Category: Otro

Posted on

Elvis ‘Monster’ Kuwas ta enfrentá bida largu

WILLEMSTAD – E kaso kontra Elvis ‘Monster’ Kuwas a kontinuá ayera. Den e seshon di ayera fiskal Sr. Gert Rip a pidi un kondena di bida largu pa Kuwas. Di otro banda e abogado di Kuwas, Sra. Olga Saleh-Kostrzewski a pidi pa Hues no aseptá e kaso ku a keda trese dilanti pa Ministerio Públiko.

Den su rekisitorio fiskal Sr. Rip a pasa riba tur e pruebanan ku Ministerio Públiko tin den kontra di Kuwas. Ta trata aki di primariamente deklarashonnan ku e propio akusado a hasi i tambe deklarashon di otronan den kontra di e akusado. Tambe Ministerio Públiko a logra haña evidensia di sierto echonan a base di komunikashon ku a keda di tap. E uniko prueba tékniko ku fiskal a presentá ta un análisis di e lokalisashon di e telefòn selular di Kuwas. Ministerio Públiko a trese un eksperto for di Hulanda pa analisá den ki area e telefòn selular tabata riba 5 di mei 2013.

Abogado di Kuwas, Sra. Saleh-Kostrzewski na su turno no ta di akuerdo ku e forma ku Ministerio Públiko a optené e deklarashonnan den kontra su kliente. Segun e abogado, e deklarashonnan ku a keda hasi den kontra di su kliente e keda hasi bou di promesa di algu for di Ministerio Públiko. Tambe Sra. Saleh-Kostrzewski ta di opinion ku e deklarashonnan hasi kontra Kuwas no ta kuadra ku bèrdat. Pa loke ta trata e konfeshon di Kuwas, e abogado ta di opinion ku Kuwas a hasi esaki bou di preshon i sin representashon di su abogado.

Fiskal Sr. Rip den e seshon di ayera a hasi su máksimo pa proba su kaso kontra Kuwas. Sin embargo ta di wak kiko Hues ta bai hasi ku e defensa ku Sra. Saleh-Kostrzewski a presentá. Ta konvensente ku Kuwas ta involukrá den e akusashon kontra dje pero e manera ku e deklarashonnan kontra Kuwas a keda optené ta trese duda i ku tur probabilidat Hues lo bai konsiderá esaki den su desishon final. Kuantu konsiderashon Hues lo duna esaki lo bai ta di sumo importansia teniendo na kuenta ku e por tin no solamente efekto riba e kaso kontra Kuwas pero tambe den henter e Kaso Magnus i Maximus.

Falta di pruebanan tékniko a hasi Ministerio Públiko sumamente dependiente di deklarashonnan. Pruebanan tékniko lo a kita hopi di e peso for di e deklarashonnan i laga Ministerio Públiko ku un kaso muchu mas fuerte.

Posted on

Elvis ‘Monster’ Kuwas ta kambia deklarashon riba promé dia di Kaso Magnus

WILLEMSTAD – E promé dia di e kaso Magnus ta tras di lomba. Un dia ku a kuminsá kaminda tur e kuater akusadonan den e kaso a tende e akusashonnan ku tin den na kontra.

E akusado prinsipal, kual ta Elvis ‘Monster’ Kuwas a tende sinku akusashon den su kontra. Ta trata di tres kaso di asesinato, un kaso di atrako i poseshon ilegal di arma di kandela. Segun Ministerio Públiko,  e asesinatonan ku ta riba konsenshi di Kuwas ta esun di Sr. Helmin Wiels dia 5 di mei 2013, e asesinato di Raikel Conception dia 27 di yanüari i tambe e asesinato di Lionel Arnaud dia 8 di yüni 2012.

E akusado Dangelo ‘Panchèk’ Damascus ta keda akusá di ta enbolbí den dos kaso di asesinato, unu ta e asesinato di Sr. Helmin Wiels i e otro ta e asesinato di Raul ‘Bolle’ Martinez. Tambe Damascus ta wòrdu akusá di dos atrako arma i tambe poseshon di arma di kandela.

