Otro Archives | Page 6 of 38

January 25, 2017

Swim Club Orca Curaçao ku proyekto pa mucha di 3 i 4 aña familiarisá ku awa

WILLEMSTAD — Direktiva di Swim Club Orca Curaçao ta partisipá ku djasabra dia 04 di febrüari 2017 lo kuminsá ku kurso pa muchanan di 3 i 4 aña familiarisa (kustumá) ku awa. E kurso lo tin un durashon di tres (3) luna i dos (2) biaha pa siman tin treinen. Riba djasabra treinen ta di 16:00 or pa 17:00 or i djadumingu treinen ta di 10:00 or pa 11:00 or na Pisina Bennie Leito.

Meta di e kurso aki ta pa e muchanan di 3 i 4 aña familiarisá/kustumá ku awa, di moda ku nan por manehá fásil den awa. Ora nan tin 5 aña nan por partisipá na e kurso pa diploma “A” sin problema. Na final di e kurso lo tin un tèst i e muchanan ku partisipá na e tèst lo risibí un sertifikado.

Kabando e kurso aki no ta nifiká ku e mucha sa landa, sino ku e por defendé su mes. Semper e mester tin “gordel” bistí i e mester ta huntu ku su mayor ora e ta kantu di un pisina òf laman. E kurso ta kosta fl50,00 pa luna.

Pa inskripshon i mas informashon tokante e kurso aki por yama sr. Vernon Toré na telefòn 529-6586.

January 24, 2017

Kampionato Basketbòl MCB/Curoil ku 6 wega den wikènt

WILLEMSTAD — Federashon di basket Kòrsou, “Cubafe” den fin di siman a kontinuá ku kampionato nashonal di basketbòl patronisá pa MCB i Curoil ku 6 tremendo wega. Un públiko basta grandi a bin apoyá nan ekiponan. Weganan bon dirigí pa ofisialnan ku a presentá den nan unifòrm nobo di Cubafe.

Sala di Deporte Errol Rooi djasabra último tabata sede di weganan di kampionato nashonal di basket. Kuater wega hubenil i dos wega di senior. E promé wega a bai den e kategoria U11 entre Sharks Atlantic i Janwe Spartacus. Un wega hopi pèrtá kaminda voral hóbennan di bou di 10 aña di ámbos ekipo a bin ta destaká.

Finalmente Janwe Spartacus a vense e ekipo di Sharks ku e skor di 30 pa 26. Topscorer di Spartacus tabata Samuel Jaramillo ku 18 punto. Topscorer di Sharks tabata Kile Lee ku 11 punto. Den kategoria U13 tabata Sharks ku a sali victorioso ku skor di 38 pa 29.

Demas resultado ta, den kategoria U15 Sharks a gana Warriors ku skor di 35 pa 22.

Kategoria U18 tabata Janwe Spartacus ku a gana di Warriors ku skor di 29 pa 21.

Weganan senior tabata e ekipo kampion di aña pasá, Gators ku a aplastá e ekipo di Vikings ku skor 72 pa 26.

E último wega tabata Seru Fortuna kontra Nets. Nets a sali victorioso ku skor di 63 pa 48.

Un bon trabou di voral e miembro di direktiva di Cubafe Sr. Rene Hooi enkargá ku kampionato nashonal di basketbòl 2016/2017.

Weganan ta kontinuá ku wega senior djaweps awo ku Spartans 1 kontra Trotters 2 i djabièrnè Nets kontra Spartans 1. E weganan ta tuma lugá na SDK Brievengat i ta kuminsá pa 19:15.

January 24, 2017

Resultadonan di Vòli djaluna anochi

WILLEMSTAD — E kampionato di Vòli a kontinuá ayera nochi den Sala Errol Rooi ku wega nan di Klase A ku e sigiente resultadonan.

Titus a batayá fuerte kontra di Stakamahakchi pero a keda kòrtiku pèrdiendo ku kore di 2-0 (17-35 i 23-25) i Stakamahakchi ta mantené nan invikto.

