Otro Archives | Page 3 of 38

June 13, 2017June 13, 2017

Korsou ku tres medaya den Surinam Taekwondo Open 2017

SURINAME — E skol di Taekwondo, Olympia Taekwondo Association resientemente (10-06-2017) a partisipá na un kompetensia internashonal ku a tuma lugá na Sürnam. Na e kompetensia titulá Sürnam open, a partisipá diferente pais manera Aruba, France Guyana, Brazil, Trinidat, Curaçao naturalmente Sürnam.

Den e biahe deportivo aki e skol di Taekwondo, Olympia Taekwando Association, a partisipá ku un selekshon di 3 atleta i tabata tin peleanan hopi fuerte. E selekshon di Curaçao a sa di bin Curaçao bèk ku 3 bròns. E atletanan ta : 1. Bròns -Nasser Lahham, 2. Bròns -Harif Roojeri 3. Bròns -Thaveon Donker. I tambe Olympia Taekwondo Association a haña un plakat di a partisipá na Sürnam open pa 10 aña konsekutivo.

Olympia Taekwondo Association kier a gradisí tur e mayornan ku a hasié biahe di Sürnam posibel pa e atleta nan.

E direktiva di OTA lo sigui traha hopi duru riba fondo nan di manera ku nos atletanan por sigui desaroyá den bida i e deporte di taekwondo. Punto nan ku nos ta traha riba dje ta desaroyo personal, disiplina, konfiansa propio, ekilibrio/balansa i spiritu indominabel di manera ku e atleta lo por profilá bon tantu na skol, deporte i den bida en general.

OTA ta hopi kontentu ku Sa-bum-nim (entrenadó) GilsonLourens ku a sa di hasi un bon trabou ku nos atletanan por a bini kas bèk ku un bon resultado.

Keda pendiente pa mas di Olympia Taekwondo assocation ku lo sigui traha pa futuro di su atletanan.

June 9, 2017

Landamentu pa públiko na Pisina Bennie Leito

WILLEMSTAD — Direktiva di Swim Club Orca Curaçao ta partisipá ku for di djabièrnè awor dia 09 di yüni 2017, i tur djabièrnè ku ta sigui, tin landamentu pa públiko na Pisina Bennie Leito di 7’or pa 9’or di anochi.

Entrada pa landamentu pa públiko ta kosta fl. 2,00 pa mucha te ku 14 aña i 3,00 pa persona for di 15 aña.

Pa mas informashon por yama tel: 529 6586.

May 30, 2017

“Trainingskamp” na Medellin Colombia a bai bon pa Orca den waterpolo

WILLEMSTAD — Di 24 te ku 28 di mei último Orca a organisá un “trainingskamp” na Medellin, Colombia pa su atletanan di waterpolo U-12, U-14 i U-16.

Despues ku e divishon señor di Orca waterpolo a hunga dos wega kontra di e ekipo di De Robbin di Hulanda e fin di siman promé, e atletanan di Orca waterpolo a bai un “trainingskamp” na Medellin, Colombia. Tur esaki ta den kuadro pa pone waterpolo bèk riba e kaminda ku e mester ta; esta na un nivel aseptabel, ku nos por kompetí den region. Na opinion di e dirigentenan di Orca, gana medaya no ta e meta prinsipal pa waterpolo na e momentu aki, sino pa desaroyá e deporte

Timnan:

Orca (U-12, U-14 i U-16) a hunga kontra e siguiente klupnan: un klup di Copacabana (U-12, U-15 i U-16), un klup di Medellin (U-15), e klup di Belen (U-12, U-13, i U-15) i un klup di Antioquia (U-12).

Treinen:

Djaweps mainta 25 di mei 2017, e gruponan a trein na Copacabana di 12’or pa 1’or i 30 di atardi.

Partidonan:

Djaweps 25 di mei 2017 na Copacabana:

Simultañamente weganan tabata keda hunga, na kada banda di e pisina di Copacabana. Un banda U-16 (pèrdè

13-7 di Copacabana, gana 5-4 di Antioquia) i na e otro banda U-12 (pèrdè 9-3 di Copacabana, gana 3-0 di Copacabana i pèrdè 7-5 di Copacabana) i U-14 (pèrdè 9-7 di Copa i pèrdè 10-8 di Antioquia) tabata hunga

2 periodo òf kada periodo i kambia. Nos a opta pa hunga asina, ya por a koregí i papia ku a atletanan despues di kada dos periodo òf un periodo. Aki e ekiponan tabata bastante pareu.

