Category: Otro

Posted on

Ministerio Públiko di Kòrsou ta anunsiá komienso di listramentu preventivo

WILLEMSTAD – Ministerio Públiko di Kòrsou (OM Kòrsou) ta anunsiá ku Kuerpo Polis di Kòrsou (KPC) i otro instansia nan hudisial na Kòrsou ta start awe ku listramentu preventivo riba kaya públiko.

Listramentu preventivo ta dirigí pa mengua e kantidat di arma nan di kandela ku ta sirkulá riba nos isla i pa pèrkurá pa un bahada di atrako nan arma.

Akshon nan di listramentu preventivo lo ser tene na momentu nan dirigí i riba òrdu di Fiskal di Ministerio Públiko i ankra den kuadro nan hurídiko bon stipulá.

Durante e akshon nan di listramentu preventivo lo repartí e foyeto “Dikon nèt ami?” na Hulandes, Papiamentu, Ingles i Spañó ku informashon tokante e akshon. E foyeto tambe ta optenibel na De Tèmpel (Ministerio Públiko Kòrsou) i na ofisina di Prokuradó-general riba Wilhelminaplein.

Posted on

Federashon Bolas Criollas Kòrsou (FBCK) ku direktiva nobo

WILLEMSTAD – Djaweps 30 di yanüari ultimo, na e ofisina nobo di Federashon Deportivo i Olímpiko di Kòrsou (CSOF), situá na Roodeweg 92a, a tuma lugá e traspaso ofisial di Direktiva di Federashon Bolas Criollas Kòrsou.

For di desèmber aña pasá Federashon Bolas Criollas Kòrsou (FBCK) tin un Direktiva nobo enkabesá pa Ellery Ello Makaja komo Presidente, pero tabata dia 30 di yanüari ku e akto ofisial di e traspaso a tuma lugá.

E direktiva anterior ku tabata presidí pa Sra Ayshel Richardson a reuní ku e miembro nan di e Direktiva nobo i a pasa e batuta over na e Direktiva nobo di forma ofisial. (Ello Makaja a diskulpa ku pa motibu di trabou e no por tabata presente.)

E Direktiva nobo su miembro nan ta:

  • Ellery Ello Makaja komo Presidente
  • Ruben Katalina ta Vise Presidente
  • Erlyson de Wind ta e Sekretario General
  • Sherman Meriën komo Tesorero

FBCK su meta mas importante ta pa bini bèk ku ekipo nan di Hubenil den Bolas Criollas, pa motibu ku pa hopi aña kaba no tin ekipo nan hubenil. Aktualmente e Federashon tin un Torneo Karnavalesko  ku ta tumando lugá tur wikènt riba e kancha di Bolas Criollas na Marie Pampoen kaminda a kuminsá ku e mucha nan di Marie Pampoen i bisindario pero ku e vishon pa por trese e deporte aki rònt Kòrsou.

Posted on

Nominado nan pa Deportista di Luna yanüari 2014

WILLEMSTAD – Komishon Deportista di Luna riba djasabra 01 di febrüari 2014, a reuní den sala di reunion di FFK, kaminda a evaluá i diskutí riba e kandidato nan ku a keda presentá pa miembro nan dje komishon i federashon nan pa e premiashon di “Deportista di Luna” korespondiente na luna di yanüari 2014.

Manera semper ta keda spliká, na momentu ku a inisiá ku e proyekto aki, e premio aki mester sirbi komo un estímulo, a base di prestashon i komportashon, pa nos deportista nan lokal, ku ta biba na Kòrsou i ku ta kompetí den kompetensia nan lokal komo tambe internashonal den representashon di pais Kòrsou.