E otro akusado, kual ta Carlos Pieter ta keda akusá di partisipashon den e asesinato di Sr. Helmin Wiels i tambe su partisipashon den un atrako arma. Segun Ministerio Públiko, Pieter lo mester a sòru pa transporte di Elvis ‘Monster’ Kuwas, Raul ‘Bolle’ Martinez i/of otronan despues di e krímen

Burney ‘Nini’ Fonseca tin un akusashon na su kontra, i esei ta di a indusi entre otro Elvis ‘Monster’ Kuwas pa kometé asesinato di Sr. Helmin Wiels i rekulta otronan pa kometé e asesinato.

Despues ku Hues a presentá e akusashonnan kontra di e kuater sospechosonan a sigui ku e deliberashon prosedural di e kaso i tambe deliberashon riba si lo transmití oudio for di korte si of no. E ultimo aki a keda un biaha mas aprobá pa Hues.

Parti mèrdia a kuminsá ku e tratamentu di e akusashonnan kontra e akusado prinsipal kual ta Elvis ‘Monster’ Kuwas. Akinan e akusado a desmentí di ta enbolbí den e kaso di asesinato di Sr. Helmin Wiels. Esaki a bai kontra di deklarashonnan ku e akusado a hasi anteriormente, kaminda e akusado a atmití di a asesiná Sr. Wiels. Segun e akusado e la hasi e deklarashonnan ei bou di preshon i bou di promesa di Ministerio Públiko. Segun e akusado, Ministerio Públiko a promete ménos kastigu pa su kooperashon den e kaso i tambe a promete su kasa sèn i nan mudansa pa Hulanda.

Tabata un tiki difísil pa e Hues kaba di komprendé kon Kuwas a duna un deklarashon ku ta inkrimin’e siendo ku segun Kuwas e no a forma parti di e asesinato si Sr. Wiels.

Kontrali na deklarashonnan hasi pa testigunan den kontra di Kuwas, Ministerio Publiko no a trese pruebanan palpabel ku ta involukrá Kuwas den e asesinato di Sr. Wiels.

Mañan ta sigui ku e tratamentu di e kaso di Elvis ‘Monster’ Kuwas. Ta di spera ku mañan Ministerio Públiko lo trese algun prueba mas konkreto kontra Kuwas, paso loke a keda trese ayera i ku tin awor aki riba mesa ta un poko suak. Ministerio Públiko mester kuminsá hasi mas uso di prueba palpabel i kuminsá duna ménos importansia na pruebanan testimonial tradishonal kual ta tap telefòn i deklarashonnan di testigu. E tipo di pruebanan aki ta útil, pero lo sirbi mihó si bo por supstansiá nan ku pruebanan palpabel.

Posted on

Jean-Julien Rojer ta gana otro título di dòbel

WASHINGTON DC – Jean Julien Rojer huntu ku su partner Horia Tecau a gana otro titulo den tènis kategoria dòbel e temporada aki. Rojer i partner a derota Sam Groth i Leander Paes den e final di e torneo ATP na Washington, DC. A dura Rojer i Tecau un ora i 20 minüt pa derota nan kontrinkante ku skor di 7-5 i 6-4. Esaki ta bira e di kuater título ku e duo Rojer/Tecau ta gana e temporada aki.