Djabièrnè 26 di mei 2017 na Club Belen:

U-12 kontra Belen (pèrdè 10-0). U-14 kontra di Belen (pèrdè 8-2). U-16 kontra di Belen (pèrdè 12-3).

E ekipo di Belen tabata superior riba Orca.

Djasabra 27 di mei 2017 na Copacabana:

Weganan tabata wòrdu hunga simultañamente atrobe, U-16 kontra di Medellin (pèrdè 13-7), despues nan a meskla e timnan pa hunga kontra di otro. U-14 a hunga 2 wega i pèrdè kontra di Copacabana, pero e weganan tabata hopi pareu. U-12 a hunga 4 periodo kontra di Copacabana, (pèrdè 4-2, pèrdè 4-0, empatá 3-3 i gana 4-1). E ekipo di Medellin tabata superior riba Orca U-16. U-12 a bin ta hunga mas mihó. U-14 tiki tiki a bin ta komprondé kiko e entrenadó tabata ke i kon pa nan hunga. E entrenadó tabata buska un struktura di wega kon nan mester hiba e bala dilanti. Mas i mas den tur nan weganan por a mira esaki sosodé.

Coachnan por mira bèk riba un “trainingskamp” den kua tur atleta a mira kiko waterpolo ta enserá (e kos ta); atletanan a siña bastante i a hunga hopi partido di waterpolo.

Direktiva di Swim Club Orca Curaçao ta yama danki na tur ku a aportá pa e interkambio aki por a tuma lugá. Espesialmente e spònsernan ku a spònser e muchanan individualmente. Un danki spesial tambe ta bai pa e spònsernan Refineria Isla Kòrsou (Ku Kurason Pa Komunidat), Simple ICT Management i Simple Green (Keep Your World Clean) ku a sòru pa e atletanan tabata bon representá/uniformá

Pa mas informashon, tokante di Swim Club Orca Curaçao, por yama na telefon 529-6586.

May 24, 2017May 24, 2017

KÒRSOU KAMPION INDISKUTIBEL TORNEO DI DAM “ABC”

BONEIRU — Durante e fin di siman ku ta tras di lomba ey (19-21 Mei, 2017), e ekipo fuerte di dam di Kòrsou representá pa MF. Clifton Agata, MF. Carló Lorevíl, Sylvio Blijden, Antonio Marquita, Eugene Ignacia, ta titulá kampion indiskutibel di e torneo di dam ABC (Aruba, Bonaire i Curaçao).

Kòrsou 14 Punto Boneiru 7 Punto Aruba 3 Punto.

Den e sekshon di hóben (nan) bao di 16 aña Kòrsou ta terminá na di tres lugá.

Virginio Cecilia (Bon) 3
Angel Reinoso (Aru) 2
Gabriel Maduro ((Cur) 1

Hungado nan ku mas a destaka individualmente tabata:

Anthonio Marquita (Cur) 8 punto
Richinelle Anthony (Bon) 7 punto
MF Clifton Agata (Cur) 6 Punto

Referee (nan) di e torneo tabata e Referí Internashonal Sr. Hensley Rondei di Kòrsou i Sr. Boy Goeloe di Boneiru.

Federashon di Dam Kòrsou kièr a gradisí Federashon di Dam Boneiru pa un torneo Bon organisá! Otro aña Kòrsou lo ta sede di e torneo di ABC den e di 2 siman di Mei 2018.

Federashon di Dam Kòrsou ta kumpli su di 50 aniversario dia 29 Juni 2017.

En konekshon ku esaki FDK ta organisando diferente aktividat kompletamente GRÁTIS pa henter e komunidat di Kòrsou, por partisipá i sera konosí ku e deporte di dam i TUR su BENEFISIO (nan) pa tantu e hóben i e adulto di mas aserka.

Algun aktividat ku tabata tin kaba i lo bai tin ta lo siguiente:

1e Siman di Dam na BNK,
Ban Topa Dam den Bo Bario,
“Drop In and Play” (den Sentro di Cuidat),
Kurso(nan) di dam Grátis un bes pa siman (FDOK),
Kurso Grátis pa nos Grandinan di Kasnan di Ansiano (esaki ta kuminsá Mei 26 – Habaai),
Kampionato di dam pa skol(nan)/(Schooldammen Sep- Nov),
1e Kampionato Internashonal COC, 25juni – Jul 2, 2017 ku hungadónan Internashonal etc.., i mas.

Otro Aña, Kòrsou pa via di FDK lo ta sede di e di 20th Kampionato PanAmerikano i e di 3e Youth PanAmerikano Festival di dam; tur dos ku mas ku 20 Pais di America di Juni 24 – Jul 4, 2018.