E komishon a yega na e siguiente nominado nan:

1. Randhy Cuevas (Atletismo), Randhy ta un deportista ku ta praktiká e deporte di atletismo i dia 10 di yanüari último, na e evento di THE CLIMB TO THE ROSES 2014, organisá pa Stichting Ride for the Roses Curaçao, e atleta Randhy Cuevas en konekshon ku 10 aña Ride for the Roses Events a subi seru di Christoffel un total di 10 biaha i a logra rekoudá un total di 32 mil florin pa sostené Prinses Wilhelmina Fonds pa yega na fondo nan pa yuda kombatí kanser. E evento a kuminsá mitar di 7 di mainta i terminá den ora nan di atardi algu promé ku 4’or i Randhy a logra subi 10 bia. Pa e motibu ariba menshoná Randhy Cuevas a keda skohe komo nominado pa deportista di luna yanüari 2014.

2. SITHOC (Futbòl di sala), E ekipo di futbòl di sala SITHOC ta logra e título di e kampionato FFK FIFA-futsal 2014 di un forma invikto. Tabata djasabra 18 di yanüari 2014 na e kancha Johan Cruijff, na Mon Repos kaminda a tuma lugá e partido final di e kampionato lokal di FFK/FIFA-Futsal 2013/2014 entre Hubentut Fortuna i F.C. Sithoc. Mester bisa ku tabata un bon partido kaminda e ekipo di Sithoc a bini desidido i a bai ku e viktoria ku anotashon di 2 pa 0, pa asina titulá Kampion di Kampeonato FIFA/Futsal 2013/2014. Pa e motibu nan ya menshoná, e ekipo di SITHOC a keda skohe komo nominado pa deportista di luna yanüari 2014.

3. Alistair Monte (Siklismo), ta un siklista ku hopi talento. Tabata djasabra 18 di yanüari ku Alistair Monte a partisipá na e di 5 edishon di Uphill Challenge ku a tuma lugá na Fort Nassau. E aña aki tabata pa di sinku aña ku a tene ‘Uphill Challenge kaminda partisipante nan ta haña oportunidat pa subi seru di Fòrt Nassau mas tantu biaha posibel den un término di tempu di 4 ora ku nan baiskel. Alistair Monte di un forma sorprendente a subi e seru di fòrt Nassau un total di 35 bia i asina a kontribuí ku Stichting Prinses Wilhelmina Fonds den nan lucha kontra Kanser. Pa e motibu ariba menshoná Alistair Monte a keda skohe komo nominado pa deportista di luna yanüari 2014.

Komishon ta gradisí e siguiente spònser nan ku ta yuda pa e premiashon aki por bira posibel: CHANGES PRO SPORT – SALAS SPORT SHOP – RIO LOUNGE & SPORTS BAR- OLYMPIAT – MCB – PETRO INDUSTRIAL NV – CSOF – LILO SULBARAN – ALLSTAR EMBROIDERY – UTS – DIORCA NV – PELOTA – DE JONGH’S SPORTHUIS – FOTO STUDIO KORT  – STRAK STRAK BARBERSHOP- FFK

E anunsio i premiashon di e ganadó lo tuma lugá:
Fecha: Djasabra 8 Febrüari 2014.
Ora: 18.00 – 19.00’or.
Sitio: Rio Lounge & Sports Bar, Chuchubiweg 10?Damacor.
Den un ambiente liber di humamentu i liber di alkohòl!

Posted on

Seattle Seahawks a gana Super Bowl 48

NEW YORK / NEW JERSEY – E ekipo di Seattle Seahawks a bira kampion di futbòl amerikano, ganando di Denver Broncos den e di 48 edishon di Super Bowl. For di den promé mitar Seahawks a pone e wega riba ‘ijs’ bayendo ariba ku un skor di 22 pa 0. Den e di dos mitar Seattle a añadí 21 punto mas, miéntras ku nan defensa a mustra dikon nan tabata e mihó defensa den NFL e aña aki.

Siendo e mihó ekipo ofensivo den NFL e temporada aki, Denver Broncos a logra skor solamente 8 punto den partido. E partido a terminá ku un skor di 43 pa 8 pa Seattle Seahawks. Ku e viktoria aki Seahawks ta gana nan promé kampionato den historia di e ekipo.

