku e kategorianan di U12 i U14, den e fin di siman di 25 pa 27 di aprel 2022 e ekipo di waterpolo di Boneiru, Barracudas, tabata na Kòrsou pa un interkambio deportivo den waterpolo ku Swim Club Orca Curaçao (Orca).

Djabièrnè e aktividat a tuma lugá na Pisina Bennie leito; Orca U12, e partido aki a kana bon i a hunga tres periodo. Aki e atletanan di Orca a sa di gana e partido aki ku skor di 11 pa 2. Orca a dominá e partido.

Orca U14, e partido aki tabata hopi kayente i despues di pèrdè dos wega na Boneiru tres siman pasa, e atletanan di Orca a trein duru i a sa di gana e wega aki 9 pa 7. Bon wega, tur dos ekipo a duna tur ku tin.

Djasabra e aktividat a tuma lugá na Pirate Bay, Piscadera, dilanti di e pir di CARMABI. Aki a meks atleta nan di Boneiru i di Kòrsou huntu i traha dos tim di U12 i tres tim di U14 i laga nan drai un torneo èntrenan. U12, kada tim a hunga seis wega di dos periodo i U14 kada tim a a hunga 8 wega di dos periodo. E dia tabata largu i pisa, pero fruktífero.

Djadumingu e aktividat a tuma lugá na Pisina Bennie Leito; Orca U12, a hunga un partido di dos periodo i por a mira ku e atletanan di Boneiru a hasi nan esfuerso, pero Orca a sa di gana ku skor di 7 pa 0.

U14, Boneiru a apliká un strategia riba e tim di U14 di Kòrsou i a sa di dominá Kòrsou sigur pa gran parti di e wega. E wega tabata kayente atrobe. Bon wega bringa di parti di tur dos ekipo. Barracudas a sa di gana e wega ku skor di 9 pa 6.

Den e fin di siman di 01 pa 03 di aprel U16 i U19 di Orca ta bai Boneiru pa interkambia ku Barracudas.

Direktiva di Orca ta gradisí tur atleta pa nan komportashon i prestashon, mayornan ku a yuda durante di e aktividat aki, atletanan di Orca waterpolo señor ku a supervisá riba djasabra i a flùit e weganan ofishal, coachnan i Orca su “jeugdtrainer” nan ku a drai e programa di djasabra kompleto i a coach e tim di U12, personanan ku ta sostené i yuda direktiva di Orca, danki pa e gran trabou ku nan tur a desplegá durante di e aktividat. Boso a hasi un tremendo trabou. Danki na e spònsernan ku ta hasi posibel tur loke Orca ta organisá i hasi pa nos hóbennan di Kòrsou.

March 11, 2018

Kòrsou ku Mas di 40 Trofeo den Kompetensia di BMX na Florida

MERKA — Di 22 pa 25 di Febrüari 2018 Kòrsou a partisipá na un kompetensia internashonal di baiskel BMX ku a tuma lugá na Oldsmar, Florida USA, yama “Gator Nationals”.

Selekshon di Kòrsou a konsistí di 24 siklista ku ja pa hopi tempu ta entrená na e pista Internashonal di Global BMX aya na Damacor. Bou di guia di nos coachnan lokal nos por a mira e kosecha di e preparashon intenso aki ora ku Kòrsou a logra konkistá mas ku 50 trofeo durante e kuater dianan di kompetensia internashonal aya na Oldsmar Florida USA.

E resultado general den diferente kategoria, tabata lo siguiente:

Enzo Henriquez 1* Promé lugá, 1* di seis lugá
Deshawn Agard Finalista
Gabriel Herrera 1* Promé lugá, 1* di dos, 1 di tres lugá
Zainho Paulina 2* Promé, 2* di dos lugá
Shahir Boelijn 2* di dos lugá, 1* di tres, 1* 4 lugá
Kylen Louisa 2* di dos lugá, 1* un di sinku lugá
Mauro Herrera 1* Promé lugá, 1* di tres lugá, 1* di kuater
Caelan Broos 1* di kuater
Nigel Richardson
Chariph Langguth
Ginsley Schotborg 1* di kuater lugá
Jeremy Kirindongo
Didion Bonifacio 5* Promé lugá, 1* di tres lugá
Jayden Schoenmaker 3* di dos lugá, 2* di kuater lugá
Vennies Vorst 1* Promé, 1* di dos, 1* di tres
Joshua Petronilia 3* Promé lugá, 2* di dos lugá
Shadon Ostiana
Goshue Keep 2* Promé, 1* di kuater den Super Cross
Lakisha Richardson 2* di dos lugá, 2* di tres, 1* di kuater
Djuraine Finies 2* di tres, 1* di kuater
Andey Steinbach 1* di tres, 2* di kuater
O’brian Valorian
Jozua Martina 4* di dos lugá
Benjamin Zimmerman 1* di tres lugá

Pabien na tur e siklistanan ku a saka kara di Kòrsou en grande.