Posted on

Chade Nersicio deportista di Luna Mei 2014

WILLEMSTAD – E landadó Chade Nercisio (Natashon),djasabra 07 di yüni,a keda premiá komo “Deportista di Luna” di luna aprel 2014 di parti di un komishon konsistiendo di periodista- i reporteronan deportivo di medionan di komunikashon sosial. Chade ta un hóben di 13 aña ku ta studia na Radulphus College i ta miembro di e ekipo Curacao Sharks Aquatics. Tabata durante di e Aruba Stingray Challenge, ku a tuma lugá den luna di mei na Aruba, ku Chade Nersicio, aparte di a logra kibra 6 rèkòrt di e Aruba Stingray Challenge, a kibra tambe 1 rèkòrt nashonal riba 50 meter lomba. Chade a bin kas ku un total di 7 medaya di oro i Chade a logra tambe di bin kas ku e trofeo di High Point Trophy. Pa e motibunan ya menshoná, Chade Nersicio a keda skohé komo deportista di luna mei 2014. Ademas di e landadó Chade Nercisio, tambe a premia e dos otro nominadonan, Ekipo maskulino Watakeli (Vòlibòl) i Virgil Henriquez (Outo Spòrt). Tur tres nominado a risibí un sertifikado den leshi, opsekio di Fundacion Social Petroindustrial i Diorca NV. E tres nominadonan a risibí un bunita medaya di Salas Sport Shop.

Otro premionan pa e ganadó: Un kaha di PowerAde opsekio di Coca Cola, giftcheque di Fl. 150,– di Changes pro Sport, giftcheque di Fl. 100,– di CSOF, 100 florin opsekio di Sr. Lilo Sulvaran, giftcard di 300 florin di MCB, giftcard di 300 florin di Selikor i un giftcheque di Fl. 50,– di Pelota. Strak Strak Barbershop & Kapsalon a regalá Chade Nersicio un drechá di kabei pa henter un luna, tambe foto studio Kort a regalá Chade Nersicio e posibilidat pa saka un potrèt kompletamente grátis i fundashon Nobo a regalá e deportista di luna Chade Nersicio un bunita trofeo.

Pa e dos otro nominadonan: Un giftcard di 300 florin di Selikor, giftcard di Fl. 100,- opsekio di Sr. Lilo Sulvaran, giftcard di Fl. 100,– opsekio di Diorca NV i Fundacion Social Petroindustrial, giftcheque di Fl. 50,– di De Jongh’s Sporthuis i un kaha di PowerAde opsekio di Coca Cola. Allstar Embroidery a enkargá su mes un biaha mas pa miembronan dje komishon ta uniformá den 2014, miéntras ku Rio Lounge & Sports Bar a pone su lokalidat na disposishon pa e premiashon por a tuma lugá tur luna durante di hinter 2014 serka nan. Di parti komishon deportista di luna un pabien na e deportista di luna i e nominadonan.

Posted on

Jean-Jullien Rojer ta titulá kampion den dòbel na Roland Garros

PARIS – Jean-Jullien Rojer a logra e título máksimo den e evento di ‘mixed doubles’ na Roland Garros. Rojer i su partner Anna-Lena Groenefeld di Alemania a sali pèrdè e promé set 4-6. Pero despues di e promé set, Rojer i partner a mustra nan superioridat riba nan oponente Nenad Zimonjic i Julia Görges. E Kurasoleño huntu ku su partner Aleman a gana e di dos set 6-2 pa despues gana e di tres set 10-7

Pa Jean Jullien esaki ta su promé título di Grand Slam ku e ta logra, miéntras ku pa Groenefeld esaki ta su di dos.

Posted on

Nominadonan pa deportista di luna Mei 2014

WILLEMSTAD – Komishon Deportista di Luna riba djaluna 02 di yüni 2014, a reuní den sala di reunion di FFK, kaminda a evaluá i diskutí riba e kandidatonan ku a keda presentá pa miembronan dje komishon i federashonnan pa e premiashon di “Deportista di Luna” korespondiente na luna di Mei 2014. Manera semper ta keda spliká, na momentu ku a inisiá ku e proyekto aki, e premio aki mester sirbi komo un estímulo, a base di prestashon i komportashon, pa nos deportistanan lokal, ku ta biba na Kòrsou i ku ta kompetí den kompetensianan lokal komo tambe internashonal den representashon di pais Kòrsou.

