Otro Archives | Page 26 of 38

September 15, 2014September 15, 2014

Arnalda Margarita deportista di Luna Ougùstùs 2014

WILLEMSTAD – E sòftbolista Arnalda Margarita, djasabra 13 di sèptèmber, a keda premiá komo “Deportista di Luna” di luna ougùstùs 2014 di parti di un komishon konsistiendo di periodista- i reporteronan deportivo di medionan di komunikashon sosial. Arnalda Margarita den luna di ougùstùs a tira tur inen pa su tim di Pichingolo Nissan den e kampeonato di sòftbòl femenino ‘fastpitch’. Arnalda a tira 47 inen i poncha 49 batido, ku ta mas ku 1 ponche pa inen. E rekòrt di Arnalda den ougùstùs ta di 6 wega ganá i 1 pèrdí. E la tira 8 inen tambe den un wega ku Soto i Pichingolo a keda empatá 5-5. Fuera ku Arnalda a tira 1 wega di blankeo, Arnalda a pone su mes den buki di rekòrt di nos sòftbòl femenino ‘fastpitch’ ora e la tira un “PERFECT-GAME” pa yuda Pichingolo Nissan gana di Sta. Rosa Angels Vanddis ku skor di 8-0. Arnalda ta un deportista hopi ehemplar semper kla pa yuda su organisashon. Apesar di tin su trabou i famia, Arnalda ta kombiná esaki tremendo pa por train i ta na tur wega ku hopi amor. Pa e motibunan ya menshoná, Arnalda Margarita a keda skohe komo deportista di luna Ougùstùs 2014

Ademas di Arnalda Margarita, tambe a premia e dos otro nominadonan, Isaï Marselia (Futbòl) i e ekipo Sta. Maria Pirates Hubenil (Beisbòl). Tur tres nominado a risibí un sertifikado den leshi, opsekio di Komishon deportista di luna i Diorca NV. E tres nominadonan a risibí un bunita medaya di Salas Sport Shop. Otro premionan pa e ganadó: Un kaha di PowerAde opsekio di Coca Cola, giftcheque di Fl. 150,– di Changes pro Sport, giftcheque di Fl. 100,– di FDOK, 100 florin opsekio di Sr. Lilo Sulvaran, giftcard di 300 florin di MCB, giftcard di 300 florin di Selikor i un giftcheque di Fl. 50,– di Pelota. Strak Strak Barbershop & Kapsalon a regalá Arnalda Margarita un drechá di kabei pa henter un luna, tambe foto studio Kort a regalá Arnalda e posibilidat pa saka un potrèt kompletamente grátis i fundashon Nobo a regalá e deportista di luna Arnalda Margarita un bunita trofeo.

Pa e dos otro nominadonan: Un giftcard di 300 florin di Selikor, giftcard di Fl. 100,- opsekio di Sr. Lilo Sulvaran, giftcard di Fl. 100,– opsekio di Diorca NV i Komishon deportista di luna, giftcheque di Fl. 50,– di De Jongh’s Sporthuis i un kaha di PowerAde opsekio di Coca Cola.

Allstar Embroidery a enkargá su mes un biaha mas pa miembronan dje komishon ta uniformá den 2014, miéntras ku Rio Lounge & Sports Bar a pone su lokalidat na disposishon pa e premiashon por a tuma lugá tur luna durante di hinter 2014 serka nan. Di parti komishon deportista di luna un pabien na e deportista di luna i e nominadonan.

Komishon ta gradisí e siguiente spònsernan ku ta yuda pa e premiashon deportista di luna 2014 aki a bira posibel:

MCB – CHANGES PRO SPORT – RIO LOUNGE & SPORTS BAR- SELIKOR – DIORCA NV – SALAS SPORT SHOP – LILO SULVARAN – FDOK – PELOTA – ALLSTAR EMBROIDERY – DE JONGH’S SPORTHUIS – FOTO STUDIO KORT – STRAK STRAK BARBERSHOP – FFK- FUNDASHON NOBO – COCA COLA.