Xaverianen ta tin un anochi fásil ora nan a pasa riba Hurricane 2-0 (25-16 i 25-12) mas lat Shuatanari a manda Watakeli kas bek ku skore di 2-0 (25-21 i 25-21).

Green Tiger a kaba kos den dos set ganadó di Watakeli ku skore di 25-17 i 25-10

E kampionato di Vòli ta sigui djárason awor ku e siguiente weganan:

Watakeli lo enfrenta Hurricane den klase femenino superior i na mes momentu Stakamahakchi lo topa Watakeli den maskulino A.

January 24, 2017

Presentashon direktiva nobo di Vòlibòl i Resultado di Weganan

WILLEMSTAD — Djadumingu tabata e gran dia ku Vòlibòl a presentá su Direktiva nobo den presensia di Sr Koeiman promé minister, Jean Fransisca presidente di FDOK miembro nan di honor, miembro nan di Salon di fama, hungadó, invitadonan special i fanátiko nan di Vòli.

Tabata un atardi ku Vòlibòl a haña e atenshon ku e tabata meresé i tur hende a primintí di yuda e deporte pa yega na e nivel ku e tabata ántes.

Resultado di weganan ku a sigui despues:

Den Klase superior

Shuatanari ta logra un viktoria di 3-0 riba Green Jewels 25-10, 25-17 i 25-12.

Hurricane a sali fuerte den e promé sèt pero e kampion nan di Kòrsou Stakamahakchi ta rekuperá na tempo i ta gana e wega ku parsial 25-23, 25-13 i 25-14.

Den Maskulino superior

Xaverianen mester a soda hopi promé ku nan por a bai kas ku e viktoria di 3-1 riba Green Tigers 22-25, 25-15, 25-17 i 26-24.

Klase A Maskulino

E enkuentro aki a sali 2-0 na fabor di Wata 25-11, 25-10. Xaverianen no por a wanta e machine di atake di Wata.

Djaluna e kompetensia a sigui den Sala Errol Rooi ku wega nan di Klase A.

Titus ta sali kontra di Stakamahakchi
Xaverianen lo bai midi forsa ku Hurricane
Shuatanari lo topa Watakeli (Fem) na mes momentu ku Green Tiger ta enfrentá Watakeli (Mask).

January 20, 2017January 20, 2017

DOUBLE PLAY DOMINO DRIVE (DPDD)

WILLEMSTAD — Antisipando riba e estreno mundial di e pelíkula “Double Play” di e eskritor Kurasoleño Frank Martinus Arion, Fundashon Bon Intenshon ta organisá djadumingu dia 22 di yanüari 2017 un tremendo Double Play Domino Drive den Sentro di Bario Wespen. Un total di 14 tim lo ta kompetiendo pa e promé lugá i tambe pa premio masha atraktivo.

Manera nos sa ku den e buki/pelíkula “Double Play” (Changá) e wega di domino ta un tuma luga prominentemente. Domino Master Jean Mark Welvaart lo ta esun enkargá ku e Double Play Domino Drive i Sentro di Bario Wespen lo pone nos sinti nos na kas ku un kushina i un bar na lugá. E kampeonato ta kuminsá 1or, pero for di tempran lo tin ambiente na e Sentro di Bario Wèspen.

January 19, 2017

Stakamahakchi ta klap Watakeli 3-0

WILLEMSTAD — Watakeli Buiding Depot i Stakamahkchi Guardian Group a faha pisa kontra otro ayera nochi den sala Errol Rooi i ámbos ekipo a duna un bon demostrashon di talento i koordinashon pero tabata Stakamahakchi ku a sa di mantené e bentaha den tur set i ta bai ku e viktoria ku parsial 25-19, 25-17 i 25-21. Anais Conradus i Ghisa St Hilaire a destaká pa e ekipo di Stakamahakchi tantu den defensa komo ofensiva.

Den Maskulino A, Xaverianen no por a keda kla ku e hóben nan di Green Tigers i nan ta kai vensí 2-0, (20-25 22-25) tabata un wega bon bringa ámbos banda kaminda e hóben Bertje Luis a skor e puntonan klave pa Green Tigers sali di e porta grandi.

