Otro Archives | Page 25 of 38

October 28, 2014October 28, 2014

Torneo di dominó ‘The Beauty Knockout’?

WILLEMSTAD – Djadumingu 2 di Novèmber próksimo lo bai tin un grandioso torneo di Dominó ku ta hiba di nòmber ‘The Beauty Knockout’.

E torneo aki ta tuma lugá na The Rose (antes City To Go patras di Festival Center) i lo ranka sali for di 12’or di mèrdia kaminda na final lo bai tin Premionan FABULOSO pa repartí.

PREMIONAN:

Pasashi pa Aruba,
Plaka Kèsh,
Weekend Stay,
12 Bòter di Whiskey,
10 Kaha di Polar,
Kaha di Dominó,
Juice di Lovers,
Kaha di Minute Maid,
Breakfast/ Lunch/ Dinner

HOPIIIIIII Kos Mas!!!

Pa inskripshon por tuma kontakto na number di telefon: 675-2253

October 27, 2014October 27, 2014

Ramiro Balentina deportista di Luna Sèptèmber 2014

WILLEMSTAD – E pelotero Ramiro Balentina, djasabra 25 di òktober, a keda premiá komo “Deportista di Luna” di luna sèptèmber 2014 di parti di un komishon konsistiendo di periodista- i reporteronan deportivo di medionan di komunikashon sosial.

Ramiro Balentina ta un pelotero miembro di e ekipo Sta Maria Pirates Chippie. Tabata den luna di sèptèmber, durante di e final di nos beisbòl dòbel A, ku Ramiro Balentina tabata klave pa su ekipo Sta Maria Pirates titulá kampion di e temporada aktual. Defensivamente Ramiro ta un kècher ku práktikamente no ta pèrmití niun koredó kontrali avansá na base demostrando un tremendo brasa.

Na bate tambe Ramiro a sòru pa konektá e bala oportuno pa yuda den e ofensiva tambe di su ekipo kaminda nan ta logra e titulo máksimo komo kampion di Kòrsou. Ramiro a keda nombra komo MVP di e gran final di e kampionato di beisbòl dòbel A. Pa e motibunan ya menshoná, Ramiro Balentina a keda skohe komo deportista di luna Sèptèmber 2014.

Ademas di Ramiro Balentina, tambe a premia e dos otro nominadonan, Ailén Mena (Ahedres) i Rashid Rosalina (Atletismo). Tur tres nominado a risibí un sertifikado den leshi, opsekio di Komishon deportista di luna i Diorca NV.

E tres nominadonan a risibí un bunita medaya di Salas Sport Shop. Otro premionan pa e ganadó: Un kaha di PowerAde opsekio di Coca Cola, giftcheque di Fl. 150,– di Changes pro Sport, giftcheque di Fl. 100,– di FDOK, 100 florin opsekio di Sr. Lilo Sulvaran, giftcard di 300 florin di MCB, giftcard di 300 florin di Selikor i un giftcheque di Fl. 50,– di Pelota. Strak Strak Barbershop & Kapsalon a regalá Ramiro Balentina un drechá di kabei, tambe foto studio Kort a regalá Ramiro e posibilidat pa saka un potrèt kompletamente grátis i fundashon Nobo a regalá e deportista di luna Ramiro Balentina un bunita trofeo.

Pa e dos otro nominadonan: Un giftcard di 300 florin di Selikor, giftcard di Fl. 100,- opsekio di Sr. Lilo Sulvaran, giftcard di Fl. 100,– opsekio di Diorca NV i Komishon deportista di luna, giftcheque di Fl. 50,– di De Jongh’s Sporthuis i un kaha di PowerAde opsekio di Coca Cola.

Allstar Embroidery a enkargá su mes un biaha mas pa miembronan dje komishon ta uniformá den 2014, miéntras ku Rio Lounge & Sports Bar a pone su lokalidat na disposishon pa e premiashon por a tuma lugá tur luna durante di hinter 2014 serka nan. Di parti komishon deportista di luna un pabien na e deportista di luna i e nominadonan.