September 9, 2014September 9, 2014

Kore baiskel ku Krus Kòrá Kòrsou tabata un eksito total

WILLEMSTAD – Krus Kòrá Kòrsou ta gradisi un i tur ku di un forma of otro a kopera pa e aktividat di baiskel ‘Paseo di baiskel krus kòrá Kòrsou’ tabata unu eksitoso. Manera a splika anteriormente, semper nan tei pa yuda i awor nan a pidi nos koperashon pa yuda nan, pa di e forma aki nan por sigui yuda. Krus Kora Kòrsou ta sumamente kontentu kon e pueblo di Kòrsou a reakshona i kopera ku e paseo riba baiskel. Tabata djadumingu ultimo 07 di sèptèmber ku esaki a tuma luga i un kantidat enorme di partisipante a akudi riba e lugá di stashoná outo na Kompleho Deportivo Casa Grandi, kaminda e paseo a start i finalisá. E aktividat a konta tambe ku tremendo animashon musikal di DJ Argenis Huerta Ta Toka ku a anima e aktividat ku su estilo uniko. Krus Kòrá Kòrsou un biaha mas ta gradisi pa e soten brindá i ta sigui yuda manera pa años nan a bin ta hasi.

September 9, 2014September 9, 2014

Nominadonan pa deportista di luna Ougùstùs 2014

WILLEMSTAD – Komishon Deportista di Luna riba djasabra 06 di sèptèmber 2014, a reuní den sala di reunion di FFK, kaminda a evaluá i diskutí riba e kandidatonan ku a keda presentá pa miembronan dje komishon i federashonnan pa e premiashon di “Deportista di Luna” korespondiente na luna di Ougùstùs 2014. Manera semper ta keda spliká, na momentu ku a inisiá ku e proyekto aki, e premio aki mester sirbi komo un estímulo, a base di prestashon i komportashon, pa nos deportistanan lokal, ku ta biba na Kòrsou i ku ta kompetí den kompetensianan lokal komo tambe internashonal den representashon di pais Kòrsou.

E komishon a yega na e siguiente nominadonan:

Isaï Marselia (Futbòl). Tabata durante di weganan di promé buèlta pa klasifikashon pa mundial U-20, ku Isaï ta anotá un total di 5 gol. Isaï a anotá 5 di e 12 golnan ku Kòrsou a anotá, den e torneo drentando komo suplente. Promé tabata riba djabièrnè 1 ougùstùs ku e tabatin un hattrick. Isai a drenta wega na minüt 28, pa seguidamente anotá na minütnan 35, 42 i 85, den partido ku Kòrsou a gana di Anguilla 9-0. Den e segundo wega riba djadumingu dia 3 ougùstùs, Isaï a drenta na minüt 58, pa seguidamente anotá na minütnan 66 i 72, den partido ku Kòrsou a gana St. Kitts 3-0 i asina klasifiká pa e segundo buèlta. Isaï Marselia ta miembro di e ekipo trikolor di Jong Holland i a debutá e aña aki den divishon máksimo di futbòl lokal. Pa e motibunan ya menshoná, Isaï Marselia a keda skohe komo nominado pa deportista di luna Ougùstùs 2014.

Sta. Maria Hubenil (Beisbòl). E ekipo di beisbòl Sta. Maria Hubenil den e temporada 2014 sigur a demostrá nan efektividat kolektivo i pa di dos aña sigui ta titulá kampion Hubenil. Tabata den luna di ougùstùs ku e ekipo di Sta Maria Hubenil ta enfrentá e ekipo Marchena Braves Hubenil den e seri final. Un final ku tabata un seri mihó di 5 ku e ekipo di Sta Maria ganando esaki 3-1 di e fuerte ekipo Marchena Braves. Sta Maria ta logra gana e promé wega ku anotashon pèrtá di 6-5. E ekipo di Marchena Braves ta bin desidido den e di dos enkuentro i ta logra viktoria ku skor di 9-2 pa asina empatá e seri final. Sta Maria ta re agrupá bèk i ta usa nan sistema kolektivo i ta gana e di tres wega ku skor di 8-3 i ta tuma bentaha di 2-1 den e seri final. Den e di 4 enkuentro e ekipo di Marchena Braves ta duna tremendo bataya, pero e ekipo di Sta Maria ta anotá e kareda di viktoria den kabes di inen 9 pa asina bai ku e viktoria ku anotashon di 6-5 i ta titulá kampion Hubenil di temporada 2014. Pa e motibunan ya menshoná, e ekipo di beisbòl Sta. Maria Hubenil, a keda skohe komo nominado pa deportista di luna Ougùstùs 2014.