E kampionato ta kontinuá djadumingu awor den sala Errol Rooi ku e siguiente partido nan:

5:00pm Femenino superior Stakamahakchi lo bai midi forsa ku Hurricane i na mes momentu Wata lo enfrentá Xaverianen

Pa 7:00 den Femenino supperior Shuatanari lo sali kontra Green Jewels i riba kancha 2 Green Tigers lo topa Xaverianen den maskulino superior.

Promé ku e partido nan aki lo bai tin un akto ofisial kaminda e direktiva nobo ku lo bai dirigí Vòlibòl lo bai presentá nan vishon i mishon ku nan lo bai sirbi Vòlibòl den e próksimo 4 aña nan. Pa e okashon aki Volibolistanan mandatario nan,miembronan di Honor, i invitado nan spesial lo bai ta presente huntu tur fanátiko di Voli.

January 19, 2017

Torneo Internashonal di biar na Kòrsou: Caribbean Ten Ball Challenge

WILLEMSTAD — E fin di siman aki 20 pa 22 di Yanüari Power Pool Productions ta presentá un tremendo kampeonato Internashonal di biar kaminda un total di 40 hungadó tantu lokal komo internashonal lo partisipa na e Caribbean Ten Ball Challenge. Kòrsou lo ta bon presentá ku alrededor di 20 partisipante. Den esnan ku ta partisipá Jeffrey Nieuwenhuijzen e aktual nr. 1 di Kòrsou i Bryan Farah lo ta den esnan faborito pa bai ke título máksimo. Lo ta bai tin partisipante internashonal di e siguiente paisnan ku ta: Trinidad & Tobago, Guyana, Venezuela, Inglatera, Alemania, Merka, Aruba, Panama, Santo Domingo i Puerto Rico.

Den esnan internashonal lo bai tei Alan Rolon 2 biaha kampeon panamericano (2004, 2005). Alan tambe lo tambe ta den e faboritonan pa bai ke título. Banda di esei nos tin e venezolano revelashon hubenil ku a kaba di sali nr. 5 na e weganan mundial na China Jesus Atencio. Jesus ta 7 biaha kampeon hubenil di weganan Panamerikano.

Lo bai tin aproksimadamente un total di 6000$ na premio. E weganan lo tuma luga na House of Billiards (Landhuis Granbeeuw). Entrada ta por nada. E weganan lo kuminsá djabièrnè alrededor di mitar di 3 te ku 10 or anochi. Djasabra for di 1pm te ku 10pm. Djadumingu for di 1or anto 8or e gran final. E organisadó di e evento aki ta Karl Vervuurt. E tournament director pa e evento aki lo ta na enkargo di Michael Arvelo I e parti technico lo wordu manega pa Gemajel (Jimmy) Rol.

Power Pool Productions ke yama un danki na tur e sponsornan ku a yuda pa hasi e evento aki posibel:

Fire Grill Café, Right Side Car rental, Bugs Bunny, Nolly’s Party rental BV, Sportcenter, DejaCon, Hotel Otrabanda, House of Billiards, Jdh Car Rental, Island Pool, Emporio.

January 17, 2017

Randhy Cuevas a subi Seru Kristòf 15 biaha

WILLEMSTAD — Djadumingu e deportista lokal Randhy Cuevas a subi Seru Kristòf 15 biaha den un hazaña pa rekoudá fondo pa Fundashon Prensès Wilhelmina. E diessinku subidanan ta dos mas tantu ku e tabatin programá.

Na final di e hazaña, presidente Robbin Martina di fundashon Ride for the Roses a risibié ku un bukèt di rosa komo gesto di gratitut pa su kontribushon na e bon kousa. Randhy Cuevas ku su akto deportivo aki a logra rekoudá sigur 25 mil florin.

