Otro Archives | Page 37 of 38

April 5, 2012

CIBC FirstCaribbean ta patrosiná Kolegio Erasmo

Willemstad (Komunikado di Prensa) – CIBC FirstCaribbean a uní forsa ku Kolegio Erasmo dor di patrosiná e ekipo di hóbennan maskulino den e kompetensha di vòlibòl entre skolnan. Kolegio Erasmo a logra konkistá e di kuater puesto den e kompetensha entre skolnan di fundeshi.

Partisipashon di e hóbennan di Kolegio Erasmo, ku ta varia entre 11 pa 12 aña ta dirigí pa stimulá nan espíritu di kompetensha den un forma ku nan tin plaser pero den un ambiente disipliná. Nan partisipashon ta dependiente di nan dedikashon akadémiko, nan aktividatnan èkstra-kurikular i komportashon general. CIBC FirstCaribbean ta konsiderá e esfuerso aki bale la pena debí na su énfasis riba e balornan aki i ta spera ku esaki lo perkurá pa un fundeshi fuerte pa nan éksito den futuro.

“Ta un plaser mira kon e muchanan aki ta lucha pa keda kumpli ku e eksigenshanan asina nan no mester pèrdè ni un wega. Nan ta, komo parti di e ekipo, keda stimulá pa tin un komportashon deportivo. Pa nos gana e trofeo ku e mihó disiplina ta e aspekto mas importante pa partisipá den e kompetensha. P’esei nos ta orguyoso di a gana e premio aki aña pasa den e mes un kompetensha. Kolegio Erasmo, awor ku sosten di CIBC FirstCaribbean, a traha pa logra un klasifikashon haltu den e torneo e aña aki atrobe” asina Eugène Jansen, e entrenadó di vòli entusiasmá di Kolegio Erasmo a bisa.

April 5, 2012

Ekipo di dominó Los Veteranos ta biaha pa Santo Domingo

Willemstad (Komunikado di Prensa) – Los Veteranos, un tim di hendenan grandi den nos komunidat, resientemente a subi buelo di Dutch Antilles Express rumbo pa Santo Domingo pa partisipá na un torneo di dominó. E grupo ku ta konsistí di 14 hungadó di dominó ferviente lo representá Kòrsou den e torneo aki. Komo parti di Dutch Antilles Express, a patrosiná i transportá e tim pa Santo Domingo komo parti di Dutch Antilles Express su kompromiso i sosten nan kosnan positivo den nos komunidat engeneral pero den e kaso spesífiko aki bienestar di nos grandinan. E torneo lo tuma lugá durante di Siman Santu.

April 3, 2012

Avioneta ta aksidenta 20 mia nortost di Aruba

Avioneta ku a ditch na Aruba #1 — Kortesia di: Wardakosta

Awe den ora nan di mainta wardakosta di e área di Karibe a logra salbaguardiá dos tripulante di un avioneta ku a aksidenta. E avioneta ku tabata tin na bordo solamente un pilot i un kopiloto na bordo, a haña su mes konfrontá ku problema mas òf ménos 20 mia nortost di Aruba i dor di esaki e avioneta mester a “ditch” riba laman.

Mesora e sentro di Reskate i Kordinashon di wardakosta ku a wòrdu alarma direktamente pa e toren di kontròl na Kòrsou a saka su Dash 8, cutter Jaguar, dos Superrhibs i e barku di marina Hr.Ms. Amsterdam. E barku di marina aktualmente ta patruya pa wardakosta i mes ora a manda e helikòpter ku e tin na bordo bai buska e tripulante nan di e avioneta.

E helikòpter Lynx a haña e tripulante nan ta drif riba un balsa i a piska nan. Mesora e tripulante a wòrdu hiba riba e barku di marina kaminda nan a pasa un chekeo médiko. E tripulante nan a wòrdu hiba Aruba miéntras ku par di tempu despues e avioneta a senk.

Avioneta ku a ditch na Aruba #2 — Kortesia di: Wardakosta

E avioneta ta un Beechcraft di dos motor bou di e registrashon N8116L ku a sali for di Fort Lauderdale, Florida ku destinashon final, Kòrsou.

March 30, 2012April 3, 2012

Abby Hogan ta atmití di a gaña den investigashon di e desaparishon di su kasa James Hogan!

Segun Departamento di Hustisia Merikano, Abby Beards Hogan a atmití di ta kulpabel pa su ròl den opstrukshon di un investigashon multinashonal en konekshon ku desaparishon di su kasa James Hogan, ku e tempu ei tabata empleá na konsulado di Merka na Kòrsou.