Arnalda Margaritha (Sòftbòl). Arnalda Margaritha den luna di ougùstùs a tira tur inen pa su tim di Pichingolo Nissan den e kampeonato di sòftbòl femenino fastpitch. Arnalda a tira 47 inen i poncha 49 batido, ku ta mas ku 1 ponche pa inen. E rèkert di Arnalda den ougùstùs ta di 6 wega ganá i 1 pèrdí. E la tira 8 inen tambe den un wega ku Soto i Pichingolo a keda empatá 5-5. Fuera ku Arnalda a tira 1 wega di blankeo, Arnalda a pone su mes den buki di rèkert di nos sòftbòl femenino ‘fastpitch’ ora e la tira un “PERFECT-GAME” pa yuda Pichingolo Nissan gana di Sta. Rosa Angels Vanddis ku skor di 8-0. Arnalda ta un deportista hopi ehemplar semper kla pa yuda su organisashon. Apesar di tin su trabou i famia, Arnalda ta kombiná esaki tremendo pa por train i ta na tur wega ku hopi amor. Pa e motibunan ya menshoná, Arnalda Margaritha a keda skohe komo nominado pa deportista di luna Ougùstùs 2014.

Komishon ta gradisí e siguiente spònsernan ku ta yuda pa e premiashon aki por bira posibel: CHANGES PRO SPORT – RIO LOUNGE & SPORTS BAR- MCB – CSOF – SALAS SPORT SHOP – LILO SULVARAN – ALLSTAR EMBROIDERY – DIORCA NV – PELOTA – DE JONGH’S SPORTHUIS – FOTO STUDIO KORT – STRAK STRAK BARBERSHOP – FFK – SELIKOR – FUNDASHON NOBO – COCA COLA

E anunsio i premiashon di e ganadó lo tuma lugá:
Fecha: Djasabra 13 Sèptèmber 2014.
Ora: 18.00 – 19.00’or.
Sitio: Rio Lounge & Sports Bar, Chuchubiweg 10?Damacor.
Den un ambiente liber di humamentu i liber di alkohòl!

September 3, 2014

Paseo di baiskel Krus Kòrá Kòrsou

WILLEMSTAD – Semper nan tei pa yuda i awor nan ta pidi nos koperashon pa yuda nan, pa di e forma aki nan por sigui yuda. Krus Kòrá Kòrsou di un manera sano i alegre ta organisá un paseo di baiskel ku nan a titulá ‘Paseo di baiskel krus kòrá Kòrsou’. E paseo riba baiskel aki ta tuma lugá djadumingu awor 07 di sèptèmber saliendo i finalisando riba e lugá di stashoná outo na Kompleho Deportivo Casa Grandi z/n (ántes Radio Hit 100.3).

E aktividat ta plania pa start 8’or di mainta i lo tin tremendo animashon musikal di DJ Argenis Huerta Ta Toka. Bo kontribushon ta únikamente 20 florin i di e forma aki bo ta kontribuí ku krus kòrá Kòrsou pa nan por sigui yuda manera pa años nan a bin ta hasi. E karchinan ta optenibel na ofisina di krus kòrá (Parera) i na Vista Bike. Pa mas informashon por yama na 512-4535 of na 461-4630 durante ora di ofisina. Ban yuda krus kòrá pa nan por sigui yuda.

