Otro Archives | Page 7 of 38

December 14, 2016

Juan Pablo Duarte i St. Paulus VSBO ta titulá kampion!

WILLEMSTAD — Despues di kanselashon pa motibu di awa djabièrnè último, ayera djamars 13 di desèmber a sigui ku e weganan final di tantu vòlibòl komo futsal den ACU Deporte Eskolar. Tabata un atardi ku a konta ku dos bon wega i ku a hala un públiko basta grandi, kua a inkluí direktor i algun miembro mas di personal di Direktiva di Skolnan Públiko kende a bin apoyá nos hobennan

E promé wega tabata di vòlibòl, unda ku Juan Pablo Duarte VSBO a gana di SAAN 2 – 0, mientras ku e wega di futsal a terminá 2 – 1 pa St. Paulus College.

Aki e resultádonan final:

Vòlibòl Femenino

Kampion – Kolegio Alejandro Paula, KAP
Sub-kampion – International School of Curaçao, ISC
Di 3 lugá – Regina Pacis
Skol mas disipliná – St. Jozef VSBO

Vòlibòl maskulino

Kampion – Juan Pablo Duarte VSBO
Sub-kampion – Skol Avansá Amador Nita, SAAN
Di 3 lugá – St. Jozef VSBO
MVP – Badwin Luis
Skol mas disipliná – International School of Curaçao, ISC

Futsal

Kampion – St. Paulus VSBO
Sub-kampion – St. Jozef VSBO
Di 3 lugá – AGO Comanchestraat
MVP – Jo Petronillia
Skol mas disipliná – SHAIH

FDDK ta felisitá no solamente e skolnan ku akai den premiashon, pero tur ku a partisipá na e disiplinanan di futsal i vòlibòl skol avansá den ACU Deporte Eskolar i ta spera di sigui konta ku boso partisipashon. Ta huntu nos ta deporte, i huntu nos ta Kòrsou!

Pa keda na altura di tur akontesimentu den kuadro di ACU Deporte Eskolar, sigui e página di Facebook, www.facebook.com/DeporteEskolar.

December 14, 2016

Apertura Kampeonato di basketbòl Kòrsou 2016 – 2017

WILLEMSTAD — Federashon di Basketbòl Kòrsou, CuBaFe ta anunsiá ku weganan pa Kampionato Nashonal Di Basketbòl di Kòrsou, 2016-2017, ta bai kuminsá djasabra 17 di desèmber benidero. Direktiva di e federashon, ni maske ku nan a ser konfrontá ku algun opstákulo, despues di 5 luna, ta start ku su temporada di kampionato nashonal 2016 – 2017, manera a ser primintí. E kampionato lo ser dediká na Maurits “Papi”LaBast. LaBast ta e legendario hungadó (Olympic) i entrenadó di basketbòl kende a fayesé na Oktober di e anja aki, ku na dezember 1972 a pone un rekort di 94 punto di score den un wega.

Federashon di basket por mira atras riba un eksitoso temporada di basket 2015/2016, ku a sa di yena e tribuna di Sala di Deporte Errol Rooi na Sentro Deportivo Kòrsou, kaminda mayornan i un públiko grandi, por a gosa di e weganan final di e muchanan kategoria 11, 15, 18 i tambe e enkuentronan elektrisante entre Gators i Spartacus.

Presidente di CuBaFe, sr. Eelco Gonet a informá ku en prinsipio, e kampionato, tabata pa start 4 Novèmber manera e la wòrdu di schedule for di komienso di e aña aki. Direktiva a hañ’e konfrontá ku hopi aspekto organisatorio ku tabata fuera di su falta, i mester a posponé e fecha di apertura 3 bes. Naturalmente esaki ta pone demasiado peso riba miembronan di Direktiva, ku boluntariamente ta duna nan tempu, pa organisá, engrandese, i desaroyá e deporte di basketbòl na un forma organisá i debido”.

Banda di e kampionato nashonal por menshoná ku federashon tin su plan di maneho di 2017 – 2018 kla. Esaki lo wòrdu trata den e promé reunion statutario den luna di Yanüari 2017. E plan di maneho tin 4 punto di lansa esta; 1) Formashon tékniko di coachnan, eksigensia di “wedstrijdregelmenten” nobo, 2) Formashon di arbitrahe pa tur kategoria, 3) Plan di bario i skol pa yega na ekiponan di region, 4) Formalisá un kuadro di un “Optimale Competitie Model” pa CuBaFe. Den un anja Direktiva a:

Organisa kampeonato despwes di 7 anja
formalisá statuto nobo di e federashon. Esaki tabata nesesario pa kumpli ku stipulashon di Federashon Olímpiko di Kòrsou, i ademas leinan konforme BW 2., i kupa meta pa afiliashon internashonal
re-inisiá e proseso pa CUBAFE bira miembro di FIBA. CuBaFe tabata miembro pero a pèrdè e miembresia aki na òktober di aña 2010. Esaki pa motibunan di kambionan di struktura estatal ora ku Antia a stòp di eksistí’.