E komishon a yega na e siguiente nominadonan:

1. Virgil Henriquez (Outo spòrt), Virgil Henriquez ta un koredó di outo sumamente dediká ku durante di e ‘Curaçao International Drag Fest 2014’ a sa di destaká. Tabata dia promé di mei ku Virgil ta konkista e titulo di Kampion Super Gas ku su outo Mr. Holley 2, seguidamente dia 2 di mei e ta konkista e titulo di Sub Kampion ‘Sportman Class’ ku su outo Mr. Johns i dia 3 di mei e ta bira Kampion Krioyo Bracket ku su outo Mr. Holley 2 i ta bai ku e premio máksimo di 10 mil florin. Pa korona e obra, djasabra 31 di mei, durante di e  ‘Ronde klip Shut Out’, Virgil ta sa di konkista e titulo máksimo. Pa e motibu ariba menshoná Virgil Henriquez a keda skohe komo nominado pa deportista di luna mei 2014.

2. Watakeli Maskulino (Vòlibòl), e ekipo Maskulino di vòlibòl Watakeli sigur a demostrá e temporada aki kiko ta nifiká nunka entrega. Tabata durante di e final di e kampeonato Klase Superior di Vòlibòl, ku despues di a kai atras 0-2 den e serie kontra e fuerte ekipo Stakamahachi, ta bini bèk i gana e seri final 3-2! Klaramente e ekipo di Watakeli a demostrá kiko ta nifiká perseveransha i traha huntu komo un ekipo pa logra bo meta. Pa e motibunan ya menshoná, e ekipo Maskulino di vòlibòl Watakeli, a keda skohe komo nominado pa deportista di luna mei 2014.

3. Chade Nersicio (Natashon), Chade ta un hóben di 13 aña ku ta studia na Radulphus College  i ta miembro di e ekipo Curaçao Sharks Aquatics. Tabata durante di e Aruba Stingray Challenge, ku a tuma lugá den luna di mei na Aruba, ku Chade Nersicio, aparte di a logra kibra 6 rèkòrt di e Aruba Stingray Challenge, a kibra tambe 1 rèkòrt nashonal riba 50 meter lomba. Chade a bin kas ku un total di 7 medaya di oro i Chade a logra tambe di bin kas ku e trofeo di High Point Trophy.  Pa e motibunan ya menshoná, Chade Nersicio a keda skohe komo nominado pa deportista di luna mei 2014.

Komishon ta gradisí e siguiente spònsernan ku ta yuda pa e premiashon aki por bira posibel: CHANGES PRO SPORT – RIO LOUNGE & SPORTS BAR- MCB – PETRO INDUSTRIAL NV – CSOF – SALAS SPORT SHOP – LILO SULVARAN – ALLSTAR EMBROIDERY – DIORCA NV – PELOTA – DE JONGH’S SPORTHUIS – FOTO STUDIO KORT – STRAK STRAK BARBERSHOP – FFK – SELIKOR – FUNDASHON NOBO  – COCA COLA.

E anunsio i premiashon di e ganadó lo tuma lugá:

Fecha: Djasabra 07 Yüni 2014.

Ora: 18.00 – 19.00’or.

Sitio: Rio Lounge & Sports Bar, Chuchubiweg 10?Damacor.

Den un ambiente liber di humamentu i liber di alkohòl!

Posted on

KOMUNIKADO: Konsulta Nashonal di Deporte

WILLEMSTAD– Tur kos ta kla pa nos haña awe djaweps 22 di mei den Stadion Odulio Willems na Suffisant e grandioso “Konsulta Nashonal di Deporte”. E aktividat aki ta organisá pa Fundashon Sedreko ku ta ekstendé un invitashon na tur esnan ku ta stima deporte pa ta presente. Ta start 6or i lo finalisá 8or di anochi. Bin skucha, lo tin oportunidat tambe pa hasi pregunta.