September 1, 2014September 1, 2014

Gernailys ‘Nelly’ Zimmerman deportista di Luna Yüli 2014

WILLEMSTAD – E hoben biardista Gernailys ‘Nelly’ Zimmerman,djasabra 30 di ougùstùs,a keda premiá komo “Deportista di Luna” di luna yüli 2014 di parti di un komishon konsistiendo di periodista- i reporteronan deportivo di medionan di komunikashon sosial. Na luna di yüli Gernailys tabata parti di e delegashon di Federashon Biar Kòrsou, ku a bai Medellin Colombia i a partisipá na ‘Campeonato Panamericana de Pool’, den representashon di Kòrsou. Tabata pa promé biaha ku a organisá tur e disiplinanan den un solo evento, kual nan tabata bola 8, bola 9 i bola 10. ‘Nelly’ un biaha mas a demostrá su abilidat den e deporte di biar i den e kategoria femenino bola 8, ta gana di e kampeon di Argentina, pa logra su pase pa semifinal. Den semifinal e ta kai vensí kontra di Carlin Sanchez di Venezuela, kende tambe ta bin resultá e kampion. ‘Nelly’ di e forma aki ta bin logra konkista e di tres lugá i ta gana medaya di Bròns den e evento bola 8 femenino di e ‘Campeonato Panamericana de Pool’. ‘Nelly’ tambe ta logra e premio di ‘Fair Play’ di e torneo, kual tabata premio ku pa promé biaha tabata disponibel. Pa e motibunan menshoná, Gernailys ‘Nelly’ Zimmerman, a keda skohe komo deportista di luna yüli 2014.

Ademas di Gernailys ‘Nelly’ Zimmerman, tambe a premia e dos otro nominadonan, Chade Nersicio (Natashon) i Richard Moesker (Beisbòl). Tur tres nominado a risibí un sertifikado den leshi, opsekio di Komishon deportista di luna i Diorca NV. E tres nominadonan a risibí un bunita medaya di Salas Sport Shop. Otro premionan pa e ganadó: Un kaha di PowerAde opsekio di Coca Cola, giftcheque di Fl. 150,– di Changes pro Sport, giftcheque di Fl. 100,– di CSOF, 100 florin opsekio di Sr. Lilo Sulvaran, giftcard di 300 florin di MCB, giftcard di 300 florin di Selikor i un giftcheque di Fl. 50,– di Pelota. Strak Strak Barbershop & Kapsalon a regalá Gernailys ‘Nelly’ Zimmerman un drechá di kabei pa henter un luna, tambe foto studio Kort a regalá Nelly e posibilidat pa saka un potrèt kompletamente grátis i fundashon Nobo a regalá e deportista di luna Gernailys ‘Nelly’ Zimmerman un bunita trofeo.

Pa e dos otro nominadonan: Un giftcard di 300 florin di Selikor, giftcard di Fl. 100,- opsekio di Sr. Lilo Sulvaran, giftcard di Fl. 100,– opsekio di Diorca NV i Komishon

August 27, 2014August 27, 2014

Nominadonan pa deportista di luna Yüli 2014

WILLEMSTAD – Komishon Deportista di Luna a reuní den sala di reunion di FFK, kaminda a evaluá i diskutí riba e kandidatonan ku a keda presentá pa miembronan dje komishon i federashonnan pa e premiashon di “Deportista di Luna” korespondiente na luna di Yüli 2014. Manera semper ta keda spliká, na momentu ku a inisiá ku e proyekto aki, e premio aki mester sirbi komo un estímulo, a base di prestashon i komportashon, pa nos deportistanan lokal, ku ta biba na Kòrsou i ku ta kompetí den kompetensianan lokal komo tambe internashonal den representashon di pais Kòrsou.

E komishon a yega na e siguiente nominadonan:

1. Chade Nercisio. Chade ta praktiká e deporte di natashon i durante di luna di yüli último, tabata parti di e delegashon lokal ku a kompetí den e kompetensia di CISC, den representashon di Kòrsou. Nos representantenan a regresá kas ku 10 medaya i tambe 10 finalista na di 4 lugá, unda tur landadó di Kòrsou a logra yega final den nan kompetensianan. Chade durante di e kompetensia aki, a logra vários medaya i kibrando dos rèkert i tambe a optené e trofeo di mihó landadó den su kategoria. Chade ku e logronan aki, tambe a drecha su tempunan i posishoná su mes mas altu den ranking di Karibe, meskos ku demas landadónan lokal, yudando Kòrsou pa mantené su mes den tòp 10 di Karibe. Pa e motibunan menshoná, Chade Nercisio, un biaha mas, a keda skohe komo nominado pa deportista di luna, bálido pa luna di yüli 2014.