Federashon ta trahando duru, ku hopi dedikashon i seriedat pa trese CuBaFe bek den e spotlight positivo, despues di un temporada atministrativo finansiero i organisatorio kaótiko, entre 2007 – 2014, ku e direktiva anterior no por responsabilisá, no opstante di e medionan finansiero ku patrosinador a pone.

Den un moshon di reunion general, di 14 Juli, 2016, miembronan a obliga Direktiva pa atendé e asuntu aki na un forma debido. De e dianan aki Direktiva lo saka tur informashon pa ku e apertura di 17 Dezember 2016. Fanátikonan di basketbòl keda pendiente, paso 2017 tin masha hopi kos bon na kaminda. Direktiva di CUBAFE ta gradisí tur boluntario, ku a sostené e deporte di basketbòl i espesialmente Banco Di Caribe NV i FDOK.

December 14, 2016December 14, 2016

Torneo 100 aña MCB ta drenta su último siman

WILLEMSTAD — Wikènt tras di lomba weganan di e torneo 100 aña MCB patrosiná pa Maduro & Curiel’s Bank a kontinuá ku weganan desisivo pa wak ken ta e ekiponan ku lo pasa pa final. Djasabra tabata e ekiponan di Senior league ku mester a lucha pa por keda den e torneo.

Despues di un áwaseru fuerte djabièrnè tabatin duda ku weganan lo a siguí djasabra pero manera ta kustumbrá kaba di e organisadónan wega ta para na vèlt. For di djabièrnè a sòru pa e partinan di tera na Tio Daou ta tapa i pa djasabra despues di algun trabou riba e vèlt weganan por a sigui.

Den e promé partido e ekipo di Montaña Ariba a sa di gana di e ekipo di St. Michiel ku skor di 10-4 i keda na bida. Den e di dos partido e kampionnan di aña pasa Sta. Rosa ta pasa fásil riba Brievengat ku skor di 11-1. E di tres partido a bai entre e number 1 di temporada regular, Van Engelen, kontra e number 2, Marchena. E partido aki tabata bon bringa i tabata 0-0 te den bòm di 4 kaminda áwaseru a kai bastante fuerte i mester a para e wega un ratu. Aki mester duna un elogio na tur dos ekipo ku a reakshoná lihé i e muchanan mes a kore sali for di “dugout” i tapa e vèlt.

Huntu ku e kuerpo di umpire e komishon organisadó a tuma e desishon pa warda 30 minüt i wak kon e vèlt ta seka. Mester bisa akinan ku e sistema di drain pa e awa bai di Tio Daou a hasi su trabou i despues di a drecha vèlt bek e wega por a sigui atrobe. Wega a keda kayente i despues ku kada ekipo a anotá un kareda mester a bai “tie-break rule” i den un final dramátiko ku e último out di e partido na home plate e ekipo di Marchena a sali di porta grandi ganando ku skor di 2-1 i asina pasa mesora pe final di divishon Senior.

E delaster partidó di dia a bai entre e 2 promé ganadornan di dia, Montaña Ariba kontra Sta. Rosa. E partido aki tabata bon bringa inisialmente pero despues Sta. Rosa a tuma kòntròl di e wega i a sa di gana ku skor di 8-1 i keda na bida un dia mas.

Djadumingu kosnan a sigui kayente i den e divishon Junior e ekipo di Marchena a sigui lusi bon i ta gana di Montaña Abou ku skor di 9-4. Den e di dos partido Trai Seru ta gana pèrtá di Brievengat ku skor di 7-6. E di tres partido tabata unu di Senior league pa determiná e otro finalista i akinan den un partido kaminda Sta. Rosa a sali bai duru bai para, Van Engelen a bringa bini bek pero keda nèt kòrtiku i ta pèrdè ku skor di 6-4. Asin’aki Sta. Rosa ta pasa pa e final kontra Marchena pa bai purba defendé nan titulo di aña pasa. Den e último partido pa determiná e finalista di Junior tabatin un fiesta di kareda i despues di a sali kai atras 7-0 den promé inning, Trai Seru a logra bini bek i kue bentaha. Trai Seru ta yega e último inning dilanti ku diferensia di 7 kareda pero no por wanta esaki i Marchena ta empatá i bai dilanti pa 1 kareda. Serando e inning Trai Seru ta logra skor 2 pa laga Marchena den tereno ku skor di 18-17. E ekipo di Marchena ta logra kaba na mesun posishon ku aña pasa ora nan keda te den e último tres ekiponan. Trai Seru ta pasa pe e gran final di Junior kontra e ekipo di St. Maria. E final lo ta un “best of three” i nan lo kuminsá djabièrnè dia 16 di desèmber na Tio Daou pa 6or di atardi ku e partido di Junior i despues pa 830 esun di Senior. Djasabra dia 17 e weganan ta kontinuá for di 9or di mainta i e torneo lo kaba djasabra mes. Esaki ta nifiká ku si e serie(nan) empatá djasabra e timnan lo tin ku hunga un “double header”.

