WILLEMSTAD — Djamars otro siman 21 di febrüari Curaçao Weightlifting Federation (CWF) ta organisá un tremendo fundraising riba e barku Freewinds. 4 kantante popular i hopi gustá pa henter komunidat ta koperá ku CWF pa kumpli ku e kompromisonan ku tin pa e atletanan di e deporte di Hisamentu di Peso por representá Kòrsou den kompetensianan internashonal. Ta trata di Veanira Reed i Liesella Thomas, Boy Thode, Reinier Lijfrock. E shou ta 2 tiru den un klap ya ku por disfrutá di un tremendo shou i alabes koperá ku nos hóben atletanan.
For di aña pasá CWF a bin ta duna tremendo prestashon i resultado na kompetensianan e.o. internashonal tresiendo premionan den tur kategoria ku partisipá kas. Di e forma aki e deporte di Hisamentu di Peso a kuminsá pone Kòrsou un biaha mas riba plano internashonal. CFW lo partisipá na diferente kampeonato e aña aki den diferente kategoria i na diferente pais. Pa por kumpli i logra e metanan aki mester di fondo. CFW ta karesé di fondonan finansiero pa por subi di nivel i bira aun mas kompetitivo. CFW ta pronostiká mas premio pa Kòrsou den e kampeonatonan di Hisamentu di peso. Mirando e edat, peso ku e atletanan ta hisa, kondishon, motivashon i prestashon den training por bisa ku e atletanan di otro pais tin kompetensia grandi.
Komunidat i fanátikonan di e artistanan Veanira Reed, Liesella Thomas, Boy Thode i Reinier Lijfrock por koperá pa yuda CWF haña e fondo nesesario dor di partisipá na e shou Galaxy of Stars. E shou ta djamars 21 di febrüari próksimo i ta kosta solamente fl. 50,00. Pa karchi por yama e numbernan di telefòn 5129234, 5113028 òf 6789982 i si sobra lo bende na porta. Porta di Freewinds ta habri mitar di ocho (19.30 or) i e shou mes ta kuminsá och’or i ta kaba mitar di dies di anochi (8’or – 9.30’or). Hasi reservashon i kumpra bo karchi na tempu pa bo no keda afó i alabes koperá ku nos atletanan di Hisamentu di Peso.