Category: Otro

Posted on

Di 5 edishon di Kampionato Cazova hubenil na Kòrsou

WILLEMSTAD — Di 8 pa 12 di yüli, Cazova (Caribbean Zonal Volleyball Association) tin e di 5 edishon di Cazova hubenil pa mucha muhé U16. E biaha aki Kòrsou a hañá e derecho di organisá e torneo aki.

E torneo lo tuma lugá den Sala Errol Rooi na SDK. E apertura ofisial lo ta, awe, djaweps 9 di yüli entre 19.00 i 20.00. Pais nan partisipante ta Bonaire, Barbados, Trinidad & Tobago i Kòrsou.

Skema di partido:

PRELIMINARY – ROUND SET Result per set (points)
No. Date Time Teams 1 2 3 4 5
1 9-Jul 17:30 TTO vs BAR
2 9-Jul 20:00 CUR vs BON
3 10-Jul 09:00 BAR vs BON
4 10-Jul 10:30 CUR vs TTO
5 10-Jul 18:00 TTO vs BON
6 10-Jul 20:00 CUR vs BAR
SEMIFINALS SET Result per set (points)
No. Date Time Teams 1 2 3 4 5
7 11-Jul 17:00 1st vs 4th
8 11-Jul 19:00 2nd vs 3rd
FINAL CLASSIFICATION 3/4 SET Result per set (points)
No. Date Time Teams 1 2 3 4 5
9 12-Jul 16:00 Loser #7 vs Loser #8
FINALS SET Result per set (points)
No. Date Time Teams 1 2 3 4 5
10 12-Jul 18:00 Winner #7 vs Winner #8
Posted on

Jean Paul Da Silva De Goes i Ethan Westera ‘Vice World Champions’

ITALIA — Siman pasá, for di 29 di yüni te ku 4 di yüli, 2015, e kompetensia Mundial di windsurfing – IFCA JYM Slalom World Championship 2015 – a tuma lugá na e bunita sitio di Reggio Calabria. E prestigioso Kampeonato Mundial aki, ku ta konosí den e mundu di windsurfing pa su nivel masha haltu, tabatin 71 windsurfer profeshonal for di Fransia, Italia, Austria, Noruega, Peru, Spaña, Slovenia, Hulanda, Aruba i Kòrsou, kende a partisipá den e kategorianan di ‘Junior’, Hubentut, Masters 35+, Hubentut i ‘Junior’ pa Mucha Muhé.

Kòrsou tabata bon representá den e kategoria ‘Junior’ U-17 pa e talentoso ‘Windsurfer’ i  Kampeon Mundial ‘Junior’ U-15 na 2013, Jean Paul Da Silva De Goes, di 16 aña di edat.

Aruba tambe tabata bon representá den e kategoria di Hubentut pa e Kampeon Mundial ‘Junior’ U-15 na 2011 i ‘Junior’ U-17 na 2012 pa Ethan Westera, i pa Nik van den Eerenbeemt i Mark Tjon.

Durante e tres dianan promé ku e evento, e windsurfernan a trein den bientunan di un averahe di 16 nudo pa ora, pero durante e sobrá di e siman e bientu a baha konsiderablemente, loke a obligá tur e partisipantenan pa usa nan ekipo mas grandi durante henter e kompetensia. Riba e promé dia di e kompetensia tabatin un bientu mínimo di 11 nudo, loke tabata sufisiente pa a inisiá e promé eliminashon pa tur kategoria. Pero djis despues e bientu a baha, di moda ku no tabata posibel pa finalisá e promé eliminashon riba e dia ei.

Durante e di dos i di tres dianan  Mama Naturalesa a nenga di koperá, loke a hasi imposibel pa por a kompetí debí na tiki bientu. Riba e di kuater dia e bientu kayente a kuminsa supla mainta trempan, loke a hasi posibel ku por a kompletá e promé i e di dos eliminashon. Riba e di sinku dia (e último dia di e kompetensia) a logra efektuá dos eliminashon mas, p’asina henter e flota di partisipantenan den kategoria  ‘Junior’ i ‘Hubentut’ keda finalisá, ku bientunan mínimo di 11 nudo, ku ta aseptabel segun reglanan di e kompetensia.  Despues di 12  pustamentu pa un total di 4 eliminashon, di kual esun di mas malu a keda deskartá, e resultado di nos hóbennan Hulandes-Karibense tabata ekselente.