Komishon ta gradisí e siguiente spònsernan ku ta yuda pa e premiashon deportista di luna 2014 aki a bira posibel:

MCB – CHANGES PRO SPORT – RIO LOUNGE & SPORTS BAR- SELIKOR – DIORCA NV – SALAS SPORT SHOP – LILO SULVARAN – FDOK – PELOTA – ALLSTAR EMBROIDERY – DE JONGH’S SPORTHUIS – FOTO STUDIO KORT – STRAK STRAK BARBERSHOP – FFK- FUNDASHON NOBO – COCA COLA

October 27, 2014October 27, 2014

Clarickson Kraal Kampion Torneo Hubenil di Boka Star Pool Room

WILLEMSTAD – Boca Star Pool Room djasabra 25 di òktober, a organisá un Tremendo Kampionato Individual Hubenil pa tur e hóbennan ku ta tumando lès di Biyar na Boka Star Pool Room.

Algun siman pasa Boka Stars Pool a start ku kurso grátis pa Hóbennan di 7 te ku 14 aña ku kier a siña hunga e deporte di Pool/Biar.

E práktikanan ta tuma lugá serka Nelson Tremus propietario di Boca Star Pool Room, ku ta traha inkansablemente pa engrandese Biyar bou di hóbennan i Nelly Zimmerman ku sigur no mester di ningun introdukshon pa tur e premionan ku el a logra riba tereno internashonal representando Kòrsou den eksterior den e deporte aki.

Ayera tabata tin un Kampionato Individual Hubenil kaminda un total di 15 hóben a partisipá i tabata Clarickson Kraal ku a resultá e Kampion di e Torneo aki.

RESULTADONAN:

Kampion: Clarickson Kraal

SupKampion: Jeandrinho Constancia

3e LUGA: Michelangelo Zimmerman

4e LUGA: Sugently Martha

5e LUGA: Siegiangerik Constancia

October 22, 2014October 22, 2014

THE 4th OLD TIMERS TENNIS TOURNAMENT DEDIKA NA SR. TONY HENRIQUEZ

WILLEMSTAD – Pa di 4 aña konsekutivo lo bai tin e ya konosí “OLD TIMERS TENNIS TOURNAMENT” dianan 23-24-25 di òktober riba kanchanan di CSC.

Un torneo amikal patrosiná pa Maduro & Curiel’s Bank, Wimco i GH Car Rental. E weganan ta den kategoria dòbel, kaminda tur e “OLD TIMERSNAN” ta sintinan un tiki na Wimbledon of na US OPEN.

E aña aki sinembargo, nos lo bai sinti hopi falta di Tony Henriquez; nos bon amigu i tenista di tur tempu ku a fayesé na luna di mart último.

Pa gradisí TONY HENRIQUEZ pa su amistat sinsero, su gran amor pa e deporte di tènis i su yudansa i konséhonan na Curaçaosche Sport Club, nos ta dediká e torneo aki “The 4^th Old Timers Tennis Tournament” n’e.

Tur aña Tony a apoyá i yuda spònser e torneo. Nos lo sinti su falta inmensamente riba kanchanan di CSC.

Mester menshoná ku Tony tabata un di esnan ku tabata inskribí asina e sa e fecha di inskripshon pa e ta sigur ku e ta di schedule.

Pa duna honor na un gran hòmber, tur su amigunan di tènis a inskribí pa partisipá na e torneo aki.

Djaweps, dia 23 di òktober lo tin apertura pa 18:30 ‘or ku un seremonia i despues nos ta sigui ku desvelo di kancha 2 ku lo bira for di e momentu ei KANCHA TONY.

Hopi agradesido pa tur lokual Tony a hasi pa CSC i pa e deporte di tènis nos ta invitá tur su amigunan i tenistanan pa ta presente na apertura. Tur hende ta BON BINÍ.

Despues di e parti ofisial Ryan Hollander lo splika e reglanan di e torneo i seguidamente ta sigui ku apertura dor di Michelle i Daniela Henriquez ,yu muhé i subrina di Tony.

Laga nos keda ku bunita rekuerdo di Tony i ku e torneo aki lo ta un éksito pa tur ku ta partisipá.