E “MC” pa e “Konsulta Nashonal di Deporte” ta e konosido Sr. Rignald Maduro. E siguiente personanan lo hiba palabra den e “Konsulta Nashonal di Deporte” i lo elaborá riba e siguiente tópikonan:

1) Sr. Oswin-José Cijntje, direktor interino di Fundashon Sedreko, su tópiko ta: Kon a baha e supsidio di Fundashon Sedreko poulatinamente !.

2) Sr. “Lilo” Sulvaran, miembro di direktiva di Fundashon Sedreko, su tópiko: I.N.D. tei i kiko e la kosta.

3) Un representante di A.B.V.O, tópiko: Si tin di pasa “over”, kon ??? (Plan Sosial)

4) Sr. Kenneth Gijsbertha, dirigente deportivo, i klave den e yudansa ku Refineria Isla ta dunando deporte, su tópiko: Refineria Isla su ayudo pa deporte, i tambe nan relashon ku Fundashon Sedreko.

5) Sr. Junior Millerson, eks presidente di NAOC, tópiko: “Nos Status Olímpiko”….

6) Sr. “Chati” Constancia, presidente di Federashon di Sòftbòl, i tambe manehadó di Sabana Ballpark, su tópiko: Su eksperensia komo presidente di un federashon, i tambe manehadó di un parke deportivo.

7) Sr. Arthur Curiel, den representashon di “Grandinan” ku ta hasi deporte. Su tópiko: Relashon di Fundashon Sedreko ku aktividat di deporte pa nos “Grandinan”.

8) Sr. “Lando” Chirino, dirigente deportivo, su tópiko: Kon e atleta ta kuminsá den deporte den bario i e nesesidatnan ku nos ta konfrontando pa falta di plaka.

9) Sra. Haydee Gijsbertha, dirigente deportivo, tópiko: Su eksperensia den deporte di landamentu.

10) Sr. Gilbert Snijders, dirigente deportivo, tópiko: Relashon di Fundashon Sedreko i deporte ku hendenan ku desabilidat.

11) Sr. Taffy de Jongh, dirigente deportivo, tópiko: E esfuerso di nos boluntarionan.

Tur hende di deporte ta kordialmente invitá. Ta kuminsá tempran, i kaba tempran di manera ku tur hende lo por regresá kas sin problema. Drenta den stadion bin aden ku outo kaminda lo tin sufisiente lugá pa stashoná outo sin problema.

Posted on

KOMUNIKADO: Na yüni awor lo kuminsá drecha fasilidatnan deportivo na Kòrsou

WILLEMSTAD – Riba enkargo di nos Promé Minister, Sr. Ivar Asjes, na yüni awor Reda Sosial lo kuminsá drecha diferente fèlt i/òf fasilidat deportivo den barionan di Kòrsou. Den kuadro di su meta pa stimulá desaroyo sosial-ekonómiko, Reda Sosial, a inventarisá tur e trabounan ku mester keda realisá pa hasi e fasilidatnan, ku poko poko a bin ta deteriorá, atrobe funshonal pa hasi deporte.

Segun Promé Minister Asjes, e fasilidatnan deportivo ku Reda Sosial lo bai renobá ta e fèlt di bala na Kaya Paul de Lima, Brievengat, kaminda lo laga limpia i egalisá dos diferente tereno di 8.100 m² i 2.500 m² ku ta destiná pa praktiká futbòl i mini-futbòl. Lo pone un waya haltu pa protehá e kasnan den serkania, drecha e sistema di iluminashon ku ta den mal estado i sera e terenonan di tal forma ku no por subi kore outo ni basha shushi mas riba nan.

Na Ser’i Fortuna lo laga drecha prinsipalmente e tereno di basketbòl ku ta den hopi mal estado i na Koraal Specht lo renobá e tereno di futbòl ku ta situá entre Kaya Poron i Kaya Pilon i instalá un sistema di iluminashon. Bario di Steenmijn, ku nunka promé tabata tin un fasilidat pa hasi deporte awor lo haña un fèlt pa uso multi-funshonal kaminda hóbennan di bario por praktiká speshalmente mini-futbòl i basketbòl. Den e area di Bok’e Samí tambe Gobièrnu lo laga traha un fasilidat deportivo multi-funshonal nobo ku su kamerinnan, un tribuna i un fèlt pa basketbòl i mini-futbòl ku su sistema di iluminashon.