Esaki sigur lo ta un bon exposure pa Kòrsou Kompleto i ta spera ku FDK por konta ku e sosten di Kòrsou pa por hasi tur e 3 Kampionatonan International aki un éksito total otro ana.

Pa mas informashon por bishitá nos Website: www.fedakor.com , email(nan): secretary@fedakor.com, y sekfdk@gmail.com, of whatsapp nos na 599 9 (527) 8604.

May 22, 2017

Curaçao Challenge ta spera un públiko grandi den wikènt di Asunshon

WILLEMSTAD — Den Wikènt di Asunshon di 25 te ku 28 di mei ya kaba e di nuebe Curaçao Challenge ta tuma lugá. E kompetensha di windsurfing mas grandi di aña akí ta tuma lugá riba Spaanse Water na Windsurfing Curaçao i lo mustra, sigun organisadó prinsipal Hilde Schnitzler, kompetenshanan eksitante di Slalom i Freestyle. Schnitzler: “ Ku partisipantenan fuerte for di Aruba i Boneiru i un grupo di talento di sùrf hopi fanátiko di Kòrsou, nos ta spera ku lo tin hopi bientu i tambe un públiko grandi!”

Lès di windsurfing grátis pa e públiko interesá.

Durante Curaçao Challenge tin kompetensha 4 dia largu den 3 diferente kategoria. Asina tin kompetensha pa rookies, winsurfernan hóben ku no tin masha eksperiensha ainda i pa windsurfernan di slalom i freestyle ku hopi mas eksperiensha den kompetensha. Pa loke ta e kompetensha di slalom e windsurfernan ta kuminsá huntu i mester kompletá un ruta ku ta indiká ku bui den laman mas lihé posibel. Den freestyle kada bia 2 windsurfer ta desafiá otro pa hasi mas tantu kenshi difísil posibel den 4 minüt. E ganadó ta sigui pa e próksimo rònt.

E kompetenshanan di slalom i freestyle ta tuma lugá diariamente for di 10 or di mainta te 4’or di atardi i entrada ta grátis pa públiko. Esun ku ta deseá esaki por haña lès di windsurfing grátis for di 3’or di atardi serka e instruktornan di Windsurfing Curaçao, i asina por sera konosí ku e deporte di windsurfing. Mayoria partisipante den Curaçao Challenge ta bou di 18 aña. Nan no ta disfrutá solamente di e kompetensha, sino tambe di e ambiente dushi rondó di e evento. Asina djasabra anochi for di 6or tin un BBQ, tanten 7’or tin un pelíkula hopi leuk tambe tokante sùrfmentu pa solamente 20 florin pa persona.

Hopi partisipante femenino fanátiko e aña akí.

Schnitzler ta spera ku e aña aki mas o ménos 75 windsurfer ta partisipá na Curaçao Challenge. E nivel lo ta haltu, ku partisipashon di algun windsurfers lokal hóben manera Kareem Naipal, Wave Antonia I Ryan Richie, ku otro aña probablemente lo partisipá na e kompetensha di freestyle di PWA (Professional World Association). Maske tumando un promedio tin mas tantu mucha hòmber ta partisipá ku mucha muhé, e aña akí e damanan ta bon representá ya ku tin bastante mucha muhé ku ta práktika windsurfing ta bini for di Aruba.

Windsurfing ta un deporte popular riba islanana ABC ku kompetenshanan manera Curacao Challenge, Aruba High Winds i Sorobon Masters. Tòg e organisashon ta dependé di boluntario. Schnitzler: “ banda di mi tim di boluntario leal, e aña akí mi por konta ku Victor Wijnand, un race director ofisialmente rekonosé ku ta bini spesialmente pa e evento akí for di Boneiru. I maske no tabata fásil pa haña spònser, danki Dios mi por konta ku sosten di Securitas, Coca-Cola, Chogogo, CPS, VR Shipping N.V., de Mermaid, Obsession, ENNIA i Zapata Fly Board.

Hilde Schnitzler i su kasá Ingmar for di 2006 ta dediká nan mes ku alma i kurpa na windsurfing na Kòrsou. Asina nan ta hür, bende i drecha material di windsurfing, nan ta duna lès i ta organisá SUP (Stand up peddeling tours) .Curaçao Challenge ta un trabou di organisashon duru pero leuk, i ku esaki nan ta stimulá talentonan di windsurfing hóben pa surpasá nan mes i asina haña mas eksperiensha ku kompetensha i mes ora tambe pone windsurfing komo deporte akuátiko dinámiko riba mapa serka un públiko mas grandi.