Kòrda ku por sigui tur e weganan tambe via di gamechanger òf via di e scoreboard riba e wepsite: eteamz.com/100anjamcb

Fanátiko nan di baseball di mucha ta invitá pa bini Tio Daou i animá nos muchanan den e último weganan di aña 2016 djabièrnè dia 16 i djasabra dia 17 di desèmber awor.

November 23, 2016

3er edishon KLM CURAÇAO MARATHON

WILLEMSTAD — Djadumingu dia 27 novèmber próksimo ta momentu un biaha mas pa e di 3 edishon di KLM Curaçao Marathon. Kees Muiswinkel, presidente di fundashon Run in the Sun, organisado di KLM Curacao Marathon a bisa den e latstu rueda di prensa diamars ultimo “Komo organisashon nos ta trata pa e evenemento aki tin akohida nashonal i internashonal. Nos ta masha kontentu ku e aña aki mas ku 2.000 persona, tantu partisipante komo mirado, di 29 pais ta bini nos isla speshial pa e KLM Curacao Marathon.”

Ku e eksperienshi di prome 2 edishon nos ta soru pa tin mehorashon i inovashon pa e kareda benidero. Pa ilustra algun inovashon Kees van Muiswinkel ta menshona:

Tim di kompania ku ta bai partisipa huntu
2.000 persona ku no ta biba na Korsou, partisipante i fanitiko
Kanshon special pa e evento kanto dor di Shirma Rouse
Registrashon di tempu aun mas presis na mas luga, in total 3
Registrashon di tempu riba distanshia di 5 km i na e trail di 10.5 km
App gratis ku programa di treining individual. Famia i amigu por sigui partisipante via di e ‘Live Track & Trace’
Sertifikado gratis pa kada partisipante ku bo nomber i distanshia
Tur partisipante por obtene kontra pago un potret i video di e finish. Tur partisipante ta haña email ku imagen uniko ku por wordu besteld
Fruta i bebida di AA pa tur partisipante
Un final asfalá speshial pa por finalisa manera deseá riba beach
Premio pa e finalista number 1, 2 i 3 pa tur distansia pa hòmber i muhé
Selebrashon na final, seremonia di premiashon parti mainta i after parti anochi na restaurant Hemming huntu ku Los Compadres
Diabierne anochi, sine ‘Forrest Gumb’ den aire liber riba di di Lions Dive & Beach Resort na bar Chill

Bo por gana 2 KLM ticket Amsterdam – Korsou

Anto pa korona e evento tur partisipante di Aruba, Bonaire of Korsou por gana 2 ticket ida i buelta pa Amsterdam – Korsou. E tombola ta tuma luga mesora despues di premiashon pa 11.00’or. Pa number di start ta bai den e tombola.

Kiko ta hasi KLM Marathon Uniko

Willem Cordilia, presidente di e Federashon di Atletismo di Korsou i Race director ta aksentua ku e elementonan ku ta hasi e kareda aki uniko ta keda mantene i ta hasi tambe un resumen

Sr. Willem Cordilia Presidente di Curaçaose Atletiek Bond (CAB) i alabes Race Director, tambe kier a asentuá kua tabata e ingredientenan ku a hasi e Marathon aki úniko i mester konserva esaki nan:

Tur partisipante ta un ganador i ta risibí un medaya i un T-shirt
E ruta ta AIMS sertifiká i ta riba e kalènder International di Marathon
Un ruta úniko ku ta rekoré e parti nan históriko di Kòrsou, ku hopi músika
Tin 6 distansia Marathon – Mitar Marathon – 10 K – 5K i Walk & Run 2 distansia 10.5K i 16.65K
2 Kareda simultáneamente: Road Race i Trail
Diferente orario di salida pero ku ta terminá kasi pareu
Lokal i International, grandi i chikí, hòmber i muhé, atleta i esnan ku ta rekreá
Na final bo tempu ta wòrdu registrá i por mira esaki mesora online
Por mira tur tempu e siguiente dia den Korant Amigoe
Lo tin sufisiente waterpost i tambe presensia di EHBO.

Partisipashon ta kresiendo:

E interes pa partisipá a krese enormemente, na e momento aki e organisashon tin 1,900 partisipante registrá i ta spera ku esaki lo oumentá e siguiente dianan te un máksimo di entre 2500 pa 3000 partisipante.

Nos ta konta ku partisipashon di 29 pais. Un tersera ta internashonal. Hulanda ta na kabes ku un partisipashon di mas o ménos 55%.

Kees van Muiswinkel ta kontentu ku e desaroyonan aki, komo ku algun aña pasa ora ku e la kuminsá ku e proyekto huntu ku Martin Does tabata un di nan metanan prinsipal pa esaki yuda Turismo tambe krese, i esun mas prinsipal ta pa promové spòrt na Kòrsou.

Hasi spòrt ta kibra barera i esaki bo por nota na final kaminda tur hende ta kontentu saludando otro.