Danki na “Curacaosche Wieler Bond” (CWB) i danki spesial na tur e sponsornan ku a kopera pa hasi e biahe aki posibel.

Un danki mashá spesial mester bai na e fasilidat Internashonal di Global BMX Track aya na Damacor, kaminda ku e siklistanan ja pa años ta entrenando pa siña nan por kompetí na nivelnan altu tantu lokal komo Internashonalmente.

September 12, 2017

Komunikado di Michael Arvelo – Rèfri Sertifiká pa World Pool Billiard Association

WILLEMSTAD — Di 14 pa 26 di ougùstùs, Michael Arvelo riba invitashon di Confederacion Panamericana de billar tabata na Argentina kaminda ela fungi komo hefe di arbitrahe durante di e kampionatonan Panamerikano di pool.

Su tremendo aktuashon a habri mas porta, sigur kaminda ku ela risibi invitashon di Sr. Juan Rafael Cruz Pérez kende ta e persona enkargá ku e sekshon tékniko di Komité Olímpiko Nicaragüense. E invitashon ta den kuadro di e di 11 juegos Deportivos Centroaméricanos kual lo bai tuma lugar den luna di desèmber benidero. Shete pais, kual ta Belize, Costa Rica, El Salvador, Guatemala, Honduras, Nicaragua y Panamá.

Nan lo ta parti di e weganan aki. Michael Arvelo lo ta biahando di 10 pa 15 di oktober pa duna kurso na 22 persona ku lo bai fungi komo rèfri durante di e weganan aki. Di 11 pa 13 lo duna e kurso den e sede ofisial di komité olímpiko nicaragüense. Esaki ta un logro mas ku nos hendenan ta profilando na nivel altu den mundu deportivo internashonal.

Tin dos invitashon pendiente pero no lindura pa Perú y Panamá. Michael lo duna e kurso tantu pa arbitrahe di pool y tambe pa karambola. Pa esnan ku no sa, Michael Arvelo ta refri sertifiká pa WPA world pool billiard association for di òktober 2006 i por aktua den tur evento internashonal ku ta ouspisiá pa WPA

Pa mas informashon por komuniká ku Michael Arvelo na 567-4636 of via mail macarvelo1957@gmail.com

September 12, 2017

Waaigat Proyektá pa ta Zona Aquatiko Number 1 den Karibe

WILLEMSTAD — Fundashon Waaigat a lanta ku e meta prinsipal pa aportá na e status di Waaigat komo zona rekreativo mas kotisá den Karibe. Direktiva di Waaigat ta konsistí di Raymond Begina (presidente), Erwin Raphaëla (sekretario) i Eduardo “Dito” de Kort (tesorero). Huntu ku Curaçaose Atletiek Bond i ku sosten di algun empresa, manera Licores Maduro, Bureau Telecommunicatie & Post, UTS, MCB i Refineria ya fundashon Waaigat a logra organisá e promé edishon di Dia di Waaigat, planiá pa djadumingu 17 di sèptèmber binidero di 12or di mèrdia pa 8or di anochi.

E intenshon ta pa tur aña tene Dia di Waaigat i si ta posibel agregá partisipantenan for di eksterior, bini ku demostrashonnan aquatiko i of konkursonan yamativo i moderno, pero interesá turistanan tambe pa rekreá den e “Binnenwater” aki. Fundashon Waaigat komo tal tin e firme propósito pa sòru ku aktividatnan sosial, kultural, edukativo, rekreativo i deportivo di kalidat ta dominá den e área aki, di manera ku Waaigat lo ta ku muchu mas frekuensia den un spòtlait positivo. Énfasis ta ademas riba subi kalidat di e awa i alsa e nivel di seguridat di Waaigat. Konsientemente lo hasi uzo di revistanan internashonal i of otro medionan te asina leu ku ta posibel pa krea kontaktonan ku ta garantisá un alkanse grandi den esfuersonan pa promoshon i oumento di e konosementu di Waaigat. Ku su aktividatnan Fundashon Waaigat en prinsipio ke stimulá e kustumber ku tantu den Waaigat mes komo rondó di e “Binnenwater” ta organisá un variedat di evento, ku ta debidamente planifiká i desaroyá. Asina ei Fundashon Waaigat a tuma pa su mes e enkargo di inventarisá e tipo di eventonan ku ta kuadra pa tene den e área tan úniko aki.

