Oustralia — Jean-Julien Rojer i su partner Horia Tecau a avansá pa e semifinal di e promé Grand Slam di aña kual ta Australian Open. E duo Rojer/Tecau a derota Dominic Inglot i Florin Mergea: 6-4 i 7-6. Den e semi-final, Jean-Julien i Tecau lo enfrentá e Italianonan, Simone Bolelli i Fabio Fognini. E partido aki lo ta awe 8’or di anochi, ora lokal di Kòrsou.
WILLEMSTAD — Djasabra dia 24 di yanüari tabata tin e inisio di e torneo di biar organisá pa Curaçao Billiards Association ku ta e famoso Curaçao Pro Tour kaminda un total di 26 partisipante tantu lokal i internashonal a partisipá.
Curaçao Pro Tour (CPT) ta un torneo ku ta wòrdu hunga durante henter e aña. Tin un total di 8 stop anto djasabra ultimo tabata e promé stop.
E disipliná ku a wòrdu hunga tabata 10 ball. E torneo ta kuminsá ku e Sistema di ‘double Knock Out’ pero ora yegá na e delaster 16 e la bira un ‘Single Knock Out’. Den otro palabra esun ku pèrdè ta afó.
Esnan ku a klasifiká pa e delaster 16 nan tabata Marvin Abdul (Boneiru), Julian Rijna, Jeffrey Nieuwenhuijzen, Javier Augusta, Bryan Farah, Karl Vervuurt, David Prins, William Ochoa, Brayen Landskind, Robertico Freitas, Salim Kuzi, Afmad Ibrahim, Raymond Magdalena, Jimmy Rol, Ditto Acosta (Aruba) i Gio Ariza.
Den e kuart final a hunga: Julian Rijna kontra Jeffrey Nieuwenhuijzen, Bryan Farah kontra William Ochoa, Robertico Freitas kontra Afmad Ibrahim i Jimmy Rol kontra Ditto Acosta.
E semifinal nan a bai entre Jeffrey Nieuwenhuijzen i Bryan Farah anto Ditto Acosta kontra Afmad Ibrahim.
E final a bai entre Jeffrey Nieuwenhuijzen di Kòrsou i Ditto Acosta di Aruba. Den un final di kita sombré anto manera nan ta bisa den e deporte di biar un final ku ta bai hill hill Ditto ta logra gana ku score di 8-7. E siguiente stop lo ta dia 7 di mart anto e disipliná lo ta bola 8.
Djasabra awor dia 31 di yanüari lo toka turno na e partisipantenan di Level 3 di CBA ku lo inisiá nan aña deportivo.
WILLEMSTAD — Partisipá na Koningsspelen 2015, for di awe tur skol di fundeshi por inskribí pa e dia di spòrt mas dibertido di aña: Koningsspelen, esta Weganan di Rei.
Weganan di Rei a wòrdu krea spesialmente pa alumnonan di skol di Fundeshi tantu na Hulanda komo e parti Karibense di Reino. Meta di e evento aki ta pa siña nos muchanan kon importante i dibertido movementu por ta. Esei ta nifiká ku spòrt i salu ta para sentral.
Dos aña pasa a organisá e Weganan di rei pa promé biaha durante inougurashon i koronashon di Rei Willem Alexander. E aña aki e dia deportivo ta wòrdu organisá pa di tres biaha konsekutivo, riba e delaster dia di skol promé ku aniversario di Rei, dia 24 di aprel 2015.
Meskos ku tur otro aña, e dia ta kuminsá ku un desayuno salu. E aña aki un biaha mas Jumbo Supermarkt di Hulanda ta spònser e desayuná pa tur mucha rònt Reino. Un desayuno salu ta importante pa kuminsá e dia ku hopi energia. Nos organisashon ta kere ku ta importante pa konsientisá muchanan riba kome salu, pero ku movementu ta dibertido tambe. Nos ta orguyoso ku algu ku a kuminsá pa un aña, a krese bira un fenómeno asina grandi. Ya e Weganan di Rei ta birando un tradishon Hulandes Karibense importante.
Komo ku dia 24 di aprel ta un dia regular di skol, nos ta spera di por konta ku mas ku di 40.000 mucha rònt nos islanan.
For di awe tur skol por inskribí nan alumnonan na koningsspelen@nospais.com
Inskripshon ta dura te ku dia 15 di febrüari próksimo. Kòrda ‘like’ tambe nos página di facebook: ‘Koningsspelen Caribisch Koninkrijk’, pa asina bo keda informá di tur akontesimentu rondó di Weganan di rei 2015.
