Category: Otro

Posted on

Traspaso di fasilidatnan deportivo pa FDDK

WILLEMSTAD — Riba 19 di mart 2015 direktiva di Fundashon Desaroyo Deportivo Kòrsou (FDDK) a tuma over e “beheerovereenkomst” pa e fasilidatnan Stadion di Suffisant, Pisina Bennie Leito i Stadion di Rif. Direktiva di Stichting Exploitatie Sportterreinen & Stichting Zwembad Curaçao ku ta konsistí di señor Orlando Cuales, Ivan De Windt I Joyce Nahr a move último dianan den un tempu  rápido pa traspasá e fasilidatnan aki pa FDDK bai operá e totalidat.

FDDK lo bai sinta den próksimo siman na mesa pa kaba di atendé detayenan final I despues pa inventarisá, limpia I kuminsá mobilisá pa aktividatnan deportivo kue nan ritmo bek. Pues pronto FDDK lo bini ku su maneho nobo pa loke ta toka, uzo di fasilidat deportivo.

Posted on

Idar Wederfoort ta gana medaya di oro na Martinique

MARTINIQUE — Djasabra 28 di febrüari nos atletanan di karate a partisipá na e Open de Martinique. Komo coach i delegado a biaha Lai Cam How. Idar Wederfoort a gana medaya di oro den su kategoria, miéntras Jezus Costina i Jean Claude Overman a gana medaya di bròns den nan respektivo kategoria. E ekipo miksto konsistiendo di Idar, Jezus i Jean-Claude huntu ku Cristopher Martis i Alexander Willems a gana medaya di bròns.

Posted on

Rekompensa pa informashon den Kaso Maximus

WILLEMSTAD — Dia 5 di mei 2013 a mata Helmin Magno Wiels na pir di Marie Pampoen. E.R.K. a keda sentensiá pa medio di veredikto di 29 di ougùstùs 2014 pa e asesinato aki. Den e veredikto wes a stipulá ku E.R.K. a risibí pago pa e asesinato aki. E veredikto aki a keda konfirmá dor di Korte di Apelashon den su veredikto di 20 di febrüari 2015.

Den e investigashon Maximus ta investigando entre otro ken a duna òrdu pa e asesinato. E sospecho ta ku esnan ku a duna òrdu a rekurí na dos entermediadó ku a usa E.R.K. pa ehekutá e asesinato. Tambe tin e sospecho ku e dunadonan di òrdu a paga un montante grandi na e dos entermediadornan. E investigashon Maximus ta dirigí su mes pa e motibu aki tambe riba e fluho di plaka rondo di e diferente sospechosonan.

Probablemente E.R.K. a risibí djis un parti chikitu di e total di plaka ku a ser pone disponibel. Mayoria di e sobrá plaka a keda serka e entermediadornan. Den kuadro di e investigashon ta hopi importante pa determiná serka ken e sobrá plaka a keda of a keda alohá aktualmente.

Fiskal Mayó di Ministerio Públiko (OM) di Kòrsou a disidí pa pone disponibel un rekompensá na e persona of personanan ku ta pone OM riba e kaminda pa rastreá e plaka i pa konfiská esaki. E altura di e rekompensa ta 50 % (sinkuenta porshento) di e plaka ku finalmente keda konfiská a base di e tip(nan). Mester por determiná ku ta plaka ku a keda pagá pa e asesinato.

Esnan ku tip por tuma kontakto ku polis via e liña di telefòn anónimo 108.

Posted on

Swim Club Orca Curaçao na kaminda pa ta un klup grandi, sólido i ehemplar

WILLEMSTAD — Despues di 5 siman, entrenamentu di Swim Club Orca Curaçao ta bayendo hopi bon. Swim Club Orca Curaçao su promé treinen tabata dia 10 di yanüari 2015, e dia ei e klup a konta ku 9 mucha/miembro. Awe sinku (5) siman despues, e klup ta konta ku 30 miembro. Algu interesante ta pa mira, kon durante di e sinku (5) simannan aki ku tabatin treinen, tur dia mas i mas mucha ta bira miembro.

Djasabra dia 28 di febrüari awor, Swim Club Orca Curaçao ta organisá un aktividat di “team building” ku lo tuma lugá na Caracas Baai. Esaki ta pa e miembronan i “coachnan” siña konosé otro mihó i pasa un ratu huntu hasiendo aktividat di “team building” kantu di laman.