Komo tal ta e intenshon pa riba tèrmino kòrtiku start ku kampañanan intensivo di konsientisashon di komunidat di Kòrsou riba kon kuida e área aki i hasié e “Binnenwater” mas atraktivo den Karibe i otro partinan di mundu.

Konkurso di sakamentu di pòtrèt

Netamente den e kuadro aki mester mira i konsiderá e kòntèst di pòtrètnan di Waaigat ku ta tuma lugá dia 17 di sèptèmber, durante Dia di Waaigat djadumingu awó. Pòtrètnan ku ta partisipá na e konkurso aki mester ta saká e mesun dia! Na esnan ku ta partisipá na e tremendo kòntèst di sakamentu di pòtrèt di Waaigat, e súplika pa yena un formulario di inskripshon, komo e prueba di ta aseptá e reglanan di partisipashon. Ademas ta asina ku mester entregá e pòtrèt(nan) ku nan ta partisipá kuné promé ku 5or di atardi pa un hurado ku konosementu di sakamentu di pòtrèt por someté e pòtrètnan na un evaluashon profeshonal i krítiko, anto asina ei saka e ganadó, ku lo bira doño di premionan atraktivo.

Dirèkt despues di Dia di Waaigat lo sigui ku otro aktividatnan interesante, tur ku e propósito pa rápidamente trese mas bida den e área di Waaigat. Direktiva di Fundashon Waaigat ta invitá pueblo di Kòrsou kordialmente na Dia di Waaigat, djadumingu awor 17 di sèptèmber, ku lo ta di 12or di mèrdia pa 8 or di anochi i ta pidi pa laga nos hasié un enkuentro ku hopi ambiente, espektakular i inolvidabel pa hinter famia. Ta pidi ku bini ku bandera di Kòrsou i mas tantu posibel e kolonan di nos bandera dominá e dia ei. Tur ku ke aportá ku idea of sugerensia na Fundashon Waaigat por tuma kontakto libramente ku miembronan di e fundashon.

June 16, 2017June 16, 2017

FDDK Ta Presentá Resolushonnan Di Kongreso Di Deporte 2017 Na Konseho Di Minister

WILLEMSTAD — Manera ta ampliamente konosí, durante di e fin di siman di 8 pa 10 di yüni a tuma lugá e Kongreso di Deporte 2017; ‘Integrá, Aselerá, Elevá’, organisá pa Fundashon pa Desaroyo Deportivo Kòrsou. Tantu e instansia organisadó komo partisipantenan a kategorisá e kongreso komo unu super eksitoso.

Pa medio di e kongreso aki, FDDK a ofresé un plataforma ku a duna oportunidat pa integrashon multi- disiplinario, integrashon multi-deportivo i opinion multi-kultural, ku aksento riba ‘Nation Building’. E kongreso a sirbi alabes pa konopá e diferente rekomendashon-, opinion- i inisiativanan di nos lidernan deportivo ku e meta pa inspirá nos akadémiko, profeshonal i – atletanan i tambe tur lider ku ta aktivo direkto òf indirekto den mundu di deporte, pa nos ban traha e siguiente 3 pa 5 aña ku tur nanishi den e mesun direkshon.

Riba djarason 14 di yüni FDDK a presentá e resolushonnan di e kongreso ; ‘Integrá, Aselerá, Elevá’ na Konseho di Minister. FDDK ta spera ku nos Gobièrnu tuma bon nota di e resolushonnan i apliká esakinan den maneho inter–ministerial di Gobièrnu di forma ku dia di mañan hinter komunidat por kosechá frutanan di esfuersonan realisá en konhuntu. Un pueblo ku tin e motivashon, akseso i fasilidat pa praktiká deporte, ta un pueblo ku ta biba i pensa salú i ta un komunidat produktivo.

Nos tin pruebanan di sobra kiko deporte por nifiká pa ‘nation building’ i dunando apoyo na deporte nos por konstruí piedranan fuerte pa sigui desaroyá nos pais.

June 16, 2017

Pisina Enith Brigitha a Habri Bèk

WILLEMSTAD — Djaluna último, funshonario di GGD huntu ku personal di FDDK, a tuma muestra di e awa di Pisina Enith Brigitha pa por hasi tèst despues di a hasi limpiesa na e pisina; esaki, despues ku algun antisosial a vandalisá nos pisina.
Djaweps 15 di yüni mainta a drenta e bon notisia ku e resultado ta perfekto i konsekuentemente, for di djaweps mèrdia a reanudá tur aktividat bèk na e pisina.

FDDK ta gradisí su personal, CUROIL i tur demas persona ku di un òf otro manera a yuda pa Pisina Enith Birgitha por ta operashonal bèk den menos tempu posibel.