2. Gernailys ‘Nelly’ Zimmerman. Gernailys tabata parti di e delegashon di Federashon Biar Kòrsou, ku a bai Medellin Colombia i a partisipá na ‘Campeonato Panamericana de Pool’, den representashon di Kòrsou. Tabata pa promé biaha ku a organisá tur e disiplinanan den un solo evento, kual nan tabata bola 8, bola 9 i bola 10. ‘Nelly’ un biaha mas a demostrá su abilidat den e deporte di biar i den e kategoria femenino bola 8, ta gana di e kampeon di Argentina, pa logra su pase pa semifinal. Den semifinal e ta kai vensí kontra di Carlin Sanchez di Venezuela, kende tambe ta bin resultá e kampion. ‘Nelly’ di e forma aki ta bin logra konkista e di tres lugá i ta gana medaya di Bròns den e evento bola 8 femenino di e ‘Campeonato Panamericana de Pool’. ‘Nelly’ tambe ta logra e premio di ‘Fair Play’ di e torneo, kual tabata premio ku pa promé biaha tabata disponibel. Pa e motibunan menshoná, ‘Nelly’ Zimmerman, a keda skohe komo nominado pa deportista di luna yüli 2014.

3. Richard Moesker. Richard ta picher di Wild Cats ku a gana 2 wega durante di luna di yüli 2014. Esaki ku hopi bon sifra. Riba dia 7 yüli, pichando pa Wild Cats kontra di Sta. Rosa Indians, el a tira 6.2 ining sin permití kareda. El a poncha 10 batidó kontrali i a permití apénas 3 hit pa gana e partido. Seguidamente tabata dia 28 yüli, ku Richard Moesker atrobe kontra di Sta. Rosa Indians, ta tira tres entrada di relevo. Esaki sin permití hit ni kareda i ku 5 ponche, pa duna su ekipo e viktoria i yuda pa Wild Cats registrá un ‘no hit no run’. Pa e motibunan ya menshoná, Richard Moesker a keda skohe komo un di e nominadonan, pa deportista di luna yüli 2014.

Komishon ta gradisí e siguiente spònsernan ku ta yuda pa e premiashon aki por bira posibel:

CHANGES PRO SPORT – RIO LOUNGE & SPORTS BAR- MCB – PETRO INDUSTRIAL NV – CSOF – SALAS SPORT SHOP – LILO SULVARAN – ALLSTAR EMBROIDERY – DIORCA NV – PELOTA – DE JONGH’S SPORTHUIS – FOTO STUDIO KORT – STRAK STRAK BARBERSHOP – FFK – SELIKOR – FUNDASHON NOBO – COCA COLA.

E anunsio i premiashon di e ganadó lo tuma lugá:

Fecha: Djasabra 30 ougùstùs 2014.

Ora: 18.00 – 19.00’or.

Sitio: Rio Lounge & Sports Bar, Chuchubiweg 10?Damacor.

Den un ambiente liber di humamentu i liber di alkohòl!

August 26, 2014August 26, 2014

Boca Star Pool Room ku kurso grátis di biar

WILLEMSTAD – Boca Star Pool Room a start ku kurso grátis pa Hóbennan di 7 te ku 14 aña ku ke siña hunga e deporte di Pool/Biar.

E práktikanan ta tuma lugá na Boca Star Pool Room na Boka Sami serka Nelson Tremus i Nelly Zimmerman.

Nelson Tremus propietario di Boca Star Pool Room, ku ta traha inkansablemente pa engrandese Biyar bou di hóbennan i Nelly Zimmerman ku sigur no mester di ningun introdukshon pa tur e premionan ku el a logra riba tereno internashonal representando Kòrsou den eksterior den e deporte aki, a start kaba ku 12 hóben ku ta tumando kurso pa siña hunga biar pero ainda tin lugá pa mas mucha.

Tur hóben ku ta interesá por yama na number di telefòn 566-8633 i inskribí pa por forma parti di e inisiativa grandi aki pa siña hunga Biar bou di guia profeshonal i liber di kosto.