Kees van Muiswinkel i Martin Does ta disfrutá mas ora di inskripshon i e kontakto ku e partisipantenan, nan eksperiensha kon nan ta preparando i train pa e Marathon. E aña aki atrobe tin algun persona speshial ta partisipa manera señora Sloan di Merka ku ta kore su di 298 marathon anto señor Jaap van den Berg ku ta kore un marathon den e di 75 pais. John de Rooij, ganado di marathon 2014 i ganado di mitar marathon di 2015 ta bolbe partisipa. Marlies Kort, ganado di e mitar marathon di 2014 i di 2015 ta kore e biaha aki e marathon kompleto. Tin ku wak ku e record di Tomi Halme di Finlandia di 2015 por wordu kibra. Su tempu tabata 2 ora, 50 minut i 33 sekonde.

Makshimo di 3.000 partisipante

E organisashon a prepará pa maksimal 3000 partisipante, esaki debí ku tin ku tene kuenta ku seguridat i parti logístiko etc. i naturalmente kumpramentu di medaya, T-shirt, awa, fruta, sportdrank.

Ku e último dianan nan a tuma nota di un oumento den inskripshon i e t-shirt ‘dri-fit’ den kolo di bandera di Korsou, kasi a kaba.

Na restorant Piazza karchi nan tambe ta serka di kaba pa e tradishonal Pasta Party ku Chef i tambe strea i marathonloper Pascal Jalhay.

Inskripshon por ainda te ku diahuebs di16.00 pa 19.00’or serka Van den Tweel na Zeelandia

Diarason i diahuebs por inskribi di 16.00 pa 19.00’or na Van den Tweel Supermarket na Zeelandia. Diabierne mainta por inskribi na ofisina di Marathon na Lions Dive & Beach Resort di 7.00 pa 14.00’or. Tambe por inskribí na Amigoe na Scherpenheuvel durante ora di ofisina.

Por inskribí tambe online via www.klmcuracaomarathon.com despues di inskripshon online por paga na Van den Tweel na Zeelandia i na Korant Amigoe.

Tur partisipante ta haña prueba di inskripshon, registrashon di tempu di Mylaps, un t-shirt gratis i un medaya

Djasabra por buska buska number di inskripshon

Tur partisipante por buska nan Bibnr. i T-shirt djasabra for di 8’or di mainta pa 4’or di atardi na Madero Beach Club. Tur partispante por reserva pa e menu eksklusivo pa marathon na Madero Beah Club.

Si pa djasabra no a alkansá e kantidat di partisipante por hasi inskripshon ainda.

Orario di start

Ora di salida 4’or mardugá Marathon, 6’or mainta Mitar Marathon, 6.30 mainta Trail, 7’or mainta 10K Run & Walk, 7.30’or mainta 5K Run & Walk.

Limpiesa di Ruta

E organisadónan lo laga limpia e ruta, manera e evento terminá, pa mas tarda djaluna mainta 8’or tur kos ta den na estado original.

Lugá di parker pa partisipante

Por parker na BLVD te ku 5’or di mainta. Entre 3.55 i 4.10 mardugá no por parker den serkania di salida esei ta debí ku Marathon ta Sali 4’or.

Despues di e ora ariba menshoná por parker riba Koraal Spechtweg i kana entre 5 pa 10 minüt pa yega salida.

Kontribui ku bon obra

Huntu ku ANVR, e organisashon ke kontribui ku e bon trabou ku e opvang Tante Emma ta hasi na Fuik. Na e kongreso di ANVR di diabierne 18 november ultiomo ya kaba a entrega un cheque di 5.000 Euro. Di e manera aki e por sigui ku e bon trabou pa vang op mas ku 120 mucha na Fuik. Partisipante pa duna kontribushon ora di inskribi. Di e manera aki por duna Tante Emma na total 7.500 Euro.

“Awards Ceremony & After party”

Mesora, na finish for di 7’or di mainta por disfrutá den kompania di amigu i konosí nan na Restaurant Chill.

11’or ta kuminsá ku entrega di premio number 1 te ku 3 tur kategoria. Mesora despues di entrega di premio lo tin un tombola kaminda KLM Korsou lo rifa 2 ticket pa Amsterdam pa tur partisipante di Aruba, Bonaire i Korsou.

For di 6’or atardi e Afterparty ta kuminsá tambe na Restaurant Hemmingway ku musika salsero i musika bibu di Los Compadres.

E di 4 edishon di KLM Curacao Marathon lo tuma lugá djadoming 26 di novèmber 2017.

E organisashon ta deseá tur partisipante éksito ku nan preparashon i ta gradisí tur partisipante, spònser, kolaboradó i voluntarionan pa hasi e evento aki posibel.