WILLEMSTAD — Djasabra awor dia 24 di yanüari 2015 lo ta e inisio di e di tres aña konsekutivo di Curacao Pro Tour.
Curacao Pro Tour (CPT) ta un kampeonato di biar organisá pa Curacao Billiards Association ku a wòrdu funda na aña 2013 door di Karl Vervuurt. Curacao Billiards Association ta apropiá pa tur amante di biar paso tin diferente nivel pa akomodá tur hende ku ta level 3, level 2, level 1 anto esun mas altu ku ta e Curacao Pro Tour.
Na aña 2013 CPT a kuminsá ku 16 hungadó ku a partisipá riba e nivel mas altu. E aña aki lo bai tin un total di 26 hungadó ku lo bai partisipá. CPT lo bai tin un total di 8 stop durante aña. Pa kada un stop kada hungadó ta haña punto a base di su prestashon. Na final di aña ta wak ken tin mas tantu punto pa asina por saka e kampeon di CPT.
E disiplinanan ku lo wòrdu hunga ta 8 ball, 9 ball i 10 ball.
Lo bai tin un bolsa sumamente atraktivo ku un total di 13.000 florin pues kada persona lo duna su máksimo esfuerso pa e por kai den e premionan.
E kampeon di CPT na aña 2013 tabata Bryan Farah anto na 2014 Roukos Tannouri.
E aña aki lo ta bai tin un primisia kaminda lo bai tin dos hungadó international ku lo bai partisipá. Esaki ta e actual number 1 di Boneiru ku ta Marvin Abdul i di Aruba Ditto Acosta ku ta wòrdu konsiderá komo un di esnan mas mihó di Aruba. Ditto tambe ta un ex-kampeon Pan-Amerikano den e disipliná di bola 9.
Tambe nos mester menshoná ku e aña aki lo bai tin un partisipante di apénas 13 aña ku ta Shamir Tremus ñetu di Nelson Tremus ku ta hasiendo un bon trabou aya na Boca Sami ku su team Boca Stars.
Nelly Zimmerman tambe prosedente di Boca Stars lo partisipá komo e úniko femenino. Nelly na vários okashon a representá Kòrsou na weganan Pan-Amerikano i tambe kampeonato Mundial.
Akinan e lista kompletu di tur hungadó ku lo partisipá na CPT 2015:
Bryan Farah, Roukos Tannouri, David Prins, Javier Augusta, Salim Kuzi, Raymond Magdalena, Gio Ariza, Karl Vervuurt, Shandro Paula, Mark Janga, Alex Vieira, Marlon Pietersz, Joey Fung A Loi, Jeffrey Nieuwenhuijzen, Gemajel Rol, Robin Nazeer Appro, Marvin Abdul (BON), Shamir Tremus, Nelly Zimmerman, William Ochoa, Julian Rijna, Briant Landskind, Afmad Ibrahim, Ditto Acosta (AUA), Robertico Freitas, Isidro Noor
Curacao Billiards Association ta yama un danki na FEBIKO pa e kooperashon i alabes ta invitá henter pueblo di Kòrsou bin apoyá e 26 hungadónan i alabes disfrutá di un nivel sigur bastante altu di biar.
Weganan lo kuminsá Djasabra 10 di mainta i lo siguí henter dia te ku 7or anochi na RIO Lounge & Sportsbar.
WILLEMSTAD — Tur kos ta kla pa biar ranka sali den 2015 y e promé evento ta e Kampionato di Kòrsou Bola 9. Tur miembro por inskribí pagando 25 florin y no miembronan 35, esaki por tuma lugá serka Sr. David Prins na 5243869 of via info@febiko.org of na Poolarena durante dianan di aktividat. Inskripshon ta sera djaluna awor dia 26 pa 12’or di mèrdia. E evento ta programa pa kuminsá djárason 28 y terminá djadumingu dia promé di febrüari. Pues no pèrdè e oportunidat aki pa partisipá. E kampion y subkampion ta klasifiká mesora pa kampionato Pan-Amerikano benidero ku lo tuma lugá den luna di yüli. Federashon Biyar Kòrsou ta spera di konta ku partisipashon di tur su miembronan.