October 22, 2014October 22, 2014

Torneo di Waterpolo ta kontinuá na Pisina Bennie Leito

WILLEMSTAD – E ekiponan di Curaçao Sharks Aguatics i Curaçao Dolphins konhuntamente a bai di akuerdo pa nan miembronan ku ta praktiká e deporte di waterpolo, wòrdu repartí den 3 diferente ekipo. E miembronan a keda meskla entre e 3 ekiponan ku a ser forma pa partisipá na un torneo lokal di waterpolo. E ekiponan aki ta Wild Hogs, Sea Turtles i Poseidon. E kompetensia ku ta wòrdu hunga estilo ’round robin’ lo bai dos buèlta i despues lo tin e final entre e ekiponan ku kaba na promé i di dos lugá riba e tabla di posishon. E kompetensia a ranka sali djasabra último dia 18 di òktober na pisina Bennie Leito.

Pa loke ta e resultado di e promé enkuentronan ku a tuma lugá durante fin di siman ku a pasa, den e promé wega e ekipo komandá dor di Kevin Pieter, Sea Turtles, a gana di e ekipo di Wild Hogs ku skor di 14-5 i den e di dos partido e ekipo di Poseidon a gana e ekipo di Wild Hogs 12 – 9. E fin di siman benidero, pa ta mas eksakto djasabra 25 di òktober, e kompetensia lo kontinuá ku 2 enkuentro, e promé partido lo ta entre Sea Turtles i e ekipo Poseidon i den e di dos enkuentro Sea Turtles lo enfrentá Wild Hogs. E kompetensia ta kuminsá 12’or di mèrdia na Pisina Bennie Leito. Bin na bòshi bin apoyá e deporte di waterpolo.

Skema di partido:

25- OKT	Djasabra
4	12:00	Poseidon-Turtles	–
5	13:30	Turtles-Hogs	–
1-Nov	Djasabra
6	12:00	Hogs-Poseidon	–
7	13:30	Turtles-Poseidon	–
15-Nov	Djasabra
8	Final
	Ganado 1 vs Ganado 2		–

October 20, 2014October 20, 2014

Nominadonan pa deportista di luna Sèptèmber 2014

WILLEMSTAD – Komishon Deportista di Luna riba djasabra 18 di òktober 2014, a reuní den sala di reunion di FFK, kaminda a evaluá i diskutí riba e kandidatonan ku a keda presentá pa miembronan dje komishon i federashonnan pa e premiashon di “Deportista di Luna” korespondiente na luna di Sèptèmber 2014. Manera semper ta keda spliká, na momentu ku a inisiá ku e proyekto aki, e premio aki mester sirbi komo un estímulo, a base di prestashon i komportashon, pa nos deportistanan lokal, ku ta biba na Kòrsou i ku ta kompetí den kompetensianan lokal komo tambe internashonal den representashon di pais Kòrsou.

E komishon a yega na e siguiente nominadonan:

Ailén Mena (Ahedres). Durante 20 pa 21 di sèptèmber último, Federashon di Ahedres FEDAKO a organisá su kampeonato anual femenino di Ahedres pa di 3 biaha na Lions Dive & Beach Resort. Tabata akinan ku WFM Ailén Mena a logra mantené su korona komo kampion di Kòrsou ku un skor perfekto di 5 punto for di 5 wega. Ounke Ailén Mena a logra gana tur su partidonan, mester bisa ku no tabata algu fásil. Den di kuater buèlta su kontrinkante Rita Koopmanschap tabatin basta bentaha di material, pero debí na e posishon un poko kompliká pa evaluá Ailén Mena ta logra igualá e wega i despues hasta bai ku e viktoria. Pa e motibunan ya menshoná, Ailén Mena a keda skohe komo nominado pa deportista di luna Sèptèmber 2014.

Ramiro Balentina (Beisbòl). Ramiro Balentina ta un pelotero miembro di e ekipo Sta Maria Pirates Chippie. Tabata den luna di sèptèmber, durante di e final di nos beisbòl dòbel A, ku Ramiro Balentina tabata klave pa su ekipo Sta Maria Pirates titulá kampion di e temporada aktual. Defensivamente Ramiro ta un kècher ku práktikamente no ta pèrmití niun koredó kontrali avansá na base demostrando un tremendo brasa. Na bate tambe Ramiro a sòru pa konektá e bala oportuno pa yuda den e ofensiva tambe di su ekipo kaminda nan ta logra e titulo máksimo komo kampion di Kòrsou. Ramiro a keda nombra komo MVP di e gran final di e kampionato di beisbòl dòbel A. Pa e motibunan ya menshoná, Ramiro Balentina a keda skohe komo nominado pa deportista di luna Sèptèmber 2014.