Otro area di Kòrsou ku tambe lo haña un fèlt deportivo multi-funshonal nobo ta Otrobanda, kaminda tur habitantenan di Otrobanda i bisendario por praktiká e deportenan popular manera vòlibòl, basketbòl i mini-futbòl. Na Ser’i Kandela lo drecha e fèlt di bala i na Tera Korá lo renobá e fasilidat di beisbòl kompletamente p’asina hóbennan di e areanan aki tambe por praktiká i partisipá den kompetensha ofisial. Ademas, manera Promé Minister Asjes a primintí, lo reanudá e trabounan pa finalisá e promé fase di e kompleho deportivo multi-funshonal na Barber den luna di yüni awor pa despues sigui ku di dos fase di e proyekto importante aki pa habitantenan di Banda Bou.

Segun Promé Minister Asjes, e invershon èkstra pa drecha nos fasilidatnan deportivo den bario ta sumamente nesesario i primordial pa stimulá un desaroyo deportivo sano i positivo pa no solamente nos hubentut, pero pa henter Pueblo di Kòrsou. “Di e forma aki nos Gobièrnu ke duna tambe kontenido real na e vishon di edifikashon, formashon i konstrukshon di nos Nashon. Ora e fasilidatnan deportivo aki keda renobá, nos hóbennan por dediká nan tempu liber di un forma positivo i sano pero alabes desaroyá nan habilidat- i talentonan individual. Hasi Deporte ta Forma Patria”, asina Promé Minister Asjes a indiká.

Posted on

KOMUNIKADO: Studiante/atletanan di Kòrsou ku vários premio den eksterior

FLORIDA – Ayera Trinity Christian Academy tabata tin su Annual Sport Banquet kaminda nan ta honra e mihó atletanan den tur ramo di deporte.

Atrobe mesun kos ku aña pasa, nos studiante/atletanan a lusi den premionan individual.

Guiseppe “Peppe” Best a keda skohe komo e soccer MVP.

Den landamentu WARRIOR AWARD a bai pa Aisha Hironimus.

Den baseball Aldrich Chapparo de Jongh a keda skohe komo MVP den e ekipo di JV. Banda di esaki Aldrich a wòrdu skohe komo MVP di un torneo Grandi di biahe ku e la hunga na Jupiter.

Pa loke ta tennis, Sharienne Ricardo, a keda skohe komo MVP. Akinan e coach tabata tin tremendo palabranan pa e hóben tenista gabando su esfuerso, dedikashon i determinashon praktikando e deporte.

Pa softball Taisa Kirindongo a keda selektá komo MVP, Gysha Sulvaran komo ROOKIE of the Year i Philny Llewellyn a risibí e WARRIOR AWARD. E ultimo ta keda duna na e hungadó ku aparte di tabata tin bon sifras a karga e team tambe ku su aktitut, aportashon i apoyo pa su ekipo i kompañeronan di ekipo no solamente riba tereno sino tambe pafó di tereno.

Philny por mira atras riba un super bon temporada kaminda ku e la bati pa un promedio di .618, ku 9 doblete, 7 tripel, 6 honron i 61 kareda empuha. Riba montikulo e tabata tin un record di 15-3, un efektividat di .082 ku 114 ponche i batidonan a bati pa un promedio di .141 kontra dje.

Komo chèri riba e bolo tabata e prestashon deportivo di Steffert Spencer kende a haña MVP den landamentu i tambe atletismo. Ku e eskoho aki Steffert ta igualá e rekert di Phildrick Llewellyn, komo un studiante/atleta ku ta risibí e eskogensha aki den mas ku un deporte. Tempu di Phildrick no tabata tin SSC i esei ta hasi di Steffert e promé studiante/atleta dje programa “Studia den Region” ku ta keda saka MVP den mas ku un deporte.