VIRGINIA — Nos ta yegando na final di un otro aña i ku esaki DeporteAwe.com ta bai tuma un pousa chikitu pa disfrutá di e dianan di fiesta. Esaki no ta nifiká ku lo no tin ningun publikashon riba DeporteAwe.com pero mi lo no ta publikando di djaluna pa djabièrnè manera ta kustumber. Si tin algu importante ku meresé publikashon lo mi hasi lo máksimo pa publiká esaki. Na yanüari di 2015 mi lo tei bek i lo sigui publiká informashonnan deportivo di djaluna pa djabièrnè manera ba bin ta kustumbrá.
Pa bo ta sigur ku bo no ta pèrdè nada ku keda publiká riba e pagina di DeporteAwe.com bo por suskribí na e pagina yenando bo email den e sekshon di ‘SUSKRIPSHON’ ku bo ta mira na bo man drechi di e pagina. Tambe sigui mi riba Twitter, hopi biaha ta mas fásil i lihé pa mi publiká riba Twitter en bes di riba e pagina web. Tur loke mi publiká riba DeporteAwe.com ta sali simultáneamente riba Twitter. Djis klik riba e boton ku ta bisa ‘Follow’ na man drechi di e pagina. Ku poder di Dios den 2015 Facebook tambe lo ta otro opshon pa sigui DeporteAwe.com. Tambe kòrda sintonisá Deporte Hoyer na Radio Hoyer 101.9 FM di djaluna pa djabièrnè 7:30 di mainta i djasabra banda di 8:30 di mainta.
Promé mi finalisá mi ke gradisí papa Dios pa un aña mas ku e la duna mi pa informá tur e lektornan di DeporteAwe.com. Danki pa e abilidat ku e la duna mi pa por komuniká efektivamente atrabes di e pagina web ku boso tur.
Mi ke gradisí tambe mi kasa ku un aña mas a sostené i tolerá ami i e pagina web. Danki pa tolera mi ora mi ta kita di nos tempu pa por skirbi i/of buska informashon pa e pagina. Mi ta hopi gradesido pa esei.
Un danki hopi grandi ta bai tambe na tur e lektornan di DeporteAwe.com. Tabata un aña rèkert pa loke ta trata bishitante riba e pagina web. Danki pa e konfiansa den e informashonnan ku mi ta publiká.
Un gratitud ta bai tambe na tur mi fuentenan ku ta yuda mi tene abo tur dia di nobo na altura. Si bo ta puntra bo mes kon porta ku tin ora nos tin e informashonnan promé ku tur hende esei ta danki na nos fuentenan. Danki pa e konfiansa hinka den mi ku boso informashonnan. Sabi ku bo tambe por kontribuí na DeporteAwe.com, simplemente dor di klik riba ‘KONTAKTO’ ariba di e pagina aki.
Por ultimo pero sigur no ménos importante, danki na e miembronan di prensa ku a ponenan konfiansa den e informashonnan di DeporteAwe.com. Prinsipalmente na Radio Hoyer/Deporte Hoyer i Sr. Angelo Virginie, CBA Television i Sr. Rignald Maduro i tambe Sr. Luis Da Silva. Mi ta apresiá e konfiansa aki.
Na tur mi lektornan mi ke deseá boso Felis Dianan di Fiesta. Korda reflekshoná riba e aña ku ta tras di lomba pa drecha i bin bek mas mihó hende den 2015. No lubida riba e motibu prinsipal ku nos ta selebrá Pasku. Korda ta gradesido pa tur loke bo tin i/of ta pasando aden, sea ku ta bon of malu. Kada eksperensia ta yuda hasi nos un mihó hende. Kuida kurpa i kisas nos lo topa.
Kordialmente,
Edson Evertsz
Direktor/Hefe di Redakshon
DeporteAwe.com
Komishon Deportista di Luna riba djasabra 06 di desèmber 2014, a reuní den sala di reunion di FFK, kaminda a evaluá i diskutí riba e kandidatonan ku a keda presentá pa miembronan dje komishon i federashonnan pa e premiashon di “Deportista di Luna” korespondiente na luna di Novèmber 2014. Manera semper ta keda spliká, na momentu ku a inisiá ku e proyekto aki, e premio aki mester sirbi komo un estímulo, a base di prestashon i komportashon, pa nos deportistanan lokal, ku ta biba na Kòrsou i ku ta kompetí den kompetensianan lokal komo tambe internashonal den representashon di pais Kòrsou.