Pa mas informashon bo por bishitá página di Facebook di Curaçao Challenge òf yama + 5999 -7380883

May 22, 2017

Siklo nobo di lèsnan di landamentu na Pisina Bennie Leito

WILLEMSTAD — Despues ku resientemente nos a kuminsá ku lèsnan di landamentu na Pisina Enith Brigitha, SDK, awor ta toka turno na Pisina Bennie Leito unda ku lèsnan lo ranka sali dia 1 di yüni próksimo.

Lèsnan ta dos biaha pa siman, i tin 3 posibilidat di dia pa por asistí, kuanan ta djaluna i djaweps, djamars i djabièrnè i tambe djasabra i djadumingu. Edat mínimo pa por partisipá ta 5 aña.

Lèsnan ta kosta únikamente fl. 60,- pa mucha i fl. 70,- pa adulto pa dos biaha pa siman pa luna, mas fl. 15,-pa èksamen. Pa mas informashon i/òf inskripshon, por tene kontakto ku Pisina Bennie Leito na 462-6719 òf 512-174 entre 7.30 pa 12.00 i 13.30 pa 17.00. Tambe por inskribí via di Facebook, www.facebook.com/DeporteKorsou, òf website www.fddk.cw.

April 25, 2017

Swim Club Orca Curaçao a finalisá na di dos lugá den Landamentu Sinkronisá

WILLEMSTAD — E fin di siman tras di lomba aki tabata unu hopi eksitoso pa e atletanan di Swim Club Orca Curaçao, Nan a partisipá na un kompetensia organisá pa Federashon Aqatiko Kòrsou (F.A.K.) ku a hiba di nòmber, “Beginners Stars 2017 Synchronized Swimming Championship”, ku a tuma lugá na e pisina na Rust & Burgh. Orca a partisipá ku 4 atleta, 3 mucha muhé i PA PROME BIA DEN E HISTORIA DI KORSOU 1 mucha hòmber. Ku aplouso i gritunan di alegria e públiko presente a risibí Eran van Dijk ora e la hasi su promé presentashon! Tambe a partisipá pa Orca Amara Rojas, Yamilex Thomasia i Indra van Dijk.

Tur mucha a hasi nan esfuerso máksimo i a duna presentashon na nivel. Hopi great pa mira kon e muchanan ku no tin hopi tempu ta práktika e deporte di landamentu Sinkronisá ta hasi máksimo esfuerso pa duna un bon prestashon!

E klup di Sword Fish a sa di gana “overall”, Orca a sali na di dos lugá i Typhoon a sali na di tres lugá.

Resultado pa loke ta trata e muchanan di Orca individual ta:

Eran van Dijk a gana 3 medaya di oro,
Indra van Dijk a gana 1 medaya di oro, 1 medaya di plata i 1 medaya di bròns
Amara Rojas a gana 1 medaya di plata i 1 medaya di bròns
Yamilex Thomasia a gana 1 medaya di bròns

Coach Daniela Diaz, coach Stacey Portillo i direktiva di Orca ta hopi satisfecho pa loke ta e prestashon di nan atletanan.

April 3, 2017

Watakeli Kampion di Kòrsou

WILLEMSTAD — Watakeli Building Depot ta gana di Xaverianen 3-0 i ta bira Kampion di klase Superior di Volibol Maskulino. E wega tabata di un nivel altu i ámbos ekipo a bringa kada punto pero tabata Watakeli enkabesá pa Gibi Paulina ku a sobre sali den atake ku a sa di bai ku e viktoria. Asina aki Watakeli ta konkista e título bek despues di un aña. Parsial (25-19,25-20,25-23) Den otro enkuentro di ayera, Titus ta empatá e seri kontra di Wata na 1 kada banda i a forsa un wega desisivo djadumingu otro siman. Titus a hunga un wega hopi efektivo i a logra di para e racha ganadó di Wata. Ku skore di 22-25,23-25, 25,14,25-16,15-12. Pues desishon den klase Maskulino A tei kai otro siman.. Den e partido di klase Femenino Superior , Shuatanari ta derota Stakamahakchi i di e forma aki nan ta forsa un wega desisivo otro siman. Shuatanari ku tabata lomba kantu di muraya a hunga un bon partido i a probe ya di e fayonan den defensa di Staka pa bai ke viktoria(25-22,25-18,25-27,13-25,15-6)Pues Volibol tin su kampion i sub kampion den klase A Femenino i klase Maskulino superior sperando riba Femenino superior i Maskulino A.