Posted on

KOMUNIKADO: Millard “The J-Machine” Petrona ku deseo pa partisipa na Mundial di BMX

WILLEMSTAD – Hopi ta nos deportistanan ku ta destaká den diferente ramo di deporte i esaki sigur ta un prueba di e talento ku nos komo yu di Kòrsou tin i ta bendishoná kuné. Esaki ta e kaso tambe di e hóben Millard “The J-Machine” Petrona di 14 aña di edat i ku ta studiando na Radulphus College den klas V3F ku for di un edat hopi yòn, ta praktiká e deporte di siklismo i e último 4 añanan ta hasiendo estrago den e ramo di BMX.

Na Kòrsou Millard a partisipá na un kantidat enorme di kompetensia i logrando éksito tras di éksito den esakinan. For di aña 2010 ku a kuminsá ku BMX na Kòrsou, tur aña ela logra sali kampion di su kategoria di edat. Na 2011 Millard pa promé bia ta biaha pa Tampa (Merka) pa partisipá na su promé kompetensia internashonal i ta logra sorprendé tur presente komo un nobato.

Millard a kompetí na Tampa, na unda el a logra primeramente, e segundo puesto den final di e ‘Pre-races’, miéntras ku seguidamente den e kareda final di e kompetensia den su kategoria (te ku 11 aña di edat), el a sa na logra e promé posishon den final. Ku e resultado aki tambe Millard ta logra e distinshon di deportista di luna febrüari 2011. Esaki tabata e komienso di un karera impreshonante den e mundu di BMX. Aktualmente Millard “The J-Machine” Petrona ta e kampion indiskuti di Kòrsou den su kategoria i resientemente a keda selektá komo deportista di luna mart 2014. Esaki pa motibu di su resultadonan eksepshonal Na “Gator Nationals” na Tampa, kaminda Millard a logra no ménos ku 5 trofeo i un kareda lokal, kaminda e la destaká, saliendo promé den su kategoria di edat i promé den e kategoria open class 15+.

Mester bisa ku den luna di aprel 2014 Millard “The J-Machine” Petrona tabatin otro oportunidat di bai kore na Merka. E biaha aki na e “Dixie Nationals” ku a tuma lugá na Atlanta den e wikènt di 25 pa 27 di aprel. E kareda aki tambe tabata super eksitoso pa M.J., manera nan ta yam’é, komo ku e la logra un total di 6 trofeo.

Dia 10 di mei último tabatin e di dos kareda lokal pa e aña aki, titulá “AA Drink BMX Spring Race 2014” ku a konta ku partisipashon di koredónan di Aruba ku ta den ful preparashon pa bai Mundial. Millard “The J-Machine” a pone drama, saliendo na promé lugá den su kategoria di edat i spanta tur hende ora ku den open class 15+ di forma fenomenal e la logra gana di koredónan muchu mas grandi ku n’é.

Pero manera tur atleta ku ta praktiká nan deporte na nivel kompetitivo ke logra lo máksimo, Millard su soño ta pa partisipá na e kampionato mundial di BMX ku ta tuma lugá na Rotterdam, Hulanda, den luna di yüli awor.

Komo pais Kòrsou no ta wòrdu rekonosé internashonalmente, awor akí ta hasiendo e esfuersonan pa wak si Millard por bai kore bou di bandera Rubiano.

Millard “The J-Machine” Petrona ta hasiendo su bèst, kombinando skol i deporte i ke enkurashá tur hóben pa hasi meskos.

Pa por yuda Millard “The J-Machine” Petrona sigui desaroyá den su deporte faborito, partisipando na karedanan internashonal, por tuma kontakto ku su mayornan na telefòn 521-8302 òf via email na majous@hotmail.com.

Facebook Twitter Instagram Youtube
© 2024 Deporte Awe. Tur derechi reservá. Diseñá pa E² Media