Djis despues di 12 ‘or di anochi Randhy Cuevas a kuminsá ku su promé subida. Ora el a baha pa di 8 biaha, tabatin un di e promé gruponan, inkluso diferente turista, ku riba nan mes tambe a subi. Nan a saka potrèt kuné komo sosten. Kada be ku e tabata regresá abou, tabata kontrolá su estado di salú i su ánimo, pero e no a kansa. Den mardugá el a sinti hopi friu. Si no tabata pa e friu, kisas lo el a subi i baha hasta mas tantu bes.

Ora Randhy a alkansá 13 biaha alrededor di 1 or, el a laga sa ku e no ta stòp ainda. El a yega 13 pa Ride for the Roses, pero el a subi dos bes mas pa e mes.

Finalmente, kuartu pasá di 3 el a finalisá e di 15 biaha tambe. RFTRC presidente Robbin Martina a entregá Randhy Cuevas un bukèt di 15 rosa – 13 blanku i 2 kòrá, pa e tremendo prestashon. Presente tabata tambe un grupo di representante di RFTRC, di Fondo Prensès Wilhelmina bou di guia di presidente Alba Martijn, diferente sostenedó di Randhy bou di liderato di Emerik Angela, Krus Kòrá, Marina Real, Parke Kristòf, algun medio di komunikashon i otro interesadonan.

E logro finansiero di Randhy tambe a surpasá e loke a pone komo meta. A bai pa 13 mil florin por lo ménos i danki na Randhy e suma aki a alkansá 25 mil florin. Un danki ta bai di RFTRC na Randhy mes i su ayudantenan, na tur voluntario i na tur esnan ku a duna un.

January 17, 2017

E kampionato di Vòlibòl a kontinuá ayera nochi den Sala Errol Rooi ku algun wega elektrisante

WILLEMSTAD — E kampionato di Vòlibòl a kontinuá ayera nochi den Sala Errol Rooi ku algun wega elektrisante.

Den Femenino A:

E ekipo di Titus ku a hasi su debut den Vòlibòl, ta kai vensí 2-0 konta di Shuatanari (19-25, 13-25

Den e otro wega di klase A, tabata e ekipo Femenino di Xaverianen ku ta derota e hóben ekipo di Watakeli ku skore di 2-0 ( 25-18, 25-20.).

Por último Stakamahakchi den klase Femenino A ta dominá Hurricane ku skore di 2-0 ( 25-18, 25-16).

Den Maskulino klase A:

Watakeli a bin brabu i a kaba kos trempan ganando di Stakamahakchi 2-0. ( 25-19, 25-11)

E kampionato ta kontinuá djárason awor 18 yanüari den Sala Errol Rooi ku dos partido, unu den Klase Superior Femenino ku lo bai entre Stakamahakchi i Watakeli i na mes momentu Xaverianen lo bai midi forsa ku Green Tigers den Maskulino A kuminsando 19.45.

E públiko ta birando dia pa dia mas i mas grandi pa mira e wega nan aki ku ta hunga riba tur Djadumingu, Djaluna i Djárason .

January 17, 2017

Volibol a ranka sali kayente den 2017 den Sala Errol Rooi

WILLEMSTAD — E kampionato di Volibol klase Superior i klase A a start ku su prome weganan den 2017.

Den Klase A Maskulino:

Titus ta gana Watakeli ku skore di 2-0 (25-8, 25-17) i Wata ta gana Green Tigers 25-15, 25-22.

Den Femenino superior:

Shuatanari ta derota Hurricane 3-0 ( 25-22, 25-20 i 25-17) i Watakeli ta gana Green Jewels 3-0 (25-23,25-13 i 25-21).

Den Maskulino superior:

Watakeli Building Depot ta derota Green Tiger Blylord 3-0 (25-15, 25-23 i 25-19).

E kampionato a sigi ayera djaluna 16 di yanuari ku wega nan di klase A. Den kategoria A femenino, Watakeli a enfrenta Xaverianen i na mes momentu Shuatanari a enfrenta Titus. Mas lat Hurricane a midi forsa ku Stakamahakchi i na mes momentu Wata a enfrenta Stakamahakchi Guardian Group den Maskulino A.