WILLEMSTAD – Promé Minister, Sr. Ivar Asjes, a firma e akuerdo di finansiamentu ku USONA pa kuminsá e proseso pa lanta e Instituto Nashonal di Deporte (IND).
Manera ta konosí, Gobièrnu di Kòrsou a disidí (for di aña 2012) pa integrá Sedreko i FFDK den IND.
E proyekto aki ta enserá un invershon supstansial èkstra den deporte i spesialmente e infrastruktura organisatorio relashoná ku deporte na Kòrsou. Tambe lo pone hopi énfasis riba formashon di lider- i dirigentenan deportivo.
WILLEMSTAD – Fundashon Sedreko ta informá tur deportista, dirigente, muchanan di skol i tur ku sa usa Sala Niels Liberia den stadion Odulio Willems ku e sala ta bek den funshon.
Manera ta konosí un lus den e sala deportivo a kai loke a pone ku práktika di deporte den e sala a bira peligroso. Fundashon Sedreko mesora a hasi trámitenan pa por drecha e instalashon di lus i mesora tambe pèrkurá pa tur e lusnan ta sigurá ku un kadena di manera ku ta masha difísil pa nan bin abou den kaso mes ku algu sosodé.
Fundashon Sedreko ta gradisí pa e pasenshi i komprenshon demostrá i ta garantisá mundu di deporte ku Fundashon Sedreko lo keda hasi esfuerso tur dia di nobo pa sirbi deporte di Kòrsou.
WILLEMSTAD – Djárason 19 di febrüari, Promé Minister Sr. Ivar Asjes a hasi un bishitá na e sala di Weight Lifting, yamá Marcel Betrian kual mester wòrdu renová.
Promé Minister Asjes a indiká na representante di e federashon di Weight Lifting ku Gobièrnu ta disponibel i dispuesto pa duna e asistensia nesesario dor di invertí fondonan públiko den e proyekto aki pa restourá e sala aki pa asina nos hóbennan por sigui práktika e deporte di Weight Lifting.
WILLEMSTAD – Djárason último nos Promé Minister Sr. Ivar Asjes a hasi un bishita na e kompleho deportivo Niels Liberia na Suffisant despues ku algun dia promé dos lampi a bini abou den e kompleho deportivo aki.
Promé Minister Asjes a keda informá dor di direktor di Reda Sosial Sr. Herman George tokante e trabounan ku mester keda hasí a korto plaso. Kual ta revishon total di e sistema di e lampinan ku ta na laira, drecha i kambia e flur ku ta den hopi mal estado. Mester renová wayanan rondó di e kancha i e bòrchinan di skor. Mester drecha e bañonan i traha un lugá adekuá pa warda material.
Promé Minister Asjes a indiká ku Gobièrnu ta disponibel i dispuesto pa duna e asistensia nesesario dor di invertí fondonan públiko den e proyekto aki pa restourá e sala aki pa asina nos hóbennan por sigui práktika deporte.
WILLEMSTAD – E bodybuilder profeshonal, Rulove ‘Roelly’ Winklaar a kanselá su partisipashon na e evento di Arnold Classic 2014. Esaki debí na leshon nan ku e atleta a sufri despues di un aksidente di motersaikel.
Den un anunsio ofisial, Etienne Winklaar ku ta ruman i ala bes manager di e atleta a bisa: “Roelly tabata den un aksidente di motersaikel i konsekuentemente ‘Roelly’ lo no partisipá na e evento di Arnold Classic na Ohio, Brazil i Australia. ‘Roelly’ tin leshon nan na su brasa, pia i lomba i lo tuma su tempu pa rekuperá i bin mas fuerte ku nunka.”
E aksidente ku Winklaar tabata envolví den dje a tuma lugá djadumingu 16 di febrüari riba Cabo Verdeweg. For di un investigashon preliminar, shofùr di un vehíkulo a splika ku e tabata koriendo direkshon pabou riba Cabo Verdeweg i un dado momento e tabata bai lora pa drenta Esmeraldaweg. Pero hustamente na e momento ei el a tuma nota ku e motorsiklista tabata aserkando su tras ku gran velosidat, motibu pa kual el a hala na su banda drechi, p’asina laga espasio pa e motosiklista por a pas’é na su banda robes.