March 27, 2017

Resultado Torneo di Pinpon ‘Parts for You’

WILLEMSTAD — Djamars último Federashon Tènis di Mesa Kòrsou tabatin su torneo anual ku ta Parts for You ku e aña a keda dediká na sr. Oscar van der Biest. Tabata un torneo pa kabayero individual i ku ta valido pa ranking.

Tabatin 19 inskripshon i e skema di wega tabata basá riba dal saka afó.

E persona Oscar van der Biest, na kende e torneo aki a ser dediká ne, ta un ex-hungadó, pero ku komo arbitrahe a hasi su mes internashonalmente konosí. Oscar a èmpaya kasi rònt mundo si chèk unda tur e la bai komo èmpayer: diferente pais suramerikano, amerika sentral, US-open, China i difirente paisnan europeo.

E tempu aya den dekada 80 i 90 nos kuerpo di èmpayer tabat masha pidí rònt mundu pa nos nivel di aplika regla i tambe multi lenguista ku nos ta. Awendia Oscar ta un di nos miembronan di honor.

Pa loke ta e torneo su desaroyo i final e la bai komo lo siguiente. E prome sorpresa den e desaroyo, kaminda eliminashonnan tabata tuma luga, tabata e derota fulminante di Jaysron Mathilda na man di e veteranisimo Jacinto Zimmerman. Pero den e siguiente buelta si Jacinto ta bin pèrde kontra Giancarlo da Costa. Di otro banda e grandinan otro a keda a sigi lucha ku otro kaminda ta bin resulta den final e kampeon nashonal di Kòrsou Michael Dalnoot kontra esun ku a sali pone e prome torneo e aña aki riba su nòmber, esta Dimitri Leon. Despues di a kai atras 0-1 kontra Dimitri, Michael ta bòns fuerte bèk i ta gana konvinsentemente di Dimitri 4-1 i asina posishona su mes di imediato na di 2 luga riba e ranking tras di Dimitri. Despues entrega di trofeo a keda hasí pa un ruman di Oscar ku no por tabata tey pa motibu di kebrante di salud.

E proksimo torneo lo ta un ku no ta valido pa ranking i ku ta pa nos hungadonan 50+. Esaki lo ta riba e fecha di 30 di Mart 2017.

March 27, 2017

Fréderic Simonis Kampion Infantil di Ahedres 2017 den kategoria U12

WILLEMSTAD — Resientemente FEDAKO (Federashon di Ahedres Kòrsou) a tene su kampionato infantil di ahedres 2017 den e kategoria U12. Na e kampionato di ahedres U12 ku a tuma luga e aña aki na Sentro di Bario Janwe, ta tin no menos ku 17 partisipante.

Manera tabata di spera atrobe e faboritonan den e kategoria di U12 lo tabata e dos rivalnan Fréderic Simonis kende tin 9 aña di edat i Aviandrie Kastablank kende tin 10 aña. E dos hungadornan aki ya a demonstra na diferente okashon ku nan ta relativamente fuerte pa nan edat.

Durante nan enkuentro tur dos a desaroya nan piesanan rapido i hasi rokada pa proteha nan rey. Sinembargo Fréderic ta tuma inisiativa i lansa un atake ku ta fòrsa Aviandrie drenta den un posishon di defensa. Despues di poko insistensia, Fréderic ta logra kaba e wega ku un bunita kombinashon ku a kondusi na skakmat.

Fréderic Simonis ta logra kaba e kampionato den forma invikto komo kampion nashonal kategoria U12 ku 5 punto for di 5 wega. Na di dos luga a finalisa Aviandrie Kastablank ku 4 punto i na di tres luga a termina Xavier Werleman ku 4 punto for di 5 wega. Mas a leu FEDAKo a parti premionan di motivashon na entre otro Gilian Justiana i Jorgino Quirindongo.

Por konsidera e kampeonato U12 aki un bon preparashon i motivashon pa Fréderic Simonis kende lo partisipa pronto na Carifta su kampionatonan hubenil di ahedres ku lo tuma luga den siudat di Kingston na Jamaica di 14 pa 17 di aprel proksimo. Fréderic Simonis lo biaha huntu ku 4 otro ahedresista hubenil di Kòrsou ku FEDAKO a selekta i lo kompeti den e kategoria U12. FEDAKO ta spera ku Fréderic logra un bon prestashon durante su prome enkuentro internashonal i ku tur e miembronan di nos selekshon tambe presta bon i saka kara di nos pais.