Posted on

Karchi pa Super Bowl 48 kuminsando na $1620

NEW JERSEY – Esaki ta e siman di e evento deportivo mas grandi na Merka. Djadumingu e ekipo di Denver Broncos ta hunga kontra Seattle Seahawks den e di 48 edishon di Super Bowl.

E final di futbòl amerikano ku ta tuma lugá na MetLife Stadium, New Jersey ta konta ku un show den tempu di deskanso di Bruno Mars i Red Hot Chili Peppers.

E kanal FOX lo ta enkargá pa transmishon di e evento aki den kontinente amerikano. Pa motibu di e oudiensia grandi ku lo sintonisá e partido entre Denver Broncos i Seattle Seahawks, FOX a pone un tarifa di $4 mion pa 30 sekònde di propaganda durante di e evento.

Te ainda tin un kantidat di 3269 karchi disponibel pa e evento, esaki segun e paginá ofisial di NFL. Na e momentu nan aki e karchi mas barata ta bende pa un preis di $1620 miéntras ku esun mas karu ta bai pa $25.572.

Posted on

Eksitoso kurso pa hues nan di landamentu sinkronisá

WILLEMSTAD – Di 16 pa 19 di yanüari 2014, na Aruba, a tuma lugá un kurso pa hues nan di landamentu sinkronisá di F.I.N.A.  Vários pais di e kontinente amerikano i di Karibe i nan federashon nan, huntu ku nan hues nan i entrenadó nan, a partisipá na e kurso aki.

Sra. Virginia Jasontek, di Estados Unidos, sekretaria honoraria di e Komité Tékniko di landamentu sinkronisá di FINA, tabata esun ku a duna e kurso aki i sigur mester remarká ku Sra Virginia Jasontek a hasi esaki di un forma magistral.

E Komité Olímpiko di Aruba i su representante nan di landamentu sinkronisá, tabata esnan enkargá pa organisá e evento ku tabata un reunion di famia deportivo.

Kada seshon di e kurso a konstituí debate nan ekselente miéntras ku e diferente regla nan nobo di e deporte a keda trese na konosementu di e partisipante nan.

Na final di e kurso, e partisipante nan mester a traha un eksámen komo parti di e evaluashon. E resultado nan di esaki tabata satisfaktorio.

FAK (Federashon Aquatiko Kòrsou) tabata bon representá den presensia di diferente hues i árbitro. Tur e partisipante nan a risibí nan sertifikado di FINA.

E klup Swordfish  Aquatic Group tabata representá pa Sra. Igma Ruz Guerra, Sr. Jorge Luis Ruz Guerra i Sra. Bernice St.Hilaire-Meulens. E representante nan di Kòrsou a demostrá ku Kòrsou ta un potensia den deporte i ku ta traha ku amor pa un hubentut sano di kurpa i mente.

Posted on

Riordan ‘Rio’ Ilario ta gana Ulrich ‘Pel’ Hernandez den tènis di mesa

WILLEMSTAD – Federashon di Tènis di Mesa di Kòrsou a sigui ku su kalendario deportivo ku e biaha aki un kompetensia di B klas. Den un kompetensia tur-kontra-tur a partisipá 6 hungadó ku bin kulminá den un final kaminda Riordan ‘Rio’ Ilario ta gana Ulrich ‘Pel’ Hernandez ku score di 3-2.

E hungadó nan ku a partisipá tabata Riordan Ilario, Paul Lai, Denzel Martien, Ulrich Hernandez, Ralph Winedt i Martin van den Blink.