E shofùr a mira e motosiklista pas’é na su banda robes, pero despues e motosiklista lo mester a kore den skual pa finalmente resultá riba kaminda.
WILLEMSTAD – E promé torneo di e ‘Junior Development Tennis Series’ a keda organisá na Regales Tennis School, kaminda hóbennan di entre 6 pa 9 aña a subi kancha di tènis demostrando nan abilidatnan den e kategoria di bala Oraño i bala Kòrá.
E organisado kual ta Williams Tennis Service ta hopi satisfecho ku resultado i e nivel desplegá di parti e 28 hóbennan ku a partisipá na e promé torneo ‘Junior Development Tennis Series’.
Tur e hóbennan ku a partisipá den e kategoria bala kòrá a hunga 4 enkuentro, pa despues esnan ku a klasifiká hunga e kuart final i seguidamente e semi final. Den e final tabata e hóbennan Ian Pieterss i Jose Carlos Andrade ku a enfrentá otro, ku e hóben Ian Pietersz resultando viktorioso.
Den e kategoria bala Oraño tambe e hóbennan a hunga un kantidat di wega i despues di e kuart final i e semifinal, den e final tabata Joshua van Grinsven i Aldair Correia Marques ku a topa otro. Dos hóben ku pa promé bia ta partisipá den un torneo amistoso i tabata e hóben Aldair Correia Marques ku ta sali viktorioso.
E organisado ke hasi uzo di e oportunidat aki pa gradisí tur e entrenadónan Xiomara Regales, Ingrid Gonesh, Juni Engelhardt, Karl Vukobrat ku a enkurashá nan hóben tenistanan pa partisipá. Esaki ta un proyekto ku ta hiba e meta prinsipal pa eduká i desaroyá e futuro generashon di tenistanan di Kòrsou.
ROTTERDAM – Jean-Julien Rojer i su kompañero Horia Tecau a pèrdè den e final di ABN Amro World Tennis Tournament. Rojer i su kompañero a pèrdè den Ahoy na Rotterdam di Michael Llorda i Nicolas Mahut ku skor di 6-2 i 7-6.
E promé set a bai hopi difikultoso pa Rojer i Tecau. Den e di dos set Rojer i kompañero a purba bin bek pero no a logra. Kontinuamente e tenista nan Franses, Llorda i Mahut tabata saka nan kurpa for di problema.
Pa Rojer i Tecau esaki tabata e di dos final sigui ku nan hunga. Siman pasa nan a gana e torneo di ATP na Zagreb, Kroasia.
WILLEMSTAD – E atleta Randhy Cuevas (Atletismo), djasabra 8 febrüari, a keda premiá komo “Deportista di Luna” di luna Yanüari 2014 di parti di un komishon konsistiendo di periodista- i reportero nan deportivo di medio nan di komunikashon sosial.
Randhy ta un deportista ku ta praktiká e deporte di atletismo i dia 10 di yanüari último, na e evento di THE CLIMB TO THE ROSES 2014, organisá pa Stichting Ride for the Roses Curaçao, Randhy Cuevas en konekshon ku 10 aña Ride for the Roses Events, a subi seru di Christoffel un total di 10 biaha i a logra rekoudá un total di 32 mil florin pa sostené Prinses Wilhelmina Fonds pa yega na fondo nan pa yuda kombatí kanser. E evento a kuminsá mitar di 7 di mainta i a finalisá den ora nan di atardi algu promé ku 4’or i Randhy a logra subi Christoffel un total impreshonante di 10 bia. Pa e motibu ariba menshoná Randhy Cuevas a keda skohe komo nominado pa deportista di luna yanüari 2014.
Ademas di e atleta Randhy Cuevas, tambe a premia e dos otro nominado nan, Alistair Monte (Siklismo) i e ekipo FC SITHOC DELTACUR BV (Futbòl di sala). Tur tres nominado a risibí un sertifikado den leshi, opsekio di Fundacion Social Petroindustrial i Diorca NV. E tres nominado nan a risibí un bunita medaya di Salas Sport Shop.
