Otro Archives | Page 24 of 38

December 4, 2014December 4, 2014

FDOK ta pidi federashonnan deportivo pa kandidato pa deportista di aña

WILLEMSTAD — FDOK (antes CSOF) ya ta den preparashon pa su evento grandi kual ta e premiashon pa deportista di aña 2014. Tur kos ta kanando segun plan i ya a reuní na dos okashon ku e miembronan di e komishon ku lo elegí e nominado i ganadónan.

Apesar di esaki FDOK ke rekordá i ala bes hasi un supliká na federashonnan deportivo pa manda nan kandidato pa deportista di aña. E fecha límite pa hasi esaki ta dia 7 di desèmber próksimo. Despues di e fecha aki e komishon lo kuminsá ku su tarea i nan mes lo por buta miembro si e federashon no manda nada.

December 4, 2014December 4, 2014

Swim Club Orca Curaçao ta organisá dia habri

WILLEMSTAD — E organisashon di natashon, Swim Club Orca Curacao ta ekstendé un invitashon na pueblo di Kòrsou pa ta presente na e dianan habri ku lo tuma lugá dia 6 di desèmber i dia 13 di desèmber próksimo na pisina Bennie Leito. E dianan habri ta pa tur mucha for di 5 aña di edat i adultonan ku ta den poseshon di un Diploma A. Muchanan por bin landa i pasa dushi, landa “estafette”, hasi balèt di awa, waterpolo i bula for di “springplank”. Adultonan por landa “estaffete”, trèk ban, waterpolo i bula for di ”springplank”.

December 3, 2014December 3, 2014

Swordfish Aquatic Group Christmas Show

WILLEMSTAD — Swordfish Aquatic Group e aña aki lo organisá su tradishonal Show di Pasku, ku ta tuma lugá dia 14 di Desèmber próksimo, di 17:00 te 20:00 na pisina di SOV Asiento den Emmastad.

Swordfish Aquatic Group Christmas Show, titulá “Swimming Santa”, ta un tremendo show sumamente bon hinká den otro, kaminda tur nos atletanan, di chikí te grandi, prinsipiante te avansá, ta bai mustra kiko nan a presta den aña 2014.

Tambe ta bai tin un presentashon sumamente interesante di algun atleta for di Hulanda.

Entrada pa e show ta kosta únikamente Fl. 20.00 i karchinan ta optenibel na Mensing Kaminada, serka tur atleta, coach i miembronan di direktiva.

November 19, 2014November 19, 2014

ABC Insel Air Champion na di dos lugá den relevo rondo di St. Maarten

WILLEMSTAD – Dia 11 di Novèmber último a tuma lugá e di 27 edishon di e kareda di relevo rondó di e isla di St. Maarten, di kua e ekipo di Kòrsou kombiná ku Aruba i Boneiru a partisipá. Esaki tabata e inisiativa di e atleta di distansia Randhy Cuevas pa hasi un kombinashon di e isla nan di manera ku bo por haña mas atleta fuerte den e ekipo ku a hiba e nòmber di ABC Insel Air Champion.

E kareda a start ku e koredó di St. Maarten ku a gana e kareda Fatum nan Kòrsou i establesé un rèkert nobo kontra di e koredó di Aruba, Roland Staring. Manera tabata di spera e koredó di St. Maarten a kue e bentaha, lagando e ekipo di ABC Insel Air Champion atras. E ekipo di ABC a keda atras te ku lèg 5 den u kareda kaminda mayoria koredó ta mas of ménos 3 km. Despues di 3 lèg e ekipo di ABC a pasa pa kue e puesto number 2. I na di 5 leg e selekshon a pasa pa puesto number 1. E selekshon a pèrdè e bentaha aki na momentu ku un dama di e ekipo mester a enfrentá un kabayero di e ekipo kontrali ya komo ku reglanan ta stipulá ku bo mester tin mínimo dos koredó di e sekso opuesto den bo ekipo.