Swim Club Orca Curaçao ta un klup di landamentu nobo ku ta brinda su futuro miembro i aktual miembro e siguiente disiplinanan:

Landamentu kompetitivo; (“Speed zwemmen”)
Landamentu rekreativo;(trein pa tene kurpa den kondishon i distraishon)
Waterpolo; (“polo aquatico”)
Landamentu sinkronisá;(“waterballet”)
“Open waters”; (kompetí riba distansia largu den laman)
“Diving”; (kompetí den bula kabes i bula nechi for di springplank
“Master”;(treinen pa kondishon pa adulto)

Pa tur hóben ku ta interesá, Swim Club Orca Curaçao ta trein: djasabra di 15.30 or pa 17.00 or i djadumingu di 10.00 or pa 11.30 or na Pisina Bennie Leito.

Kontribushon ta Naf. 35,00 pa luna pa trein dos (2) biaha pa siman. Tin treinen pa adulto tambe riba djasabra di 17.00 or pa 18.00 or i djamars di 19.00 or pa 20.00 or. Kontribushon ta Naf. 50,00 pa luna pa trein dos (2) biaha pa siman. Swim Club Orca Curaçao, na kaminda di ta un klup grandi, sólido i ehemplar den nos pais.

Pa mas informashon por yama telefòn: 529 6586, Vernon Toré

Posted on

Johnny Hellmund ganado prome torneo Bankpool

WILLEMSTAD — Pa promé biaha den historia di e deporte di biyar na Kòrsou a tuma lugá un torneo di e disiplina konosí bou di e nòmber di “Bankpool”. Esaki ta un disiplina di pool kaminda tur bola ku keda hinka mester mishi ku un banda di mesa promé ku e kai den buraku. E evento a keda organisá pa MacPool Promotions ku ta bou di direkshon di Michael Arvelo den selebrashon di su 25 aña organisando eventonan di biyar.

Djaluna, 16 di februari,13 biyardista invitá a bini huntu na pool arena riba Gosieweg i a kuminsá bataya kontra otro pa e promé título den e displina aki. Den buelta di ganadó tabata Johnny Hellmund ku a gana di Jeffrey Nieuwenhuyzen ku skor di 2-0 pa a pasa pa final.

Den buèlta di pèrdèdó Steven Ibrahim ta gana Roukous Tannouri kende ta keda na puesto 4. Steven ta bin topa Jeffrey i ta saka su sla bek ganando 2-1 i asina ta bai final kontra Johnny Hellmund. Jeffrey ta keda na puesto 3. Den e ultimo partido di e torneo “The Legend” Johnny Hellmund ta gana Steven Ibrahim 2-0 i ta titulá kampion di e promé evento di bankpool.

MacPool Promotions/Michael Arvelo kier gradisí tur e partisipantenan pa nan aporte duna na e evento y ta invitá un y tur pa keda pendiente pa nas aktividat pa siguí selebrá 25 aña di MacPool Promotions.

Posted on

Pichingolo Nissan Selebrando 35 Título

WILLEMSTAD — Ku partisipashon di no ménos ku 24 tim di sòftbòl slowpitch ta start djabièrnè 20 di febrüari na parke di Pichingolo den Buena Vista un torneo di sòftbòl slowpitch.

E torneo aki ta karga e nòmber di “Best of the best Tournament 2015”.

Lo tin 5 diferente kategoria. Maskulino, Maskulino Sosial, Mucha Muhé, Modified i Liga-50.  Den maskulino lo partisipá: MCB, Coca Cola/Licores Maduro, Sulca i SBAB. Den maskulino sosial: UOC,  Petro, Polis, CIS, Ernst & Young, SVB, UOC2 i Pinnacle.

Den mucha muhé: MCB, UAC, UOC i GBST. Den modified: CRT, Brievengat Boys, X-Treme i Thrillers. Den Liga-50: Catpower, Jaws, Los Amigos i Ban Serio.

E weganan pa djabièrnè 20 di febrüari:  7.30 pm: Mucha Muhé: MCB vs GBST, 9or: SVB vs Pinnacle (Sosial Maskulino).

Djasabra 21 di febrüari lo tin 7 wega kuminsando for di 10or di mainta. E último wega ta anochi 7or.