KÒRSOU: Ku un enorme demostrashon di talento, velosidat i profeshonalismo, e kompetensia riba awa tabata un bataya kontínuo entre Kòrsou, Fransia i Italia. Kompetiendo den su kategoria entre 31 di e atletanan mas eksperensiá i rápido di tur parti di mundu, e hóben windsurfer Jean Paul Da Silva De Goes a kompetí ferosmente riba awa kontra e kampeon di Oropa di 2015, e Franses Jimmy Thieme, i a mantené  e promé puesto te na e último minüt den su kategoria durante tres di e kuater salidanan di e kompetensia. Durante e di kuater salida Jean Paul a pèrdè un tiki velosidat, pa motibu di kaída di bientu un ratu nèt ora e tabata nabegá rònt di e promé bui, anke ku e  tabata husa su ekipo mas grandi, ku e konsekuensia ku el a pèrdè su posishon den e final di e ganadornan. Desafortunadamente,  esaki a resultá den un puesto mas abou den e resultadonan total.

E inkonbenensia aki tabata na bentaha di e kompetidor Franses, kende a rekuperá di su fayonan riba e promé dia, i a sali ganador den e último salida i konsekuentemente a sali Ganadó di e Kampeonato Mundial, ku un diferensia mínimo den punto, siguí mesora pa nos Yu di Kòrsou, Jean Paul Da Silva De Goes, awor e ‘Vice World Champion’ U-17, na di dos lugá, i Mathis Guillou di Fransia den e di tres lugá.

ARUBA: E bataya entre esnan mas rápido den e kategoria ‘Hubentut’ tabata entre e talentonan profeshonal di Aruba, Ethan Westera, Fransia i Slovenia. Ethan Westera, ku un velosidat manera wélék,  tabata  na promé lugá durante henter e kompetensia, pero un fayo chikitu na prinsipio di e di kuater salida a pone ku el a pèrdè su promé puesto, i a bira e ‘Vice World Champion’ 2015 den e kategoria ‘Hubentut’. E promé puesto a bai pa e Franses Nicolas Goyard i e di tres puesto pa Basile Jacquin, tambe di Fransia. Ku un tremendo prestashon Nik van den Eerenbeemt di Aruba a logra e di kuater puesto.

Den ‘Hubentut Mucha Muhé, e ganador tabata Marie Somonet di Fransia. Den ‘Juniors’ U-17, e ganadó tabata Oceane Bellon di Fransia. Den e kategoria ‘Masters 35+’ e ganadó tabata Andrea Rosati di Italia.

Nos pabien ta bai pa nos hóbennan Karibense-Hulandes pa nan ekselente prestashon. Un danki spesial ta bai pa e spònsernan individual pa nan sosten. Sin nan yudansa e partisipashon di nos atletanan lokal den eventonan internashonal lo no tabata posibel.  Pa mas informashon  riba e evento aki, bishitá e ‘link’ riba e página IFCA di FB https://www.facebook.com/pages/IFCA/157643720947394

 

Posted on

Atletanan di Kòrsou den top 10 den kompetensia Tiglon

Willemstad — Atletanan Hayrich Juliana i Bas Casper di Crossfit 5 Triple 9 di Kòrsou a partisipá na e kompetensia di Crossfit TIGLON na Hulanda djadumingu ku a pasa dia 28 di yüni i a logra sali den e 10 mihónan. TIGLON ta un kompetensia entre e mihó atletanan i organisashonnan di Crossfit na Hulanda. Pa promé biaha Kòrsou tambe ta partisipá na e kompetensia ku dos atleta. Esaki tabata e promé representashon di atletanan lokal, ku ta hasi Crossfit na Kòrsou, na un kompetensia den eksterior. A sobra 2 dia di kompetensia mas na kual e atletanan di Kòrsou por kompetí, i na final di aña lo saka De Fitste van Nederland i De Fitste Box (sinónimo na gym) van Nederland.

E aña aki TIGLON ta konsistí di 3 dia di kompetensia i promé ku kada kompetensia e atletanan mester kualifiká dor di hasi e diferente WODsnan. Kada WOD, ku ta un seri di ehersisio, por konsistí di hisa peso (weightlifting), gemnastik (tùrnen), forsa i kondishon (Strength & conditioning). E 20 mihónan di kada kualifikashon ta sigui pa e dianan di kompetensia.