November 23, 2016

DEN KAMPEONATO DI HISAMENTU DI PESO TAMBE KÒRSOU I NOS HÓBENNAN TA BRIA

ORANJESTAD — Curaçao Weightlifting Federation (CWF) a logra un total di 13 título repartí entre 7 promé lugá, 3 di dos lugá i 3 di tres lugá i un finalista na di 5 lugá. Djadumingu 13 novèmber CFW tambe a partisipá na e Kampeonato Nashonal di Aruba di Hisamentu di Peso ku a tuma lugá na Compleho Deportivo Frans Figaroa ku partisipashon di atletanan di Kòrsou, Aruba i Venezuela. E delegashon di Kòrsou a konsistí di 9 atleta, 1 árbitro, 1 coach. Entre e 9 atletanan di Kòrsou 7 di nan a partisipá pa promé biaha ku ta un prestashon sumamente bon. Entre nan hóbennan ku tin apénas algun luna ta práktika e deporte di Hisamentu di Peso. Tur 9 atleta a kai den premiashon.

Un di prestashon ekstraordinario ta e grupo di 5 hóben (youth) di e edat entre 11-17 aña, ku mester a enfrentá e reto grandi aki despues di apénas 6 luna di preparashon ekstenso. E hóbennan aki a haña guia primeramente di Coach nashonal di CWF Ivan de Windt, i den e último dos lunanan di nan preparashon ku yudansa di e Coach Venezolano Emil Sangronis Garcia.

E kompetensia di Hisa Peso konosé dos tipo di hisamentu di peso esta Snatch Clean & Jerk. Pa un atleta partisipá e ta haña 3 chèns i kada biaha ta subi e peso. Pa e por kai den premio e mester skor bon den tur dos kategoria di Hisamentu di Peso menshoná. E atleta ta kompetí den su kategoria di edat i esun di pesonan na kilo i e kategoria di su peso di kurpa. Pues un atleta por sali finalista den su kategoria di peso di kurpa pero e por sali tambe den e kategoria overall di e kategoria di peso na kilo tambe.

Ku sumo plaser i orguyo, CWF por mira bek riba e resultadonan di nan esfuerso último aña, ora ku Kòrsou su atletanan a sa di duna un tremendo prestashon i a logra premio den diferente kategoria.

Den e kategoria di hóben maskulino entre 11 pa 17 aña CWF su atletanan a logra e siguiente resultado repartí bou di diferente premio i kategoria di peso. Gedrion Cadeau, Teshawn Eleonora a logra e promé lugá i , despues ku Raydison Cadeau a logra a sali na di 5 lugá den su kategoria a bai ku e promé lugá den overall a base di e fórmula Sinclair.

Youth Male Categoria Bodyweight Total Placing Overall

Gedrion Cadeau 56 kgs 47.7 kgs 86 kgs 1st place 2nd place

Raydian Cadeau 56 kgs 51.0 kgs 85 kgs 2nd place

Arnellyson Doran 56 kgs 49.4 kgs 80 kgs 3rd place

Raydison Cadeau 56 kgs 30.5 kgs 59 kgs 5th place 1st place

Teshawn Eleonora 94 kgs 85.5 kgs 80 kgs 1st place

8 atleta a partisipá den e kategoria Youth Male aki i Kòrsou a logra bai ku un total di 6 título.

Pa loke ta trata e kategoria di dama Senior e atleta Ariaantje Obispo di CWF a logra e promé lugá den su kategoria di peso i den overall e di tres puesto. Un total di 12 atleta a partisipá den e kategoria Senior Female.

Senior Female

Ariaantje Obispo 69 kgs 63.5 kgs 141 kgs 1st place 3rd place

Atleta Migael Taylor tambe a logra e promé lugá den e kategoria maskulino Junior i na di 2 lugá overall. Den e kategoria aki 5 atleta a partisipá. Total 5 atleta a partisipá den e kategoria Junior Male.

Junior Male

Migael Taylor 85 kgs 81.5 kgs 240 kgs 1st place 2nd place

Den e kategoria maskulino Senior tambe CWF a logra gara no ménos ku 3 título. Jan Dayleg a logra e promé lugá di tantu den su kategoria komo esun overall. Den e kategoria di Senior Male un total 12 atleta a partisipá di kua Kòrsou a bai ku 3 título.

Senior Male

Jan Dayleg 85 kgs 81.7 kgs 228 kgs 1st place 1st place

Ardiles Kroon 85 kgs 83.7 kgs 202 kgs 3rd place

Por konsiderá ku e kompetensha tabata di un nivel haltu, un reto bastante grandi, pero ku e atletanan a sa di sobresalí i saka kara di Kòrsou i di Curaçao Weightlifting Federation. Esaki sigur mirando e temporada hopi kòrtiku pero intensivo ku a train pa e kompetensha aki. CWF ta sumamente orguyoso di su atletanan i tambe di su Coachnan ku a demostrá ku e deporte ta riba un bon kaminda. Despues di un siman di deskanso, e atletanan tur ta preparando pa e próksimo i último kompetensha pa 2016, ku lo ta e kampeonato lokal kombiná torneo invitashonal titulá “Lifting in Paradise”, ku lo tuma lugá djasabra 10 Desèmber 2016.