E komishon a yega na e siguiente nominadonan:
Komishon ta gradisí e siguiente spònsernan ku ta yuda pa e premiashon aki por bira posibel: CHANGES PRO SPORT – RIO LOUNGE & SPORTS BAR- MCB – FDOK – SALAS SPORT SHOP – LILO SULVARAN – ALLSTAR EMBROIDERY – DIORCA NV – PELOTA – DE JONGH’S SPORTHUIS – FOTO STUDIO KORT – STRAK STRAK BARBERSHOP – FFK – SELIKOR – FUNDASHON NOBO – COCA COLA.
E anunsio i premiashon di e ganadó lo tuma lugá:
Fecha: Djasabra 13 Desèmber 2014.
Ora: 18.00 – 19.00’or.
Sitio: Rio Lounge & Sports Bar, Chuchubiweg 10?Damacor.
Den un ambiente liber di humamentu i liber di alkohòl!
WILLEMSTAD — Djaweps atardi a sali e selekshon nashonal di Federashon Biyar Kòrsou rumbo pa e isla di Bonaire pa bai partisipá den Schotborgh Cup 2014.
E evento aki a tuma lugá pa promé biaha aña pasa na luna di desèmber aki na Kòrsou, kaminda e selekshon di Bonaire a bai ku e titulo ganando Kòrsou 11 pa 6 .
E aña aki ta toka turno pa e Federashon di Biyar Boneriano pa organisá e evento ku ta dediká na memoria di e gran Eddy Schotborgh ( q.e.p.d.). kende ta e persona ku a pèrkurá ku den añanan nobenta nos (Antia Hulandes) por a partisipá den eventonan di biyar rònt mundu . Por menshoná ku e tres promé deportistanan ku a partisipá den un mundial tabata Eithel”Boy” Soliana di Bonaire , Richard Wolff di Aruba i Johnny Hellmund kendenan a partisipá na kampionato mundial ku a tuma lugá na Koningswinter , Alemania na 1993 . Tambe Sr. Schotborgh ta karga e nòmber di e persona ku a diseñá e mesa ofishal pa World Pool/Billiard Association kual mesa awendia ta keda usá den tur kampionato mundial i tambe eventonan di renombre .
E biaha aki e selekshon di Kòrsou ta integrá pa 1. Roukos Tannoury , 2. Michael Arvelo, 3. Afmad Ibrahim, 4. David Prins i 5. Sybren Boekhoudt kende tambe lo ta e kapitan . E evento lo tuma lugá dianan 5, 6 i 7 desèmber den Sporthal na Kralendijk i lo kuminsá djabièrnè anochi pa 8’or .
Federashon Biyar Kòrsou ta deseá su representantenan tur klase di éksito i ta deseá Dutch Caribbean Billiard Union/ Febibo tur klase di éksito ku e organisashon.
WILLEMSTAD — Ayera djaweps 4’or di atardi, e hóbennan Millard “The MJ Machine” Petrona i Lainbert Mercelina a sali pa Medellin, Colombia pa partisipa na e “Campeonato internacional de las luces” di BMX.
Ta trata di un kompetensia internashonal di BMX ku lo tuma lugá dianan 5 i 6 di desèmber na Medellin Colombia i ku por sierto e aña aki ta selebrá su di 10 aniversario.
Lo tin diferente kompetidó internashonal i tambe lokal(Colombia) di renombre. Di Canada lo tei Tory Nyhaug, di Merka lo tei Sean Gaian, tambe lo tei Joris Daudet di Fransia, meskos Chris Mireles di Mexico i hopi mas.
Di Colombia mes lo tei entre otro e kampion olímpiko Mariana Pajon i tambe Carlos Mario Oquendo ku tambe lo ta kompetiendo den e kampionato aki.
E hobennan lo ta biahando ku Sr. Millard Petrona i lo ta di regreso djaluna 08 di desèmber próksimo.
WILLEMSTAD — Dianan 5 i 6 di desèmber próksimo Federashon Aquatiko Kòrsou ta organisá e MCSSI-2014 CURACAO Synchronized Swimming Championship’ (Kampionato nashonal di landamentu sinkronisá). Lo tin kompetensia di Combo, Solo, Figura i Rutina di dueto den diferente kategoria di edat. E kompetensia lo tuma lugá na SDK kuminsando djabièrnè di 5 di desèmber ku e promé seshon di kompetensia 17:00’or di atardi. Riba djasabra 6 di desèmber e di dos seshon di kompetensia ta kuminsá 9:30 di mainta. Despues di un pousa, 16:30 di atardi ta kuminsá ku e di tres i seshon di kompetensia.