Djadumingu tambe tin 7 wega kuminsando for di 10or di mainta i finalisando ku e último wega 7or di anochi. Tur amante di sòftbòl slowpitch i di bon ambiente ta kordialmente invitá.

Lo tin un bar i kushina bon surti. Pichingolo ta preparando pa su tremendo BBQ di dia 7 di mart. Lo por haña karchi na parke.

Posted on

Street Masters 2015 organisa pa FDDK

WILLEMSTAD — Fundashon Desaroyo Deportivo Kòrsou (FDDK) ta organisá djabièrnè 20 di febrüari próksimo un kompetensia di ‘STREET MASTERS 2015.’

Esaki lo tuma lugá na kompleho deportivo Don Bosco for di 09:00 te ku 11:30. E kompetensia aki ta wòrdu hunga bou di e kategorianan 9-13 i 13-16 aña.

Tur hóben ku kier bin kompetí den ‘3 on 3’ den basketbòl i futbòl por bin i inskribí nan ekipo di máksimo di 3 persona pa kompetí. Pa mas informashon i reservashon por yama Stallone Isenia riba number 5145178 òf 8881840 pa inskribí nan ekipo.

Pa ekiponan ganadornan lo bai tin premionan deportivo. Bin sera bo fakansi di skol den un ambiente deportivo.

Posted on

Jean-Julien Rojer i Horia Tecau ta gana ABN AMRO World Tennis Tournament

ROTTERDAM — Jean-Julien Rojer i Horia Tecau a logra e título dòbel den e di 42 edishon di e ABN AMRO World Tennis Tournament. Den e final Rojer i Tecau a enfrentá i derota Jamie Murray i John Peers ku skor di: 3-6, 6-3 i 10-8.

Despues di a pèrdè promé set, Rojer i Tecau a bin bek fuerte den e di dos i di tres set. Segun Jean-Julien, “mi no tabata hungando bon. Mi partner Tecau a yuda mi henter e siman aki, pues tur krédito ta bai pe.”

Rojer a bira e promé Hulandes ku ta gana den Ahoy despues ku Paul Haarhuise, Jacco Eltingh i Jan Siemrink a hasi esaki na aña 1998.

“Semper ta bunita pa gana un torneo den e pais ku bo ta representá, dilanti famia i amigu. Despues di a pèrdè den e final di aña pasa, nos tabata tin un kuenta di bin regla. Den pasado mi a train hopi na Rotterdam i ta hopi dushi pa gana un torneo grandi asina aki den e siudat aki. Esaki ta un di e viktorianan mas importante di mi karera. Nos ta bin otro aña sigur pa defendé nos título,” Jean-Julien Rojer a deklará despues di e partido.

Posted on

Jean-Julien Rojer den semifinal na Rotterdam

ROTTERDAM — Jean-Julien Rojer i su partner Horia Tecau a logra pasa pa e semifinal di e ABN AMRO World Tennis Tournament na Ahoy Rotterdam. Rojer i Tecau a derota Nenad Zimonjic i Asam-Ul-Haq Qureshi den e kuart-final ku skor di 7-6 i 7-6. Den e semi-final Rojer i Tecau lo enfrentá e ganadónan di wega entre Begemann/Haase i Granollers/Lopez. Aña pasa Rojer i Tecau a yega te den e final di e torneo aki pero a kai chikí despues ku nan a pèrdè di Michael Llorda i Nicolas Mahut ku skor di 6-2 i 7-6.

Posted on

Jean-Julien Rojer i partner ta kai chikí den semi-final

Oustralia — Jean-Julien Rojer i partner Horia Tecau no a logra avansá pa e final di dòbel den e Australian Open. Rojer i su partner Tecau a pèrdè ayera den e semi-final kontra e Italianonan Simone Bolelli i Fabio Fognini ku skor di: 4-6, 6-3 i 3-6.

Esaki ta di dos biaha ku Rojer ta kai den e semi-final di e Australian Open. Na 2011 tambe e tenista a pèrdè den e semi-final. Apesar di no a logra e final e duo Rojer/Tecau ta bai kas ku un premio di 142.500 dòler.

Facebook Twitter Instagram Youtube
© 2025 Deporte Awe. Tur derechi reservá. Diseñá pa E² Media