Abby Hogan a atmití ku durante di e investigashon di e desaparishon di su kasa, kontinuamente e la duna informashon nan falsu relashoná ku e periodo di tempu promé ku James Hogan a desaparesé. Inisialmente Abby Hogan a bisa investigador nan ku promé ku e desaparishon di su kasa nan tabata tin un diskushon. Despues e la modifiká e vershon aki i bisa ku no tabata tin niun diskushon, solamente un desakuerdo chikí riba su kasa so próksimo trabou ku Departamento di Estado Merikano. Abby Hogan a sigui bisa investigador nan Merikano ku James Hogan tabata den “un bon beis” promé ku e la bai kana e anochi di desaparishon. Kontinuamente Abby Hogan a ninga ku tabata tin problema nan matrimonial òf ku su kasa tabata rabia, deprimí òf ku e tabata tin intenshon di kometé suisido. Abby Hogan a bisa mas leu ku e no por kòrda e kombersashon kompleto di tres minüt ku e tabata tin ku su kasa promé ku e la desaparesé paso e tabata morto na soño ora ku su kasa a yama. Segun Abby e la pega soño bek despues di e yamada i no a lanta te su siguiente mainta.

Segun dokumento nan di korte, despues ku investigador nan a entrevista Abby, entre 30 di sèptèmber 2009 i 15 di yanüari 2010, Abby Hogan a bora mas ku 300 email for di su kuenta di email. Tur e email nan aki tabata tin informashon nan ku Abby Hogan tabata sa ku ta relevante pa ku e investigashon. E email nan tambe tabata kontené informashon nan ku anteriormente Abby, sea no a kontesta muchu kla òf pa malu a keda sin kontesta na investigador nan Merikano. Esaki nan ta inkluí ku Abby tabata involukrá den un relashon for di matrimonio; ku e anochi ku James Hogan a desaparesé nan tabata tin un diskushon i ku James a bandoná kas rabia i tambe ku e no tabata ke pa e investigador nan sa kiko a pasa e anochi di e desaparishon di James Hogan.

Abby Hogan por haña un máksimo di 20 aña di prison pa opstrukshon di hustisia.

March 20, 2012

Falta di supsidio por kosta diferente atleta partisipashon na Londres 2012

E landadó Perry Lindo di 20 aña, ku na Òktober último a representá Komité Olímpiko di Antia Hulandes (NAOC) na weganan Pan Amerikano ku bon resultado, na e momentunan aki ta mirando kon e ta pèrdiendo su oportunidat pa klasifiká pa e weganan Olímpiko na Londres. Lindo ta den un training formal pa partisipá na un kompetensia klasifikatorio pa Londres na Habana, Cuba dia promé di Aprel binidero. Nederlandse Antiliaanse Zwembond (NAZB) ta bisa ku Lindo ta konfrontando problema, ya komo ku NAOC no tin e fondo nan nesesario aktualmente pa garantisá su partisipashon.

Segun Komité Olímpiko di Antia Hulandes (NAOC), no ta Lindo so ta eksperensiando e problema aki. E tiradó Philip Elhage a partisipá aña pasa na e Weganan Panamerikano (Mexico), ku tambe ta un evento Olímpiko, kaminda e la tira relativamente bon. Ya kaba e la yega e standard internashonal ku tambe ta konosí komo e Minimum Qualifying Standard (MQS). NAOC ta siguí bisa ku awor ta sumamente importante pa keda den training, i espesialmente kompetí regularmente riba un nivel internashonal. Despues di a paga e mes pa un kompetensia na Hulanda den luna di Febrüari, aworakí Elhage ta preparando pa un kompetensia na Londres, kaminda aki kuater luna e Weganan Olímpiko ta tuma lugá. Pero e konsekuensia di falta di supsidio ta ku Elhage no ta sigur di por sigui su programa, ni si e por wòrdu kompania pa ku su entrenadó.

Aktualmente tin 10 atleta ku ta den preparashon pa Weganan Olímpiko, kual ta:

Marc de Maar
Phillipine van Aanholt
Reginald de Windt
Rodion Davelaar
Philip Elhage
Michel Daou
Perry Lindo
Benjey Zimmerman
Rachmil van Lamoen
Lie Marvin Bonafacio

NAOC a sigui bisa ku nan komo Komité Olímpiko a pèrdè rekonosimentu olímpiko i esaki ta enserá simplemente ku nan no por hasi uso mas di derechinan Olímpiko. Mirando sinembargo ku nos ta den fase final di e kuadrenio Olímpiko, e organisashon máksimo, Komité Olímpiko Internashonal (KOI) a tuma sierto desishon ku te ainda ta hasi posibel pa atletanan ku tin e deseo pa bai Weganan Olímpiko (Londres) haña tal oportunidat.

Manera e dokumento ofisial ta bisa, KOI ta supervisá henter e proseso aki i ta duna un sosten tékniko i finansiero. E parti finansiero ta enserá mas bien ku ta kubri tur ticket pa Londres di atleta, coach i alabes tur gastu durante e Weganan Olímpiko. Ademas KOI ta sigui paga sèn di e bekanan Olímpiko ku e atletanan Rodion Davelaar (Natashon) i Audy Muller (Taekwondo) tin.