Rashid Rosalina (Atletismo). Rashid Rosalina ta un atleta di 19 aña sumamente dedika na su deporte di atletismo i ta miembro di e ekipo di atletismo The Eagles. Tabata durante di e kareda di ‘RBC The Eagles Wechi Run’ ku a tuma lugá dia 07 di sèptèmber último ku e hóben atleta Rashid Rosalina ta logra e titulo di “overall winner”. Rashid a kompetí riba e distansha di 7 kilometer i a kore esaki ku basta fasilidat den un tempu di 20:53 minüt. Ta bon pa menshoná ku esaki tabata tambe e di 5 titulo grandi pa Rashid pa loke ta 2014. Pa e motibunan ya menshoná, Rashid Rosalina a keda skohe komo nominado pa deportista di luna Sèptèmber 2014.

Komishon ta gradisí e siguiente spònsernan ku ta yuda pa e premiashon aki por bira posibel: CHANGES PRO SPORT – RIO LOUNGE & SPORTS BAR- MCB – CSOF – SALAS SPORT SHOP – LILO SULVARAN – ALLSTAR EMBROIDERY – DIORCA NV – PELOTA – DE JONGH’S SPORTHUIS – FOTO STUDIO KORT – STRAK STRAK BARBERSHOP – FFK – SELIKOR – FUNDASHON NOBO – COCA COLA.

E anunsio i premiashon di e ganadó lo tuma lugá:

Fecha: Djasabra 25 Òktober 2014.

Ora: 18.00 – 19.00’or.

Sitio: Rio Lounge & Sports Bar, Chuchubiweg 10?Damacor.

Den un ambiente liber di humamentu i liber di alkohòl!

October 8, 2014October 8, 2014

Regis Loo ta finalisá na di 7 lugá

WILLEMSTAD – Regis Loo a finalisá na di shete lugá den e kompetensia di Body-building Centro Americano y del Caribe, na St.Maarten. Regis a partisipá den e kategoria di ‘Heavy Weight’.

“No tur ora bo ta gana, pero mi ta satisfecho si ku mi partisipashon. Kada bes ku mi no logra, mi ta siña di fayonan pa next time mi bini mihó,” Regis a deklará.

E atleta ke gradisí tur ku a sosten’e den preparashon i durante di e kompetensia; Bob Esprit, Stanley Fransisca, Cesar Palacios, Go Weekly, OrcoBank, Savannah Resort & Car rental i tur otro persona ku di un o otro forma a yuda mi den e periodo di preparashon.

Tambe e atleta ta pidi pa tur doño di negoshi i Gobièrnu sigui ehèmpel di su spònsernan i hinka sèn den Deporte pa nos hubentut por sigui dilanti.

October 2, 2014October 2, 2014

Regis Loo den kompetensia di Body-building Centro Americano y del Caribe

WILLEMSTAD – Awe, djaweps 2 di òktober, lo kuminsá e kompetensia di Body-building Centro Americano y del Caribe, na St.Maarten. E body-builder lokal Regis Loo, ku resientemente a logra e título di Heavy weight den e Kampeonato di Kòrsou, lo representá nos isla, huntu ku otro bodybuildernan lokal den e kompetensia importante aki.

Aña pasá Regis a logra di 3 lugá Super Heavy weight den e kompetensia aki di Karibe, ku a tuma lugá na Sto. Domingo. Regis Loo ta un bodybuilder ku ta tuma su deporte hopi serio i ta hiba un programa di treinen hopi disipliná pa logra su meta.

Esaki apesar di tur kontra tempu ku e deporte i e deportistanan ta pasando aden pa por partisipá i representá nos pais. Den e kaso aki Federashon ta paga solamente e pasashi, miéntras ku e deportistanan mes tin ku sòru pa nan kuminda i alohamentu na isla riba.

Di tur manera Regis ke gradisí tur esnan ku ta kooperá ku n’e den su preparashon; BoB Esprit Gym, Diamond Gym, Orco Bank, GoWeekly, Savanah Resort & Rental Car, Su Mayornan, Cesar Palacios i otro amigunan ku ta apoy’é i yud’é den tempu difísil.