Otro premio nan pa e ganadó: Un kaha di Poweraid opsekio di Coca Cola, giftcheque di Fl. 150,– di Changes pro Sport, giftcheque di Fl. 100,– di CSOF, 100 florin opsekio di Sr. Lilo Sulvaran, 100 florin na karchi di telefòn opsekio di UTS, giftcard di 300 florin di MCB, giftcard di 300 florin di Selikor i un giftcheque di Fl. 50,– di Pelota. Strak Strak Barbershop & Kapsalon a regalá Randhy Cuevas un drechá di kabei pa henter un luna, tambe foto studio Kort a regalá Randhy Cuevas e posibilidat pa saka un potrèt kompletamente grátis i fundashon Nobo a regalá e deportista di luna un bunita trofeo.
Pa e dos otro nominado nan: Un giftcard di 300 florin di Selikor, Karchi di telefon di 50 florin di UTS, giftcard di Fl. 100,- opsekio di Sr. Lilo Sulvaran, giftcard di Fl. 100,– opsekio di Diorca NV i Fundacion Social Petroindustrial, giftcheque di Fl. 50,– di De Jongh’s Sporthuis, un giftcheque di Fl. 50,– di OlympiaT i un kaha di Poweraid opsekio di Coca Cola.
Allstar Embroidery a enkargá su mes un biaha mas pa miembro nan dje komishon ta uniformá den 2014, miéntras ku Rio Lounge & Sports Bar a pone su lokalidat na disposishon pa e premiashon por a tuma lugá tur luna durante di hinter 2014 serka nan. Di parti komishon deportista di luna un pabien na tur deportista di luna i e nominado nan.
Komishon ta gradisí e siguiente spònser nan ku ta yuda pa e premiashon deportista di luna 2014 aki a bira posibel:
CHANGES PRO SPORT – SALAS SPORT SHOP – RIO LOUNGE & SPORTS BAR- OLYMPIAT – MCB – PETRO INDUSTRIAL NV – CSOF – LILO SULVARAN – ALLSTAR EMBROIDERY – UTS – DIORCA NV – PELOTA – DE JONGH’S SPORTHUIS – FOTO STUDIO KORT – STRAK STRAK BARBERSHOP- FFK-SELIKOR-FUNDASHON NOBO I COCA COLA
WILLEMSTAD – Fundashon Autosport Curaçao (FAC) i su Komishon Organisadó ta tuma e batuta over den 2014 pa tantu Kareda nan di Drag Internashonal i lokal komo Street Legal ta den full akshon.
Durante fin di siman ta tin un eksitoso seshon di tèst na Pista di Ronde Klip ku e vehíkulo mas rápido aki na Kòrsou entre nan “King Kong 4” manehá pa Pat Musi i algun vehíkulo mas manera Mr.Holly 4 manehá pa Johannes de Boer i tambe Mr. Johns manehá pa Virgil Henriquez , riba invitashon a tèst e parti nobo di betòn te ku 330 pia ku tabata un éksito . Segun tur hende tabata gosa riba e tono nan di tumba, tempu nan entre 6 i 7 sec tabata kai na Curacao International Raceway.
Komishon Organisadó di FAC ta manda aki un rekordatorio pa e reunion general ku doño nan di tantu motersaikel i outo nan di Kareda i Street Legal, ku ta tuma lugá awe, djamars 11 di febrüari pa 20.00 (8’or) na Curaçao International Raceway.
Despues di esaki pa tur koredó por kustumbrá ku e kambio nan hasi riba e pista lo bai tin un seshon di tèst 8 di mart kuminsando for di 19.00 (7’or) na Curaçao International Raceway na Ronde Klip.
ZAGREB, KROASIA – E tenista, Jean-Jullien Rojer huntu ku su kompañero Horia Tecau a gana nan promé título di ATP World Tour pa e ana aki. E título aki ta bin den e di kuater torneo ku Rojer i Tecau ta hunga komo un ekipo.
Rojer i Tecau a bin bek di atras den e torneo di PBZ Zagreb Indoors pa gana di Philipp Marx i Michal Mertinak. Rojer i su kompañero a pèrdè e promé set ku skor di 3-6, pero a bin bek i gana e di dos i di tres set ku skor di 6-4 i 10-2.
Ku e título aki e duo di Rojer-Tecau ta gana un montante di 23.500 Euro i tambe 250 punto pa e Emirates ATP Doubles Ranking.