E deporte di Hisamentu di Peso pa basta tempu no tabata hopi aktivo. Pero apesar di e tiki rekursonan ku CWF tin tantu finansiero komo na espasio i posibilidatnan pa train i unifòrm nan a logra partisipá e aña aki na 3 kampeonato internashonal i 2 torneo internashonal. Partisipashon na kompetenshanan internashonal prinsipalmente si konsiderá ku e deporte ta unu Olímpiko mester di hopi disiplina, training i kontinuidat. CFW ta preparando algun hóben ku ta primintí di sigui saka kara di Kòrsou. P’esei CFW lo apresiá kualke yudansa ku nan por haña pa por yuda kubri e gastunan di training i Coaching internashonal i partisipashon na e diferente kampeonatonan ku tin den Karibe i mundial. Den pasado Kòrsou tabatin partisipante na nivel mundial. Atletanan manera nos miembronan di salon di Fama Beto Adriana, Marcel Betrian, Rudy Monk, Hector Curiel i tambe atletanan manera Chiki Lindeborg, Jossy Flores i hopi mas ku a logra premio i fama internashonal. Esaki ta un di e metanan prinsipal di CWF logra halsa nivel di e deporte di Hisamentu di Peso na Kòrsou i laga mundu re-diskubrí nos potensialnan den e deporte aki.

October 17, 2016

Di dos edishon “This is it Swimming Marathon”

WILLEMSTAD — Swim Club Orca Curaçao huntu ku Fundashon Pa Nan ta organisá pa di dos aña “This is It Swimming Marathon”. E nòmber ta papia pa su mes! Ta un kompetensia di landamentu. Pa 12 ora tras di otro hóbennan aktivo den e deporte di natashon i tambe esnan ku ta rekreá lo landa riba un spit haltu den Pisina Bennie Leito na Rif.

Djasabra, 22 di òktober for di 8’or mainta te ku 8’or anochi Pisina Bennie Leito lo ta e atrakshon di dia, kaminda nos atletanan di natashon lo kompetí den nan deporte preferí.
E kompetensia lo ta unu sumamente interesante ya ku kada tim lo tin atletanan di diferente edat ta kompetí. Lo tin kategoria di diferente edat repartí den: U-10, U-13, U-17 i 18+.

Loke ta hasi e “This Is It Swimming Marathon” mas kompetitivo ta ku no tin premio pa kategoria, sino premio pa e tim ku su atletanan a landa mas biaha di un banda pa otro di e pisina.
Na final di e máratòn ku ta 8’or di anochi, e tim ku su atletanan a landa mas tantu biaha bai bini ta ganadó. Aña pasá e tim di Typhoon Swim Club a gana e kompetensia.

E timnan di landamentu, skolnan sekundario i otro organisashonnan di landamentu tambe por inskribí pa kompetí òf pa rekreá. Por bini ku un tim di hóbennan pa landa durante 1 ora di eskoho sin stòp. Entrada lo ta grátis. Tur hende ta bon biní pa bin apoyá nos atletanan.

Organisashon di Swim Club Orca Curaçcao I Fundashon Pa Nan, tur dos ta organisashonnan ku ta kere ku deporte ta un base importante den desaroyo di nos muchanan.
“This Is It Swimming Marathon “ 2016 ta e di dos máratòn ku Swimming Club Orca Curaçao i Fundashon Pa Nan ta organisá. E intenshon ta pa e máratòn aki por ripití tur aña pa nos atletanan por demonstrá nan abilidat den rango di deporte di natashon.

Timnan ,skolnan i organisashonnan ku aña pasá a partisipá ta:Swim Club Orca Curaçao, Typhoon, Sithoc Swim Club, Bulado Swim Club, Curacao Sharks Aquatics, VSBO St.Jozef, Jacques Ferrandi VSBO, Special Olympics and Friends, Pisina Bennie Leito, Djaoen Swimming Center, Aqua Jogging i Zweminrichting Piscadera. Nan tur ta konta ku asistensia i apoyo di Kòrsou kompleto pa bin apoyá nan atletanan e aña aki atrobe. Si abo komo hóben tabatin pensá pa kuminsá práktika e deporte di natashon, hasi uso di e oportunidat úniko aki pa bin mira tur tim den akshon i skohe pa bo mes.

Nos ta spera boso djasabra 22 di òktober 2016 for di 8’or di mainta na Pisina Bennie Leito na e di dos edishon di: ”This It It Swimming Marathon”.

October 12, 2016

Torneo internashonal di pin pon master 2016

WILLEMSTAD — Den kuadro di selebrashon di 60 anya di Federashon di Tenis di Mesa di Korsou lo bai tin in grandioso torneo internashonal di pin pon ku ta kuminsa diahuebs 13 di oktober den sala di Sentro Deportivo korsou I lo termina diadumingu 16 di oktober ku e weganan pa finalnan di e diferente kategoria.

E grandioso torneo internashonal di master aki lo wordu dedika naun di nos grandinan den e deporte di pin pon ku ta sr. Eduardo “Dito” Vlieg ku a sali na 3 okashon kampion di Korsou tabata ta tambepresidenet di e Federashon di tenis di Mesa di Korsou.