Pero asina mes e kabayero ei no por a bai leu i e dama Shardiela a lucha balentemente. Despues a sigui e dama di Aruba Dorothal ku ta un koredó ku a yega di kore 5 km den 20 minüt, pero e hóben atleta di Aruba aki a bin konfrontá problema respiratorio durante di e kareda i esaki a pone e ekipo di ABC Insel Air Champion kai un minüt atras ku a bira difísil pa nos koredó lokal Rashid por a sera e distansia ei, mirando ku e koredó number 10 di e otro ekipo ta tin mes un nivel ku n’e. Asina nos ekipo a sali number dos den e kompetensia di relevo rondó di e isla di St. Maarten.

November 17, 2014November 17, 2014

Darius Bérénos deportista di Luna Òktober 2014

WILLEMSTAD – E deportista Darius Bérénos, djasabra 15 di novèmber, a keda premiá komo “Deportista di Luna” di luna Òktober 2014 di parti di un komishon konsistiendo di periodista- i reporteronan deportivo di medionan di komunikashon sosial. Darius ta un hóben di 13 aña ku ta praktiká e deporte di bela i ta alumno den promé klas di Radulphus College. Di 5 te ku 10 di òktober último, Darius a partisipá na e di 47 Regata di Boneiru. Durante e kompetensia den klase “Optimist A” e la sa di saka e mió skor posibel dor di gana e 7 kareda, ku a tuma lugá durante di 4 dia largu i asina sali e vensedó máksimo. Ademas Darius Bérénos ta praktiká atletismo tambe i tabata ganador di Kareda Regatta 4k na Boneiru i a sa di sali promé den su kategoria na My Guardian Run 10 kilometer. Darius ta praktiká e deporte di bela, atletismo, yudo i Rùgbi. Pa e motibunan ya menshoná, Darius Bérénos a keda skohe komo deportista di luna Òktober 2014.

Ademas di Darius Bérénos, tambe a premia e dos otro nominadonan, Aydan Gomez Osorio (Tènis) i Tiareth Cijntje (Natashon). Tur tres nominado a risibí un sertifikado den leshi, opsekio di Komishon deportista di luna i Diorca NV. E tres nominadonan a risibí un bunita medaya di Salas Sport Shop. Otro premionan pa e ganadó: Un kaha di PowerAde opsekio di Coca Cola, giftcheque di Fl. 150,– di Changes pro Sport, giftcheque di Fl. 100,– di FDOK, giftcard di 300 florin di MCB, giftcard di 300 florin di Selikor i un giftcheque di Fl. 50,– di Pelota. Strak Strak Barbershop & Kapsalon a regalá Darius Bérénos un drechá di kabei, tambe foto studio Kort a regalá Darius e posibilidat pa saka un potrèt kompletamente grátis i fundashon Nobo a regalá e deportista di luna Darius Bérénos un bunita trofeo.

Pa e dos otro nominadonan: Un giftcard di 300 florin di Selikor, giftcard di Fl. 100,– opsekio di Diorca NV i Komishon deportista di luna, giftcheque di Fl. 50,– di De Jongh’s Sporthuis i un kaha di PowerAde opsekio di Coca Cola.

Allstar Embroidery a enkargá su mes un biaha mas pa miembronan dje komishon ta uniformá den 2014, miéntras ku Rio Lounge & Sports Bar a pone su lokalidat na disposishon pa e premiashon por a tuma lugá tur luna durante di hinter 2014 serka nan. Di parti komishon deportista di luna un pabien na e deportista di luna i e nominadonan.

Komishon ta gradisí e siguiente spònsernan ku ta yuda pa e premiashon deportista di luna 2014 aki a bira posibel:

MCB – CHANGES PRO SPORT – RIO LOUNGE & SPORTS BAR- SELIKOR – DIORCA NV – SALAS SPORT SHOP – FDOK – PELOTA – ALLSTAR EMBROIDERY – DE JONGH’S SPORTHUIS – FOTO STUDIO KORT – STRAK STRAK BARBERSHOP – FFK- FUNDASHON NOBO – COCA COLA.