E simpel hecho ta ku NAOC te ainda no a risibí e supsidio di $30.000 manera Gobièrnu a primintí (aña 2011) pa nan por biaha bai weganan Pan Amerikano. Esaki ta pone NAOC sospecha ku e atletanan ku a partisipá na e weganan Pan Amerikano lo no haña e supsidio primintí tampoko. Hecho ta ku a entrega e presupuesto serka SEDREKO pa ku e Weganan aki i a hasi esaki riba indikashon di Ministerio di Deporte. NAOC a kombersá ku vários spònser i ta konkluí tambe ku e disponibilidat pa yuda nos atletanan ta minimal. Ku tur esfuerso NAOC a logra kubri gastunan pa manda e siklista Marc de Maar ku su coach pa Argentina. NAOC a logra akumulá sèn tambe pa Reginald de Windt partisipá na un klínika na Hulanda. NAOC tambe ya kaba a paga pa e tíketnan pa de Windt biaha bai Canada ku su coach.

NAOC a pidi KOI pa yuda e atletanan i ketu bai ta en espera di un kontesta ofisial. Esaki no ta kita ku nos tur di mundu deportivo ta lamentá kon nos mihó atletanan di Kòrsou no por haña un sosten na drechi. No por balotá e influensia negativo ku henter e situashon aki tin riba mente di nos hóbennan, NAOC a terminá bisando.

March 7, 2012March 7, 2012

Merka ta designa Korsou komo pais grandi den labamentu di plaka!

Kòrsou i St. Maarten a wòrdu designa komo “paisnan ku hopi labamentu di plaka” segun un reporte di Departamento di Estado Merikano. E reporte anual yama “Strategia pa Kontròl Internashonal di Narkótiko a subi Kòrsou i St. Maarten for di e kategoria di “hurisdikshon di prekupashon” pa e kategoria di “hurisdikshon di prekupashon primario.”

Ku esaki Kòrsou i St. Maarten ta uni nan mes na un lista amplio di 66 pais ku ta inkluí Afghanistan, Oustralia, Brazil, Isla nan Kaiman, China, Hapon, Rusia, Reino Uni, Merka, Uruguay i Zimbabwe.

Segun e reporte e pais nan aki a bira “pais nan grandi den labamentu di plaka,” òf “pais ku nan instituto nan finansiero ta partisipá den transakshon nan di plaka for di kua un gran parti ta prosedente di trafikashon internashonal di narkótiko.”

Klik aki pa e reporte riba Kòrsou

September 26, 2011May 9, 2012

Video: Konfeshon di Joran van der Sloot!

E programa di televishon Cuarto Poder na Perú a logra a haña un video di e interogashon polisial ku a tuma lugá despues di a transladá Joran fo’i Chile bek pa Perú. Den e video Joran ta konfesá Stephany Flores den kasino I ta invit’é bai serka dje den su kamber di hotèl. Una bes den e kamber di Joran, Stephany ta haña sa e relashon ku Joran tin ku e kaso di Natalee Holloway. Aki nan Joran ta rabia, bati Stepahny i pa despues strangule. Video ta kortesia di: Cuarto Poder i AmericaTV

Parti 1

Parti 2

September 11, 2011

Hurado nan pa Miss Universo 2011 ta konosí!

No ta pòrnada Deporte Awe! su lema ta: Tur loke ta deporte i algu mas, awe nos ta bai un tiki den e konkurso di Miss Universo 2011. NBC, Donald Trump i Paula M. Shugart a anunsiá e diferente selebridat i eksperto nan ku lo ta hurado na e di 60 kompetensia anual di Miss Universo. E konkurso di Miss Universo 2011 lo keda transmití live for di Credicard Hall na Sao Paulo, Brazil riba djaluna 12 di sèptèmber pa 9’or di anochi ora lokal di Kòrsou.

E hurado nan pa e konkurso ta:

Heio Castroneves, 3 biaha ganadó di Indianapolis 500
Connie Chung, periodista Merikano
Isabeli Fontana, modelo Brazilero
Vivica Fox, aktris i produktor di televishon
Adrienne Maloof, aktris den e seri “The Real Housewives of Beverly Hills”
Lea Salonga, ganadó di Tony Award i aktris
Amelia Vega, Miss Universo 2003

August 27, 2010

Proyekshon Resultado di Elekshon Konseho Insular

Nos por bisa ku e resultao final di elekshon no ta bai varia masha for di e proyekshon aki. Esei ta nifika ku PAR ta gana e elekshon aki, MFK ta e di dos partido mas grandi i Pueblo Soberano e di tres partido mas grandi.

Kòrda “refresh” bo página kontinuamente pa bo keda na altura di e último proyekshon nan. Esaki no ta e resultado final di elekshon, ta djis un proyekshon.

27-8-2010 22:56:47