Na promé lugá, Crossfit 5 Triple 9 ta orguyoso ku tur 2 atleta, di entre 176 persona a kualifiká pa e promé dia di kompetensia dor di sali den tòp 20 i nan ta mas orguyoso ainda ku durante e dia di kompetensia mes tur 2 a sali den tòp 10. Hayrich Juliana a sali na di shete(7) lugá i Bas Caspers na di nuebe (9) lugá. Ámbos su prestashon tabata sumamente bon si tene na kuenta ku nan ta kompetí ku e ganadó di De ‘Fitste van Nederland’ di Hulanda i otro atletanan ku a partisipá na e kompetensia Crossfit Regionals entre diferente pais di Oropa.

Na diferente parti di mundu tin kompetensianan di Crossfit tantu riba nivel lokal, regional komo internashonal. Crossfit ta hañando fama rònt mundu i ta mihó konosí komo “The sport of fitness”; via un seri di ehersisio ta tèst bo aptitut òf kapasidat a base di resistensia, stamina, forsa, fleksibilidat, vigor, spit, koordinashon, agilidat, balansa i presishon. Atletanan di Crossfit ta train pa por ehekutá diferente ehersisio na un nivel físiko hopi kompetitivo. Ku otro palabra, nan speshalisashon ta amplio, pa por hisa kosnan pisá, pa por demostrá stámina i koordinashon den diferente movementu, manera landa, kore, karga i hisa bo propio kurpa, ets.

Crossfit 5 Triple 9 tin solamente 1 aña i mei di eksistensia. E box ta afiliá na e organisashon mama i ta spera di por train hopi atleta mas di Kòrsou pa por kompetí riba nivel internashonal. E box ta situá den kurá di St. Jozef VSBO na Otrobanda i tin mas ku dosshen miembro i tres coach ku ta sertifiká den e diferente áreanan. Por bishitá e FB página i website pa sigui e desaroyo i informashonnan tokante Crossfit 5 triple 9.

Posted on

Jean-Julien Rojer i Horia Tecau ta gana nan promé partido na Wimbledon

LONDON — Jean-Julien Rojer huntu ku su partner Romano Horia Tecau a sali riba bon pai den na promé partido na Wibledon. Rojer i Tecau a hunga apénas 15 minüt promé ku nan a pasa pa e di dos buèlta. Den e partido Jean-Julien i Horia a bai ariba ku skor di 3-0 den e promé set kontra e duo Lukas Rosol i Martin Klizan promé ku esakinan a retirá for di e partido.

Den e di dos buèlta di e kompetensia e duo Rojer/Tecau lo topa ku Andre Begemann i Julian Knowle.

Posted on

Resultado kampionato Kata i Kumite

WILLEMSTAD — Djasabra ultimo a tuma lugá kampionato di kata individual i tambe kampionato kumite (pelea) pa ekipo. Kata ta e ehersisio hasi dor di e karateka kaminda e ta simulá akshonnan di defensa i atake kontra diferente kontrinkante ku ta atak’e for di diferente ángulo. Kata ta un parti importante di praktiká di karate, pasobra un kata bon ehekutá ta yuda forma e karateka mihó.

Tabata hopi interesante mira kon e muchanan a prepará pa ehekutá nan respektivo kata.

Den e kampionato di djasabra a partisipá solamente Karate-do Curacao i Wado Karate Curacao. No obstante nos por mira bek riba un kampionato ku akshonnan elektrisante.

E resultadonan ta lo siguiente:

Kata kategoria A: 1. My Thing Wu(WKO), 2. Veronica Manzano(WKO) I 3. Endjomar Becker(WKO)

Kata kategoria B: 1. Faith-Diva Hendricks(WKO), 2. Quyon Silie(KC) I 3. Rosenne Montina(WKO)

Kata kategoria C: 1. Richantily Michiel(KC), 2. Eldjenmar Becker(WKO) I 3. Christina Ange Jules (WKO)

Kata kategoria D: 1. Luuk Weber(KC), 2. Delano Born(KC) I 3. Ernst Schoop(WKO)

Kumite Ekipo:

  1. WKO
  2. KC
Posted on

Ronde Klip Shootout 2015 edishon nr. 4 di luna di yüni Vakashon

WILLEMSTAD — FAC y su Komishon Organisadó ta sumamentu kontentu ku tur e reakshon nan positivo nan ku ta drenta di e kareda nan di fin di siman tras di lomba ei ku ta e Real Street Legal na Curaçao International Raceway.

Djasabra awor dia 27 di yüni ta kontinuá e kareda nan di Ronde Klip Shootout, ku e pointseries pa skohe e mihó nan shofùr nan di 2015 den e kategoria nan Box, No Box, Street Bracket y Street E.T. Bike.