August 9, 2014August 9, 2014

Burney ‘Nini’ Fonseca ta sali liber pendiente di e kaso Maximus

WILLEMSTAD – Ayera hues Sr. Constantijn van Dam van Isselt a bai di akuerdo ku e petishon di Ministerio Públiko pa suspendé e kaso di Burney ‘Nini’ Fonseca. Segun hues Van Dam van Isselt, Ministerio Públiko no a bisa ainda ki dia nan lo por trese e kaso Maximus dilanti hues. Pa hues Van Dam van Isselt, e interes di e akusado pa warda su kaso den libertat ta pisa mas ku e interes hudisial na e momentunan aki i konsekuentemente e akusado tin e derechi di warda su huisio den libertat. Apesar di esaki, Burney Fonseca ta keda un sospechoso i mester keda disponibel pa polis i hustisia. Tambe e akusado no mag di bandoná Kòrsou i mester entrega su pasaporte.

August 8, 2014August 8, 2014

Kaso Magnus dia #4

WILLEMSTAD – Ayera a kontinuá e tratamentu di e kaso Magnus ora ku a kontinuá ku abogado Sra. Alicia Blonk a trese su defensa kontra di e akusashonnan hasi dor di Ministerio Públiko kontra di su kliente Carlos Pieter. Ya e dia anterior fiskal Sr. Sr. Gert Rip a trese dilanti su demanda pa e akusado. Pa Pieter esaki tabata un demanda di 5 aña pa su partisipashon den e asesinato di Sr. Helmin Wiels i tambe un kaso di atrako ku a tuma lugá na Camara Rent A Car den Punda.

Ministerio Públiko ta basa su akusashon kontra Pieter a base di primordialmente di deklarashonnan ku e propio akusado a duna i tambe deklarashon di otronan den kontra di e akusado. Mas aleu, Ministerio Públiko a logra haña evidensia di sierto echonan a base di komunikashon ku a keda di tap.

Abogado, Sra. Blonk ta konkordá su mes ku e abogadonan di Dangelo ‘Panchèk’ Damascus. Segun Sra. Blonk, den e kaso Magnus no tin sufisiente prueba kontra di su kliente i loke tin mes no ta impliká su kliente den nada robes. Pa loke ta trata e atrako na Camara Rent A Car e abogado ta di opinion ku akinan tampoko tin sufisiente prueba pa akusá su kliente di ta kómplise. E abogado a pidi Hues pa den su desishon tene kuenta ku e kondishon den kua su kliente ta sera den e sèlnan na Rio Canario. Pa e abogado esakinan ta sufisiente motibu pa Hues apsolvé su kliente di tur kargo.

Despues di a finalisá ku e kaso di Pieter, Hues a sigui e ora ei pa trata e posponementu di e kaso di Burney ‘Nini’ Fonseca. Pa Ministerio Públiko e kaso di Fonseca mester keda postpone ya komo ku e investigashon den e kaso Maximus no ta kompletu ainda. Segun fiskal Sr. Rip, e kaso di Fonseca ta na mitar ainda i Ministerio Públiko no ke trese mitar kaso dilanti.

Di otro banda, abogado di Fonseca, Sra. Marije Vaders no ta di akuerdo ku esaki. Segun e abogado si postpone e kaso mes no tin motibu pa su kliente keda sera. E abogado ta di opinion ku no tin sufisiente prueba pa mantené detenshon di su kliente. Tampoko e deklarashonnan ku a keda hasi den kontra di su kliente no ta nada konkreto i tambe inkonfiabel. Mas aleu e deklarashonnan e keda hala bek aden dor di e respektivo deklarantenan.

Awe Hues lo tuma un desishon kiko lo pasa den e kaso aki. Despues parti mèrdia tur e akusadonan lo haña chèns di duna un ultimo palabra.