Despues di a hunga tur-kontra-tur e posishon nan a keda komo lo siguiente:

  1. Riordan Ilario 5-0
  2. Ulrich Hernandez 4-1
  3. Paul Lai 3-2
  4. Marin van den Blink 2-3
  5. Denzel Martien 1-4
  6. Ralph Winedt 0-5

Pues Riordan komo number 1 a bai final kontra Ulrich number 2 i den un bon best of 5 Riordan ta gana 11-9, 5-11, 15-13, 6-11 i 11-7.

E próksimo kompetensia lo ta esun di hubenil djadumingu awó kuminsando 10’or di mainta na Sala Irene Moreno na Muizenberg. Un invitashon na tur hende spesialmente nos hóben nan pa bin presensiá e kompetensia hubenil aki. Tambe lo tin oportunidat pa hóben nan bin inskribí pa práktika e deporte aki.

Posted on

Ministerio Públiko i Kuerpo Polisial Kòrsou ku uso di avioneta sin tripulashon pa kombatí kriminalidat

WILLEMSTAD – Ministerio Públiko (OM) Kòrsou i Kuerpo Polisial Kòrsou (KPC) ta bai hasi uso durante promé kuartal di 2014 di un medio moderno pa kombatí kriminalidat kresiente di atrako na Kòrsou. Ta bai hasi uso di un avioneta sin tripulashon “Raven” ku Ministerio di Defensa ta pone disponibel for di Hulanda pa bai siguí i despues detektá e atrakador nan.

Tradishonal mente e periodo promé i despues di karnaval ta mustra un oumento di atrako arma i otro delito kontra propiedat. Ministerio Públiko di Kòrsou ke bai hasi uso di loke humanamente ta posibel pa introdusí i pa logra un bahada signifikante di kriminalidat durante e periodo aki. Un petishon na Ministerio di Defensa di Reino pa uso di e avioneta sin tripulashon tambe ta forma parti di esaki i e petishon pa esaki a keda honra.

E avioneta sin tripulashon ta pèrkurá? pa mas informashon i e alrededor. Esei ta tuma lugá dor di manda informashon na tera pa medio di kámara nan na bordo. A base di esaki por tuma medida nan adekuá.

Posted on

Entrada hudisial relashoná ku kaso Magnus

WILLEMSTAD – Dia 18 di desèmber 2013, a tuma lugá un entrada hudisial na un kas na Jandoret. E entrada hudisial aki indirektamente ta relashoná ku e investigashon Magnus. Tokante e relashon entre e entrada hudisial aki I e investigashon Magnus lo no duna mas informashon na e momentu nan aki. No tabatin detenshon a tuma lugá.

Posted on

‘Regiezitting’ investigashon Magnus i otro nan

WILLEMSTAD – Awe, 18 di desèmber 2013, a tuma lugá e ‘regiezitting’ den e kaso Magnus i tres otro kaso di asesinato. Kuater persona ku ta keda sospechá di envolvimentu den e asesinato di H.M. Wiels, R.J.N. Conception, L.L. Arnaud i/òf R.J. Martinez a risibí un sitashon pa presentá na korte awe. Ta trata di e sospechoso nan E.R.K., C.S.P., D.F.J.D. i B.C.A.F. ku ta den aresto preventivo aktualmente.

Algun di e abogado nan di e sospechoso nan a hasi petishon na Korte pa (bolbe) tende algun testigu serka hues komisario. Tambe tabatin petishon nan pa traslado i suspenshon / ‘opheffing’ di e aresto preventivo di e sospechoso nan.

Despues di a tende e punto nan di bista di tantu defensa komo di Ministerio Públiko, Korte a yega na e desishon ku lo (bolbe) tende algun testigu serka di hues komisario. Korte no a bai di akuerdo ku e petishon nan pa suspenshon / ‘opheffing’ di e aresto preventivo di e sospechoso nan. Komo tal e sospechoso nan E.R.K., C.S.P., D.F.J.D. i B.C.A.F. ta keda den aresto preventivo.

Facebook Twitter Instagram Youtube
© 2024 Deporte Awe. Tur derechi reservá. Diseñá pa E² Media