Ya ta hopi ta e koredor nan ku ta preparando pa yega pa asina perfekshoná nan presentashon kaminda hopi ta esnan ku a redlight, breakout y tambe ku des perfekto tékniko durante e kareda interashonal. Nan tur ei ta prepará pa nan yega liña djasabra awor pa asina drecha i prepará mas mihó pa loke ku a bai robes.

E puntuashon den Street Bracket e Tòp 5 ku ta outo nan ku ta kore di 18.00 pa 14.00 sekònde riba tire slicks:

1. Otmar Conradus (VW Golf VR6 “La Viagra”) – 260 points

2. Julien Bonifasio (Toyota Starlet Turbo “Dynamic 1”) – 227 points

3. David Tannelek (Toyota Starlet Turbo “Baasbol”) – 200 points

Djendjo Florentina (Toyota Alteza ) – 200 points

4. Ethley Martina (Toyota Starlet) – 167 points

5. Sharnella Martina (Toyota Starlet) – 160 points

E puntuashon den No Box e Tòp 5 ku ta outo nan ku ta kore di 13.99 pa 9.20 sekònde riba tire slicks:

1. Hanleyson Engelhart (Pontiac Firebird) – 260 Points

2. Senthley Martina (Toyota Starlet Turbo “Diablito”) – 251 points

3. Otmar Baloche Sr (Chevy Corvette “Otmars Toy”) – 227 points

4. Mitchel Fonseca (Plymount Duster) – 200 points

5. Renato Haseth (Ford Mustang “Mr. Punch” – 160 Points

David Tannelek (Toyota Starlet Turbo “Baasbol”) – 160 points

Javier “Porky” Augusta (Toyota Corolla “Gregorcito” ) – 160 points

E puntuashon den Box e Tòp 5 ku ta outo nan ku ta kore di 11.50 pa 8.50 sekònde riba tire slicks:

1. Virgil Henriquez (Plymouth Duster “Mr Holley 2”) – 227 points

2. Shairon Maduro (Ford Capri “Not Available” – 220 points

3. Rignald Dolorita (Chevy Camaro Z-28 “Mr, Punch 3”) – 207 points

4. Ronald Mendez (Plymouth Valiant “Purple People Eater”- 200 points

5. Akito Berkemeyer (Chevy Camaro “Mr, Dijk Jr.”) – 180 points

E puntuashon den Street E.T. Bike e Tòp 5 ku ta e motosaikel nan ku ta kore di 11.50 pa mas rápido:

1. Raymich Martis (Suzuki Hayabusa “HyDraulic Hose Racing”) – 260 points

2 Urny Martina ( Suzuku Hayabusa “Merite Racing”) – 200 points

3 Christopher “Cleo” Soerka (Suzuki Hayabusa “JCJ Racing) – 180 points

4 Patrick “Pat” Isenia (Suzuki Hayabusa “Quart Mile Racing”) – 167 points

5 Echo Henrique ( Suzuki Hayabusa “ Young Nigger Racing”) – 160 points

Jorge Vieira (BMW S1000 RR “ Vieira Racing “) – 160 points

Djasabra 27 di yüni “Ronde Klip Shootout” ku porta i inskripshon ta habri for di 18.00 (6’or). Pa 19.00 (7’or) te ku 20.00 (8’or) tur outo ku tire slicks tin chèns pa hasi nan pas’é nan di tèst.

Kòrda ta solamente pa outo nan ku Tire Slicks òf Semi Slicks. Despues di 20.00 (8’or) ta kuminsá ku e kualifikashon nan. Entrada pa adulto ta Ang. 10,= i mucha bou 12 aña ta drenta pa Ang. 5,=.

Danki ta bai na Auto City, ARPO Body shop, EMS Dyno, AVF Antiliaanse Verf Fabriek, Star Motors, Curoil, Monster, Napa Auto & Truck Parts, Alcolado Glacial, Kuzeta, IEPA Agencies ku LS2300.

Pa mas informashon y foto di e aktividat di Street Legal i kareda nan lokal i internashonal por bishita nos website nan ofisial: : www.curacaodrag.com, www.dragactioncuracao.com, www.tcobcur.com, www.adrena-zine.com, www.rpmaruba.com, www.racejunkies.com, www.radicalcompetition.com www.exoticboost.com huntu ku nan página di FaceBook y tambe riba FaceBook like page di BoyzToyz i speedoutlawscuracao i exoticboostcuracao i exoticboostaruba i Real Street Outlaws.