Análisis:

Den e tratamentu di e kaso ayera por a nota un biaha mas ku e prueba prinsipal ku Ministerio Públiko tin ta deklarashonnan ku a keda hasi dor di entre otro e propio sospechosonan i otro testigunan. Tambe por a nota ku básikamente tur e abogadonan ta kore riba e mesun liña. Esta ku, e deklarashonnan no ta sufisiente i/of inkonfiabel pa proba kulpabilidat di nan kliente i e manera for di kua Ministerio Públiko a haña e deklarashonnan aki no ta konforme lei. E deklarashonnan ku Ministerio Públiko tin, ta pisa hopi i mas aun teniendo na kuenta ku mayoria di e deklarashonnan pa no bisa tur ta kuadra ku otro. Apesar di esaki, e dependensia ei tambe por ta devastador pa e kaso, den kaso ku Hues haña ku e deklarashonnan a ser haña di forma ilegal. Ku tur probabilidat awe nos por haña un idea di e manera kon Hues ta mira e kosnan ora e tuma un desishon den e kaso di posponementu di Burney ‘Nini’ Fonseca.

August 7, 2014August 8, 2014

Demanda di 5 i 20 aña pa Dangelo ‘Panchèk’ Damascus i Carlos Pieter

WILLEMSTAD – Ayera a kontinuá e tratamentu di e kaso Magnus ora ku Hues a trata e akusashonnan kontra Dangelo ‘Panchèk’ Damascus i Carlos Pieter.

Dangelo ‘Panchèk’ Damascus tin 5 akusashon den su kontra. Damascus ta keda akusá di ta enbolbí den dos kaso di asesinato, unu ta e asesinato di Sr. Helmin Wiels i e otro ta e asesinato di Raul ‘Bolle’ Martinez. Tambe Damascus ta wòrdu akusá di dos kaso di atrako arma i tambe poseshon ilegal di arma di kandela. Pa e akusashon nan aki fiskal Sr. Gert Rip a pidi un kondena di 20 aña pa Damascus.

Pa e akusado Carlos Pieter, fiskal Sr. Rip a pidi un kondena di 5 aña. Carlos tin dos akusashon den su kontra, esta su partisipashon den e asesinato di Sr. Helmin Wiels i tambe partisipashon den un kaso di atrako.

Den su rekisitorio fiskal Sr. Rip a pasa riba tur e pruebanan ku Ministerio Públiko tin den kontra di e dos akusadonan. Ta trata di primordialmente di deklarashonnan ku e propio akusadonan a duna i tambe deklarashon di otronan den kontra di e akusadonan. Tambe Ministerio Públiko a logra haña evidensia di sierto echonan a base di komunikashon ku a keda di tap.

Abogadonan di Damascus, Sra. Sophia i Lodowica na nan turno no ta di akuerdo ku e pruebanan ku Ministerio Públiko a presentá den kontra di su kliente. Segun e abogadonan, Ministerio Públiko no tin sufisiente prueba pa akusá Damascus di ta enbolbí den e dos kasonan di asesinato, tampoko e poseshon ilegal di arma di kandela. Konsekuentemente e abogadonan ke Hues apsolvé nan kliente di e akusashonnan aki. Pa loke ta trata e kaso di atrako na Hector Henriquez e abogadonan ta rekonosé kulpabilidat di nan kliente. Tambe den e kaso di atrako den Punda e abogadonan ta rekonosé e partisipashon di nan kliente. Pero akinan e abogadonan a pidi pa Damascus wòrdu akusá pa ladronisia i no ladronisia ku violensia ya komo ku no tabata tin violensia den e kaso aki.

Hues a opta ayera tardi pa laga e defensa di Carlos Pieter dor di Sra. Alicia Blonk pa awe mainta. Tambe awe Hues lo disidí si ta posponé e kaso di e akusado Burney ‘Nini’ Fonseca. Den kaso ku esaki no keda posponé, ta kuminsá ku e tratamentu di e kaso di Fonseca awe mèrdia.

Den e kaso di ayera un biaha mas pruebanan tékniko a hasi falta. E kaso di Ministerio Publiko ta basta sólido si tene na kuenta ku hopi di e deklarashonnan ta kuadra ku otro, pero e falta di prueba tékniko ta loke tog ta debilitá e kaso un tiki i por trese sierto duda den algun di e akusashonnan. Sin embargo, tur kos ta bin kai riba kon e Hues ta risibí e deklarashonnan aki, pero ku pruebanan tékniko Ministerio Públiko tabata tin un posibilidat di seya e kaso hermetikamente.