September 25, 2014September 25, 2014

Michael Arvelo ta solushoná problema den biar na Ecuador

WILLEMSTAD/GUAYAQUIL – Djaluna dia 2 di Sèptèmber, Michael Arvelo ku ta vise presidente di Confederacion Panamericana de Billar, a risibí yamada di ofisina prinsipal di e konfederashon, p’e tuma na su enkargo un problema grandi ku a surgi na Ecuador. Lokual a sigui despues ta dokumentunan ku ta relatá e problema entre e federashon di e pais i e klupnan afiliá di rònt e pais i ku t’e na e momentunan ei no tabata mira solushon, ya pa mas di tres luna.

Djárason 17 di sèptèmber, Sr. Arvelo a sali pa Ecuador pa tres dia i djaweps a reuní pa mitar di nuebe di mainta den Hotel Ramada na Guayaquil ku e representante di minister di deporte Sr. Alfredo Anzules i Sr. Alex Gonzales sekretario general di Komité Olímpiko Ekuatoriano. Aki e ta presentá na nan e posibel solushon pa e problemanan i tur dos a keda satisfecho pa lokual Sr. Arvelo a trese dilanti. Riba petishon di e dos organisashonnan, Sr. Arvelo a keda asigná pa supervisá e elekshon pa direktiva nobo ku mester a tuma lugá e mainta ei den e sala prinsipal di e ‘Federacion Deportiva Nacional del Ecuador’.

Den e edifisio aki ta kaminda tur e ofisinanan di e deportenan amatùr di Ecuador ta situá .Den sala kompletamente yen a tuma lugá e elekshon kaminda a elegí e direktiva nobo pa e próksimo 4 añanan .Tur kos a kana perfektamente bon i tantu Sr. Anzules komo Sr. Gonzales , e direktiva nobo i tambe CPB, a aploudí e esfuersonan di Michael Arvelo ku a duna 100% pa a trese solushon pa un problema ku awe ya ta forma parti di pasado deportivo di Ecuador.

Mas atardi riba petishon di Sr. Luis Velez Michalon ku ta e presidente nobo, Arvelo a duna un ora di klínika na e forsa téknika ku ta bou di direkshon di Sra. Llalile Moreira ku ta traha ku e sekshon hubenil. Eksperensha di mas di 30 aña den e deporte di biar tantu lokal i internashonal, a kontribui hopi na solushon di e problema. Sr. Carlos Rivera, presidente di ‘Confederacion Panamericana de Billar’, a manda felisitá Michael Arvelo pa un bon trabou hasi den representashon di nos federashon kontinental.

September 16, 2014September 16, 2014

Kampeonato Femenino di Ahedres 2014

WILLEMSTAD – Fin di siman benidero Federashon di Ahedres (FEDAKO) ta organisá su kampeonato anual di ahedres pa muchanan muhé i pa damanan di Kòrsou. Ta di 3 biaha konsekutivo ku FEDAKO, ku ta e federashon ku ta promové e deporte noble di ahedres, ta organisá e gran evento aki.

Manera tabata e kaso durante e añanan anterior e kampeonato lo tuma lugá serka e spònser prinsipal ku ta Lions Dive & Beach Resort.

Partisipashon ta habri pa tur dama entre 8 i 80 aña, ku posibilidat naturalmente pa eksepshon pa esnan ku no ta kai den e kategoria di edat menshoná. Lo tin premionan disponibel pa diferente kategoria di edat. Ademas e partisipantenan por akumulá punto pa klasifiká i representá Kòrsou den eksterior.

E kompetensia ta konsistí di 5 buèlta di kual 3 partido lo tuma lugá riba djasabra 20 di sèptèmber kuminsando 13:00 ’or i 2 partido riba djadumingu 21 di sèptèmber kuminsando 10:00 ‘or. Tur e partidonan lo tuma lugá den e sala di konferensiá di Lions Dive & Beach resort.

Inskripshon pa ahedresistanan mayor di 20 aña ta kosta fl. 10, mucha ta paga fl. 5 i miembronan di FEDAKO por partisipá gratis. Sòru presentá mas tempran posibel pa inskribí.

Un invitashon ta bai na tur hende muhé pa usa e oportunidat aki pa trata di kita e korona for di e damita Ailen Mena, kende a kaba di risibí e título Maestro Femenino di e Federashon Internashonal di Ahedres (FIDE).