Posted on

Kampionato Hubenil di Ahedres wikènt benidero

WILLEMSTAD (FEDAKO) — Durante wikènt benidero, dia 20 i 21 di yüni pa ta eksakto, Federashon di Ahedres Kòrsou (FEDAKO) lo tene su kampeonato Hubenil di ahedres pa nos ahedresistanan te ku 20 aña. E aña aki e evento lo bolbe tuma lugá na Sentro di Bario Janwe.

Na e evento di djasabra próksimo por partisipá muchanan ku a nase na aña 1995 of despues. Tur mucha ku partisipá lo hunga den un solo grupo pa determiná ken lo bira kampeon di ahedres hubenil 2015. Na final di e kompetensia di 5 buèlta di 1 ora pa wega pa kada partisipante lo evaluá resultadonan individual pa premiashon den diferente kategoria di edat.

FEDAKO ta ekstendé un invitashon na tur nos hóbennan amante di e deporte noble pa hasi akto di presensia i bin kompetí djasabra i djadumingu awor.

Inskripshon ta kosta fl. 5,– pa mucha i mester registrá 09:30 ‘or na Sentro di Bario Janwe pa partisipá.

Pa mas informashon por yama 512 0007.

Posted on

Promé kampeonato di ahedres infantil a resultá un gran éksito

WILLEMSTAD — E talento David Pietersz kende tabata un di e faboritonan na inisio, a bira Kòrsou su promé kampeon di ahedres Infantil. No ménos ku 32 ahedresista hóben a partisipá djasabra 6 di yüni ultimo, na e promé kampeonato lokal infantil pa nos muchanan te ku 14 aña di edat.

Federashon di ahedres Kòrsou (FEDAKO) a disidí pa banda di e kampeonato hubenil anual, pa kuminsá organisá tambe un kampeonato infantil di ahedres di 5 buèlta tur aña pa tin un stimulashon èkstra pa e grupo di muchanan te ku 14 aña. Tin vários pais ta organisá kampeonatonan di ahedres infantil i e organisashon di ahedres mundial (FIDE) tambe ta organisá su kampeonatonan mundial tur aña pa diferente kategoria di edat kuminsando for di 8 aña.

Na FEDAKO su promé kampeonatonan infantil ta tin dos partisipante ku apénas 6 aña kendenan tabata Jaydely Hooi (1.5 punto for di 5 wega) i Luca Saleh (2 punto for di 5 wega). Durante e weganan tabata parse ku e mayornan i espektadornan tabata bou di mas tenshon ku e muchanan ku tabata kompetí. Apesar di tur tenshon FEDAKO a keda sumamente satisfecho ku e manera ku e event aki a kana.

Despues di 5 buèlta ku 15 minüt pa kada persona pa kada wega David Pietersz a resultá e vensedor overall ku e máksimo kantidat di 5 punto.

Awor ku e grupo infantil a kalentá nan mente, FEDAKO ta spera di yama nan tur bon bini aki dos siman, riba 20 i 21 di yüni na su kampeonato hubenil 2015 pa tur nos hóbennan bou di 21 aña.

E resultadonan final i den e diferente kategorianan di edat tabata lo siguiente:

Overall

  1. David Pietersz 5 punto
  1. Argeenie Pieters 4 punto
  1. Taqesyah Marcos 4 punto

Kategoria U14  

  1. David Pietersz
  1. Argeenie Pieters
  1. Jean-Maurick Mathilda.

Kategoria U12

  1. Taqesyah Marcos
  1. Wiek Herben
  1. Savino Every

Kategoria U10

  1. Xavier Werleman
  1. Noah Gomez Cassares
  1. Xander Léañez

Kategoria U8

  1. Fréderic Simonis
  1. Daniel Léañez
  1. David de Wolf
Posted on

Torneo Master 40 plus

WILLEMSTAD — Djaweps ultimo Federashon Tènis di Mesa Kòrsou tabatin su torneo di Master 40+.

E biaha aki a hasi falta algun hungadó klave pa motibu di leshon, entrenan Peter Wong, Hensley Wentwoord, Lucien Alberg i Eric Adamus. Di otro banda nos tabatin di Bonaire Erik van Veenendaal, e kampeon di nos isla hermana ku a bin partisipá.