E torneo internashonal aki lo wordu organisa den diferente kategoria di edat kual nan ta ; 35 – 45, 46 pa 55, 56 pa 65 I 66 + tambe lo tin in kategoria habri pa tur hungado kual ta konta premionan cash pa balor di 1750 dollar.

E torneo aki lo kuminsa diahuebs 13 di oktober pa 7 or di anochi I ta kontinua diabierne mainta pa 10 or I diabierne atradi pa 6 or mientras ku diasabra mainta pa 9.30 lo kuminsa ku e kategoria habri I ta sigui diasabra atardi pa 5 or mientras ku diadumingu maita 10 or lo tin e weganan final I entrega di premionan.

Tur bon fanatiko di pin pon I deporte en general ta wordu kordialmente invita pa bin bishita e weganan di pin pon internashonal aki ku ta konta ku partisipashon di mas di 50 hungador for di Ulanda, Venezuela , Aruba, Boneiru I Korsou.

Entrada ta kompletamente gratis den sporthal Errol Rooi na Sentro Deportivo Korsou.

September 29, 2016

Kampeonato Femenino di Ahedres 2016

WILLEMSTAD — Fin di siman benidero e gran dia ta yega kaminda Federashon di Ahedres Kòrsou (FEDAKO) ta organisá otro kampeonato nashonal di ahedres pa nos ahedresistanan femenino. Ya ta di 5 aña konsekutivo ku FEDAKO ta organisá e evento anual aki. Manera tabata e kaso durante e añanan anterior e kampeonato femenino lo tuma lugá den e sala di konferensia di Lions Dive & Beach Resort, kual atrobe ta spònser di e evento.

E kompetensia ta konsistí di 5 buèlta. Tres partido lo tuma lugá riba djasabra 1 di òktober, kuminsando 11 ’or di mainta i lo hunga dos partido riba djadumingu 2 di òktober kuminsando 1 ‘or di mèrdia. Seremonia di premiashon i klousura lo tuma lugá riba djadumingu 2 di òktober pa 6 ‘or di atardi.

Partisipashon ta habri pa tur nos damanan lokal. Lo tin premionan adishonal disponibel pa 2 diferente kategoria di edat. Ademas e partisipantenan por akumulá punto durante e evento pa por representá Kòrsou den eksterior.

Un invitashon spesial ta bai na nos damanan en partikular pa bin partisipá i na tur amantenan di ahedres en general pa bin presensia i gosa di e weganan. Tur e 5 damanan ku a kaba di representá nos pais na e olimpiada di ahedres resientemente na Azerbaijan tambe lo partisipá.

Inskripshon ta kosta fl. 10,– pa adulto i fl. 5 pa ahedresistanan menor di 21 aña. Tin posibilidat pa inskribí riba e djasabra mes di e evento for di mitar di dies te dies ‘or di mainta.

Durante e evento prinsipal e kampeon aktual Ursus van Bemmelen, a asepta pa hunga dos partido di reto kontra dos hungador fuerte. Ursus van Bemmelen kende a kaba di haña e título di Maestro Fide durante e Olimpiada di ahedres na Azerbaijan, lo hunga kontra di e promé retador riba djasabra 1 di òktober pa 2 ‘or di mèrdia i kontra e di dos retador djadumingu 2 di òktober pa 11:00 ‘or di mainta. E dos partidonan aki lo tuma lugá den mesun sala na Lions Dive & Beach Resort i nan tambe ta primintí di bira sumamente interesante.

Pa mas informashon riba e evento aki por manda un mail na jimmyizijk@gmail.com of yama na 512 0007.

September 27, 2016

Swim Club Orca Curaçao a partisipá na un eksitoso interkambio deportivo na Boneiru

WILLEMSTAD — Direktiva di Swim Club Orca Curaçao por mira bèk riba un fin di siman hopi eksitoso na Boneiru. Djabièrnè 23 di sèptèmber 2016 un delegashon di 110 persona (12 landadó, 4 landadó di “syngro”, 40 hungadó di waterpolo, 7 coach, 1 rèfri, 1 moderadó pa landamentu kompetitivo, 42 fanátiko i 3 miembro di direktiva) a biaha pa Boneiru pa partisipá na un interkambio deportivo organisá pa e tim di landamentu i waterpolo Baracuda’s. E aña aki ta di dos aña ku Baracuda’s ta organisá e aktividat aki. E aktividat aki ta kresiendo, pasobra The Roy Hill Seals di Trinidad tambe a partisipá e aña aki ku waterpolo.

Aktividatnan pa ku tur e disiplinanan tabata:

Landamentu:

Kompetensia di “Openwaters riba djasabra mainta:”, mas atardi klínika i un treinen spesial duná pa Richard Leito. Djadumingu a sigui ku e klínika i treinen.

Landamentu sinkronisá :

Treinen djasabra mainta, un show djasabra anochi. Djadumingu klínika duná pa sra. Daniela Diaz.

Waterpolo :

Kompetensia den kategoria U-12. Nan a hunga 3 wega djasabra i 1 wega djadumingu. Orca kontra di Baracuda’s. Orca a pèrdè 1 wega i gana 3 wega.