November 11, 2014November 11, 2014

Nominadonan pa deportista di luna Òktober 2014

WILLEMSTAD – Komishon Deportista di Luna riba djasabra 08 di novèmber 2014, a reuní den sala di reunion di FFK, kaminda a evaluá i diskutí riba e kandidatonan ku a keda presentá pa miembronan dje komishon i federashonnan pa e premiashon di “Deportista di Luna” korespondiente na luna di Òktober 2014. Manera semper ta keda spliká, na momentu ku a inisiá ku e proyekto aki, e premio aki mester sirbi komo un estímulo, a base di prestashon i komportashon, pa nos deportistanan lokal, ku ta biba na Kòrsou i ku ta kompetí den kompetensianan lokal komo tambe internashonal den representashon di pais Kòrsou.

E komishon a yega na e siguiente nominadonan:

Darius Bérénos (Deporte di bela). Darius ta un hoben di 13 aña ku ta praktiká e deporte di bela i ta alumno den promé klas di Radulphus College. Di 5 te ku 10 di òktober último, Darius a partisipá na e di 47 Regata di Boneiru. Durante e kompetensia den klase “Optimist A” e la sa di saka e mió skor posibel dor di gana e 7 kareda, ku a tuma lugá durante di 4 dia largu i asina sali e vensedó máksimo. Ademas Darius Bérénos ta praktiká atletismo tambe i tabata ganador di Kareda Regatta 4k na Boneiru i a sa di sali promé den su kategoria na My Guardian Run 10 kilometer. Pa e motibunan ya menshoná, Darius Bérénos a keda skohe komo nominado pa deportista di luna Oktober 2014.

Ayden Gomez Osorio (Tènis). Ayden ta un hóben tenista ku den luna di òktober tabatin un tremendo aktuashon. E la titulá kampion den 3 torneo di tènis hubenil ku a keda organisá den òktober. Un nota remarkabel ta ku e la pèrdè solamente 1 sèt den e 13 enkuentronan ku e la hunga. Den e torneo Pre Curacao Open ku Curacao Sports & Games Foundation a organisá, Ayden Gomez Osorio a gana su 5 weganan. Den e di 5 torneo ranking hubenil Ayden Gomez Osorio atrobe a triunfá den su 5 weganan ku ela hunga. Finalmente den kampionato hubenil di Kòrsou Ayden Gomez Osorio a koroná kampion atrobe invikto. Pa e motibunan ya menshoná, Ayden Gomez Osorio a keda skohe komo nominado pa deportista di luna Òktober 2014.

Tiareth Cijntje (Natashon). Tiareth ta un hóben di 12 aña ku ta praktiká e deporte di landamentu i ta den e ekipo di SITHOC. Tabata durante e 1ste Open wedstrijd ku a tuma lugá dia 26 di òktober na Pisina di SDK ku Tiareth Cijntje a sa di destaká den diferente disiplina ku e la kompetí den dje. Tiareth a sa di a gana un total di 3 kompetensha for di 4. Tiareth a sa di gana den 400 meter liber, tambe Tiareth ta logra viktoria riba 100 meter lomba, ganando di Chade Nersicio. Despues Tiareth ta logra un viktoria mas, e biaha aki riba 100 meter barbulètè i ta keda na di dos lugá tras di Chade riba 50 meter liber. Pa e motibunan ya menshoná, Tiareth Cijntje a keda skohe komo nominado pa deportista di luna Òktober 2014.

Komishon ta gradisí e siguiente spònsernan ku ta yuda pa e premiashon aki por bira posibel: CHANGES PRO SPORT – RIO LOUNGE & SPORTS BAR- MCB – FDOK – SALAS SPORT SHOP – LILO SULVARAN – ALLSTAR EMBROIDERY – DIORCA NV – PELOTA – DE JONGH’S SPORTHUIS – FOTO STUDIO KORT – STRAK STRAK BARBERSHOP – FFK – SELIKOR – FUNDASHON NOBO – COCA COLA.

E anunsio i premiashon di e ganadó lo tuma lugá:

Fecha: Djasabra 15 Novèmber 2014.

Ora: 18.00 – 19.00’or.

Sitio: Rio Lounge & Sports Bar, Chuchubiweg 10? Damacor.

Den un ambiente liber di humamentu i liber di alkohòl!