En total tabatin partisipashon di 13 hungadó, entrenan Kòra Faneyte ku a bin purba su suerte. E weganan a wòrdu hungá den e buèlta preliminar ku 3 grupo, enkabesá pa Henny Metry, Ronaldi Vos i Erik van Veenendaal . Despues pa yega semi final lo mester di 4 hungadó. Sin problema e kabes di gruponan a gana nan wega i pasa pa semi final. E di 4 hungadó mester a keda disidí entre Napi Boekhoudt i Rouchel Hernandez. Kontrali na e ultimo torneo di B-klas, kaminda Rouchel a bira kampeon, e biaha aki Napi a tuma revancha i derota Rouchel i asina pasa tambe pa semi final.

Den semi final si Napi mester a baha kabes pa Henny Metry, miéntras aya banda Erik van Veenendaal a gana Ronaldi fásil 3-0.

Den final Henny Metry a mustra di kon aktualmente e ta number 1 rankeá i ta gana di Erik den un wega bon bringá ku skore di 3-2. E parsialnan tabata 13-11 / 13-11 / 10-12 / 6-11 / 11-6.

E próksimo torneo lo otro siman djárason 27 di Mei. Ta un torneo pa damas, kaminda ta bai kompetí pa Kopa Lulu Salas.

Posted on

Bryan Farah Kampion Bola 8

WILLEMSTAD — Wikènt tras di lomba Federashon Biyar Kòrsou a organisá su evento mensual individual ku a konta ku partisipashon di 26 biyardista. E biaha aki a toka turno na e disiplina di bola 8 , ku a kuminsá djaweps y terminá djadumingu. Pool Arena riba Gosieweg tabata esenario di e torneo aki kaminda por menshoná ku tabatin enkuentronan masha emoshonante i un di nan sigur ku mester hasi menshon di dje ta e enkuentro ku a tuma lugá entre William Ochoa y Enrique “ShonRi” Jacobino.

Ochoa ku ta un hungadó hopi agresivo ku semper ta ataká pa bai ku e viktoria, a sali riba e mes un pia i a mustra ku e ta na kaminda pa gana e partido. Pero e no a tene kuenta ku ShonRi un veterano ku su edat respetá di riba 80 no ta kualke daldo di bola sino un biyardista ku amplio trayektoria.

Faltando un punto mas pa bai ku e viktoria, Ochoa ta hañe ta pasa den un kos ku nunka mas e lo por lubidá. Ganando e partido 6 pa 3, e ta bin sufri un derota ku skor di 7 pa 6 i te dia di awe no a tende mas di Ochoa.

Djadumingu tabata otro dia elektrisante den buèlta di pèrdèdó, Roukos Tannoury ta topa Shamir Tremus i Salim Kuzi kontra Johnny Hellmund. Tannoury i Kuzi ta gana i Tremus y Hellmund ta keda na un empate na puesto 5. Despues ta siguí e enkuentronan entre Michael Arvelo y Bryan Farah den buèlta di ganadó. Farah ta pèrdè i ta bai pa topa e ganadó entre Tannoury y Kuzi, e ultimo ta resultá e ganadó. Roukos Tannoury ta terminá na puesto 4. Den un enkuentro maratóniko Farah ta logra gana pa pasa pa final i Kuzi ta keda na puesto 3.

E ultimo partido ku a bai kaba den mardugá di dialuna tabata otro “thriller”. Michael Arvelo ta sali desidido pa bai ku e viktoria pero ta lubidá ku ta ku otro trabuko e ta den final . Ta bon pa menshoná ku Farah y Arvelo ta dos di e tres biyardistanan ku tin mas título gana aki na Kòrsou den e ultimo 25 añanan. Naturalmente esun ku mas titulo ta The Legend Johnny Hellmund.

Michael ta sali bai dilanti 4 pa 1 , despues 6 pa 2 , 7 pa 3 i 8 pa 4 . Aki e kos a bòltu i faltando un mas pa bai ku e viktoria Farah ta saka tur su eksperenshanan akumulá durante di e 25 añanan tras di lomba i ta duna tremendo bataya i ta sali viktorioso ku skor di 9 pa 8.

Un tremendo enkuentro entre e dos klasifikadonan ku lo representá nos pais den e próksimo kampionato Pan-Amerikano na Buenos Aires, Argentina . Federashon Biyar Kòrsou ta felisitá tur e finalistanan ku a kai den premio i ta rekordá tur miembro ku e próksimo evento lo ta bola 10 i ta tuma lugá di 26 pa 31 di mei. Interesadonan por kuminsá inskribí tur dia di aktividat na Pool Arena.

Facebook Twitter Instagram Youtube
© 2025 Deporte Awe. Tur derechi reservá. Diseñá pa E² Media