Kompetensia den kategoria U-16. Nan a hunga un ronda di “Round Robbin”, den kua a partisipá e tim di Baracuda’s ku dos ekipo, e tim di Trinidad ku 1 ekipo i Orca a partisipá ku 1 ekipo. Den e “RR” Orca a sali na di kuater lugá i den e final pa di 3 i di 4 lugá Orca U-16 a pèrdè kontra di Baracuda’s II pa termina di 4 den e kompetensia di U-16.

Kompetensia den kategoria U19/Señor. Nan a hunga 2 wega djasabra i 2 wega djadumingu. Orca kontra di Baracuda’s, Orca a pèrdè 1 wega i gana 3. Direktiva di Orca ta gradisí tur atleta pa nan komportashon i prestashon, mayornan ku a bai i ku no a bai, coachnan pa e gran trabou ku nan a desplegá promé di e biaha i na Boneiru. Un danki na Richard Leito pa e klínika ku e la duna na Boneiru i sigur no por lubidá riba e spònsernan ku a yuda Orca pa yega na un ekipo di sonido, pa Orca por a bai uniformá Boneiru i pa por a kaba di sera sèn pa e delegashon por a biaha pa Boneiru. Un danki na sra. Daniela Diaz (ekipo di Zonido), sr. Stephan v Dijk (spiker pa bou di awa), Curaçao Development Institute (unifòrm), ENNIA (unifòrm), Fundashon pa nan, Centro Medico Aesculapius, Insel Air i sr. Frank Girigorie di Sai Bank.

September 20, 2016

Enkuentro deportivo riba maneho di deporte 2017 – 2020 pa Kòrsou

WILLEMSTAD — Djarason último, 14 sèptèmber 2016, Federashon Deporte i Olímpiko Kòrsou (FDOK) a organisá den sala di reunion di FDOK, un enkuentro deportivo riba maneho di deporte 2017 – 2020 pa Kòrsou.

Propósito di e enkuentro tabata, pa presentá na tur asistente na e reunion, resúmen di e kongreso 3F (Finansa, Formashon i Fasilidat) ku FDOK a tene ku su miembronan na luna di mei 2016. Resúmen di e kongreso 3F ta duna un bista di kiko ta biba i e preokupashonnan den mundu di deporte na Kòrsou.

Tambe tabata intenshon pa mira kon leu Gobièrnu por hunga un ròl den yudansa pa aliviá e preokupashonnan aki den e periodo di gobernashon binidero. FDOK ta opiná ku mester tin un kolaborashon entre FDOK i Gobièrnu di Kòrsou pa por logra metanan i resultadonan positivo riba tereno di deporte. FDOK ta konsiderá Gobièrnu di Kòrsou un di e partnernan mas importante pa traha na bienestar di nos deporte.

Den kuadro di esaki, FDOK a tuma e inisiativa pa invitá representantenan di tur partido polítiko ku ta partisipá den elekshon di 30 sèptèmber próksimo. Durante e reunion a hasi akto di presensia representantenan di partidonan: PAS, PRO KORSOU, MFK, PAR, PAIS, MOVEMENTU PROGRESIVO, i, UN KÒRSOU HUSTU.

Presidente di FDOK Sr. R. Francisca a habri e enkuentro i a dirigí palabra na tur presente. Despues di introdukshon, Sekretario General di FDOK. Sr. R. Persaud a tuma palabra i presentá un historia amplio i dokumentashon di e hopi rapòrtnan di investigashon trahá riba deporte den e periodo di 1974 te ku 1991. Seguidamente a presentá na tur presente resúmen di e kongreso 3F. Na final di e presentashon, Presidente Sr. Francisca a duna representante di partidonan polítiko presente oportunidat pa duna nan opinion i komentario riba e presentashon i pa ekspresá kada partido su vishon riba importansia i maneho di deporte na Kòrsou. Basá riba kada komentario di esnan presente por a konkluí ku nan vishon di e maneho di deporte 2017-2020 ta kuadra ku esun di FDOK. Sr. Francisca a hasi un apelashon na kada representante di e partidonan, ku si akaso nan partido logra drenta Gobièrnu, pa nan invitá FDOK pa por forma parti den e trahamentu di e akuerdo di gobernashon riba deporte pa e próksimo 4 añanan. Tur presente a bai di akuerdo ku nan partido lo kumpli ku e petishon aki.

FDOK ku plaser i satisfakshon por wak bèk riba un enkuentro informativo i fruktífero. FDOK ta gradisí tur representante di tur partido ku a partisipá na e enkuentro aki, i sinseramente ta spera di por traha huntu ku gobièrnu binidero riba e akuerdo di gobernashon pa loke ta trata tereno di deporte. Asina FDOK huntu ku Gobièrnu por logra traha riba un maneho efektivo pa deporte pa e próksimo 4 añanan 2017 te ku 2020, ku resultadonan positivo i duradero ku lo engrandesé deporte na Kòrsou.