November 5, 2014November 5, 2014

Curaçao Sharks Aquatics na di 4 lugá den kompetensia na Aruba

WILLEMSTAD – Djaweps 30 di òktober 2014 anochi a sali ku vuelo di Insel Air pa Aruba, un delegashon di Curaçao Sharks Aquatics pa un kompetensia invitashonal di landamentu. Huntu ku e lider di delegashon, coachnan a bai 13 atleta i 4 mayor. Durante di e kompetensia aki Curaçao Sharks Aquatics su atleta nan a kompetí den diferente kategoria di edat maskulino i femenino. Djadumingu 2 di novèmber 2014 e delegashon a regresá kas bek hopi kontentu ku tu nan logronan, Curacao Sharks Aquatics a keda na di 4 lugá den e “Overall Winner” pa klup . Esaki for di 9 klup ku a kompetí. Hopi pabien na tur e atleta nan di parti di tur tres disiplina di Curaçao Sharks Aquatics, landamentu sinkronisá, landamentu i water polo, miembro i mayor nan.

October 30, 2014October 30, 2014

King of the Caribbean pool tournament & Curacao Ten Ball Classic

WILLEMSTAD – Entrante awe Kòrsou lo ta e venue pa dos tremendo evento di Biyar.

E promé ta e tan popular torneo ku ta karga e nòmber KOTC (King of the Caribbean) pool tournament
King of the Caribbean pool tournament a start 10 aña pasa pa promé bia na 2005.
KOTC ta un torneo kaminda diferente ekipo di biyar ku ta konsistí di minimal 8 hungadó ta bataya kontra di otro.

Loke a kuminsá na aña 2005 ku 16 team di di Aruba Boneiru I Kòrsou. Ku un total di 12000fl na premio awor aki a krese bira un torneo international ku paisnan manera Barbados Trinidad & Tobago, Venezuela, Hulanda, Sint Maarten, Aruba, Boneiru i Kòrsou ta partisipá. 10 aña despues e bolsa di premio a bira mas interesante ku un total di 10,000$ pa parti na premio. E disiplina ku lo wòrdu hunga ta bola 8 anto e weganan lo kuminsá djaweps dia 30 di October na Rio lounge & Sportsbar. Bin wak ekiponan fuerte manera The Bobsleigh di Venezuela, The Lions di Kòrsou , Hut Predators di Aruba I the Dutch Finest bataya ku otro pa asina por korona nan mes komo KING of the Caribbean champions.

Riba e mesun fecha lo bai tin tambe algu úniko pa Kòrsou. Lo bai tin un kampeonato Individual ku ta yama Curacao Ten Ball Classic kaminda algun professional lo tei presente. Pa esaki lo tin un suma di $10,000 agregá pa asina sera un total di 20,000$ na premio pa e torneo individual.

Bin wak estreanan manera Alejandro Carvajal di Chile ku ta kampeon pan amerikano dos aña sigui di e disiplina Ten Ball. Tambe lo tei for di Mexico e gran hungadó Ruben Bautista ku ta un revelashon actual I ta hasiendo furor na merka. Tambe for di Bèlgika Nos tin e professional Serge Das huntu kune e dama Wendy Jans ku ta 7 biaha kampeon Europeo di Snooker riba nivel amateur I tambe un biaha Kampioen Mundial di snooker riba nivel amateur. I tambe Danny Gokhul di Inglatera ku ta un tremendo hungadó.

Aruba I Kòrsou tambe lo ta bon representá ku hungadornan fuerte manera Ditto Acosta I Richard Wolff Di Aruba I Bryan Farah, Anthony Wever, Fauzi Halaby I Jeffrey Nieuwenhuijzen di Korsou.

Rio Lounge ke yama un danki na tur e sponsor nan ku a hasi e evento aki possible ku ta:

Polar, BDC, CTB, Hielo Ijs, Autocity, RIO lounge & Sportsbar, Fire Grill Café, Restaurant Lam Yuen,Cannabis Energy Drink, United distributors, Nolly’s party center , Howard Jhonson I Trupial Inn.

Rio Lounge ta invitá henter pueblo di Kòrsou pa bin disfrutá den un ambiente liber di huma di kompetensianan riba nivel international di biyar for di Djaweps dia 30 October te ku dia 2 di November

October 30, 2014October 30, 2014

Global BMX – 2nd International Open Race

WILLEMSTAD – Fundashon Global BMX Curaçao tin e honor di anunsiá ku e aña aki pa di dos bia konsekutivo e lo organisá un evento internashonal deportivo pa nos hóbennan.

Global BMX Curaçao ta un fundashon ku tin komo meta: engrandesé e deporte di BMX bou di nos hóbennan en espesial i otronan ku kier práktika e bunita i dushi deporte aki. For di aña 2013 Global BMX Curaçao a traha un pista di BMX kaminda tur nos hóbennan ku ta práktika e deporte di BMX por ehersé e deporte aki. Un pista di kual Global BMX Curaçao ta orguyoso di bisa, ta kumpli ku tur e rekisitonan ku e asosashon di siklismo internashonal ‘UCI’ ta pone. Tambe e pista di Global BMX Curaçao na Damacor, ku ta situá banda di e pistanan di tènis di CSC ta forma parti di e pistanan di e asosashon di BMX mas grandi na mundu kual ta USA BMX. Esaki ta e promé pista den region di Karibe ku ta forma parti di e pistanan di e organisashon USA BMX!

E aña aki e karedanan di e “2nd International Open Race” lo tuma lugá dia 1 di novèmber di 16.00 or pa 21.00 or i 2 di novèmber di 10.30 pa 15.30 or. Tur kareda ta tuma lugá na e pista di Global BMX Curaçao na Damacor.

E aña aki – mes kos ku aña pasá – e evento lo konta tambe ku presensha di algun koredor internashonal di taya. Asina Global BMX por duna di konosé ku Robin van de Kolk (NL) e aktual number 1 den su kategoria lo ta presente. Tambe Liam Philips (GB) ku tambe ta e number unu den su kategoria tambe lo ta presente. Tambe Dorus Brink (NL) a konfirmá di ta presente e aña aki.

E profeshonalnan banda di nan partisipashon na e karedanan dia 1 i 2 di novèmber, lo duna e hóbennan di Kòrsou e oportunidat pa partisipá na un klínika den kual nos hóbennan lokal por haña e oportunidat pa siña i haña teps balioso di e profeshonalnan aki. E klínikanan lo tuma lugá djadumingu dia 26 di òktober di 16.00 pa 19.00 or pa muchanan di 11 aña i mas hóben. Riba djamars 28 di òktober lo duna un klínika pa muchanan mas grandi ku 12 aña di 16.00 or pa 19.00 or. E preis pa e klínika di djadumingu ta Nafl. 50,- i p’esun di djamars ta Nafl. 125,-.

Pa mas informashon por tuma kontakto ku sr Lucien Isenia na e number di telefon 529 8994. Tambe por tuma kontakto ku nos mediante di email na lucien@goglobalbmx.com.

Por bishitá nos website ku ta goglobalbmx.xom ò bishita nos página di facebook facebook.com/globalbmxcuraçao.

Global BMX Curaçao, engrandesiendo nos deporte lokal i dunando su aporte pa pone un lus internashonal deportivo i positivo riba nos isla!

October 29, 2014October 29, 2014

First Irie Victory Race Curacao

WILLEMSTAD – E klup di BMX, Irie BMX Racing, djasabra awor 01 di novèmber, riba e pista Dynamite Race track na Koraalspecht, lo tin nan promé kareda Internashonal di BMX ku lo karga e nòmber “First Irie Victory Race Curacao”.

Lo tin vários klup lokal partisipando i tambe koredónan internashonal. Ta spera alrededor di 150 koredó di BMX repartí den diferente kategoria di edat.

E skema pa e dia 1 di novèmber lo ta di e siguiente forma:

9’or di mainta lo start ku e parti di pre racing training i warmup,

10’or tin Apertura ofisial, Himno i palabra di Bon bini,

10.15 di mainta ta start ku e karedanan te 3’or atardi

Despues ta sigui repartishon di premio.

Lo tin diferente partisipante internashonal di entre otro Venezuela, Merka i Aruba. Entrada ta gratis i tur hende ta bon bini. Lo tin un bar i kushina super bon surti!

Irie BMX Racing ta warda tur fanátiko di BMX djasabra 1e di November awor na Dynamite Race track na Koraalspecht!